Il-prijoritajiet konġunti tal-istituzzjonijiet tal-UE għall-2021-2024

Mill-2016, il-Parlament Ewropew, il-Kunsill u l-Kummissjoni bdew jiddiskutu u jaqblu dwar il-prijoritajiet leġiżlattivi tal-UE għas-sena ta’ wara f’Dikjarazzjoni Konġunta annwali. Dan jippermetti lill-istituzzjonijiet jaħdmu b’mod aktar effettiv u aktar mill-qrib fuq proposti leġiżlattivi ewlenin imressqin mill-Kummissjoni li għalihom il-Parlament Ewropew u l-Kunsill huma koleġiżlaturi.

Barra minn hekk, fl-2020, it-tliet istituzzjonijiet tal-UE ffirmaw il-Konklużjonijiet Konġunti għall-2020-2024, li jistabbilixxu l-objettivi u l-prijoritajiet politiċi komuni sal-elezzjonijiet Ewropej li jmiss fl-2024.

Id-dikjarazzjoni Konġunta dwar il-prijoritajiet leġiżlattivi tal-UE għall-2023 u l-2024 tistabbilixxi viżjoni Ewropea xxerjata għal Ewropa aktar b’saħħitha u aktar reżiljenti fl-isfond tal-aggressjoni tar-Russja kontra l-Ukrajna. Dan juri l-impenn determinat li nibqgħu magħqudin fl-appoġġ għall-Ukrajna u l-poplu tagħha u biex jingħelbu l-isfidi l-kbar ta’ żminijietna.  It-tliet istituzzjonijiet tal-UE jimpenjaw ruħhom li jagħtu l-ogħla prijorità lil sett ta’ prijoritajiet leġiżlattivi ewlenin sabiex ikun jista’ jintlaħaq qbil dwarhom sa tmiem il-leġiżlatura attwali. Id-dikjarazzjoni hi akkumpanjata minn dokument ta’ ħidma li jelenka aktar minn 160 proposta leġiżlattiva speċifika.

Dawn il-proposti leġiżlattivi huma fundamentali biex jitwettaq il-Patt Ekoloġiku Ewropew, tinkiseb Ewropa lesta għall-era diġitali, tinħoloq ekonomija għas-servizz tan-nies, l-Ewropa ssir aktar b’saħħitha fid-dinja, jiġi promoss l-istil ta’ ħajja Ewropew tagħna, kif ukoll tissaħħaħ id-demokrazija tagħna u niddefendu l-valuri komuni Ewropej tagħna.

Id-Dikjarazzjoni Konġunta għall-2023 u l-2024 tilqa’ wkoll il-kisbiet tal-2022 minkejja sena diffiċli. Dawn jinkludu b’mod partikolari l-għoti ta’ għajnuna umanitarja, politika, finanzjarja u militari lill-Ukrajna u lill-poplu tagħha, kif ukoll sanzjonijiet mingħajr preċedent kontra r-Russja biex jeżerċitaw pressjoni ekonomika u jdgħajfu l-kapaċitajiet militari tar-Russja.

L-istituzzjonijiet tal-UE jilqgħu tajjeb ukoll ir-riżultati tal-Konferenza dwar il-Futur tal-Ewropa, u affermaw mill-ġdid l-impenji tagħhom li jsegwu l-proposti, kull waħda fl-isfera tal-kompetenza tagħha. Fil-fatt, 4 minn 5 inizjattivi ġdida fil-programm ta’ ħidma tal-Kummissjoni għall-2023 huma marbutin mal-proposti finali tal-Konferenza.

Dokumenti