Il-Ftehim dwar il-Ħruġ bejn l-UE u r-Renju Unit

Il-Ftehim dwar il-Ħruġ konkluż bejn l-Unjoni Ewropea u r-Renju Unit jistabbilixxi t-termini tal-ħruġ ordnat tar-Renju Unit mill-UE, skont l-Artikolu 50 tat-Trattat dwar l-Unjoni Ewropea.

Il-Ftehim dwar il-Ħruġ daħal fis-seħħ fl-1 ta’ Frar 2020 wara li kien hemm qbil dwaru fis-17 ta’ Ottubru 2019. Fost oħrajn jikkonsisti f’Protokoll dwar l-Irlanda u l-Irlanda ta’ Fuq.

X’ikopri l-Ftehim dwar il-Ħruġ

• Dispożizzjonijiet komuni: jistabbilixxu klawżoli standard għall-fehim u t-tħaddim tajjeb tal-Ftehim dwar il-Ħruġ.
• Id-drittijiet taċ-ċittadini: jipproteġu l-għażliet tal-ħajja ta’ aktar minn 5 miljun ċittadin tal-UE fir-Renju Unit, u aktar minn miljun ċittadin tar-Renju Unit fil-pajjiżi tal-UE, jissalvagwardjaw id-dritt tagħhom li jibqgħu u jiżguraw li dawn jistgħu jkomplu jikkontribwixxu għall-komunitajiet tagħhom.
• Kwistjonijiet ta’ separazzjoni: żguraw tmiem bla xkiel u ppermettew ħruġ ordnat tar-Renju Unit, inkluż, fost l-oħrajn li: 
  • ippermettew li l-merkanzija mqiegħda fis-suq qabel it-tmiem tat-tranżizzjoni tkun tista’ tkompli għad-destinazzjoni tagħha
  • jipproteġu d-drittijiet eżistenti ta’ proprjetà intellettwali, inklużi l-indikazzjonijiet ġeografiċi
  • ġabu fi tmiemhom il-proċeduri relatati mal-pulizija u l-kooperazzjoni ġudizzjarja f’materji kriminali u proċeduri amministrattivi u ġudizzjarji oħrajn
  • indirizzaw l-użu u l-protezzjoni tad-data u tal-informazzjoni skambjati qabel tmiem il-perjodu ta’ tranżizzjoni
  • indirizzaw kwistjonijiet relatati mal-Euratom
• Perjodu ta’ tranżizzjoni (1 ta’ Frar – 31 ta’ Diċembru 2020) li matulu l-UE trattat lir-Renju Unit daqslikieku kien Stat Membru, bl-eċċezzjoni tal-parteċipazzjoni fl-istituzzjonijiet tal-UE u l-istrutturi ta’ governanza. L-UE u r-Renju Unit użaw dawn ix-xhur biex jinnegozjaw il-Ftehim ta’ Kummerċ u Kooperazzjoni bejn l-UE u r-Renju Unit.
• Is-saldu finanzjarju: jiżgura li r-Renju Unit u l-UE jonoraw l-obbligi finanzjarji kollha meħuda waqt li r-Renju Unit kien membru tal-Unjoni.
• L-istruttura kumplessiva ta’ governanza tal-Ftehim dwar il-Ħruġ: tiżgura l-ġestjoni, l-implimentazzjoni u l-infurzar effettivi tal-ftehim, inklużi mekkaniżmi xierqa għas-soluzzjoni tat-tilwim.
• L-Irlanda: soluzzjoni legalment operazzjonali li tevita fruntiera fiżika fuq il-gżira tal-Irlanda, tipproteġi l-ekonomija tal-gżira kollha u l-Ftehim tal-Ġimgħa l-Kbira (ta’ Belfast) fid-dimensjonijiet kollha tiegħu u tissalvagwardja l-integrità tas-Suq Uniku.

• Ċipru: protokoll dwar iż-Żoni ta’ Bażi Sovrana (SBA) f’Ċipru, li jipproteġi l-interessi taċ-Ċiprijotti li jgħixu u jaħdmu fiż-Żoni tal-Bażi Sovrana wara l-ħruġ tar-Renju Unit mill-UE.

• Ġibiltà: Protokoll dwar Ġibiltà, li jiffaċilita l-kooperazzjoni mill-qrib bejn Spanja u r-Renju Unit fir-rigward ta’ Ġibiltà dwar l-implimentazzjoni tad-drittijiet taċ-ċittadini fi ħdan il-Ftehim dwar il-Ħruġ. Il-Protokoll jikkonċerna wkoll il-kooperazzjoni amministrattiva bejn l-awtoritajiet xierqa f’għadd ta’ oqsma ta’ politika.

L-implimentazzjoni tal-Ftehim dwar il-Ħruġ teħtieġ miżuri kemm fil-livell tal-UE kif ukoll fil-livell tal-Istati Membri.