Insaħħu ċ-ċibersigurtà tas-settur tal-kura tas-saħħa

Il-Kummissjoni ppreżentat Pjan ta’ Azzjoni tal-UE maħsub biex isaħħaħ iċ-ċibersigurtà tal-isptarijiet u tal-fornituri tal-kura tas-saħħa. Din l-inizjattiva hija prijorità ewlenija fl-ewwel 100 jum tal-mandat il-ġdid, u għandha l-għan li toħloq ambjent aktar sikur u sigur għall-pazjenti. 

Fl-2023 biss, il-pajjiżi tal-UE rrapportaw 309 inċidenti sinifikanti taċ-ċibersigurtà mmirati lejn is-settur tal-kura tas-saħħa — aktar minn kull settur kritiku ieħor. Peress li kulma jmur il-fornituri tal-kura tas-saħħa qed jużaw dejjem aktar ir-rekords diġitali tas-saħħa, ir-riskju ta’ theddid relatat mad-data qed ikompli jiżdied. Jistgħu jiġu affettwati ħafna sistemi, inklużi rekords elettroniċi tas-saħħa, sistemi tal-fluss tax-xogħol fl-isptarijiet, u apparati mediċi. Theddid bħal dan jista’ jikkomprometti l-kura tal-pazjenti u saħansitra jipperikola l-ħajjiet.  

Biex tindirizza dawn l-isfidi, l-UE qed taħdem biex issaħħaħ is-settur tal-kura tas-saħħa u tagħmlu aktar reżiljenti kontra t-theddid ċibernetiku. Il-Pjan ta’ Azzjoni l-ġdid huwa msejjes fuq il-leġiżlazzjoni eżistenti, bħal-leġiżlazzjoni għall-UE kollha dwar iċ-ċibersigurtà, u jestendi l-kamp ta’ applikazzjoni tiegħu biex jinkludi prattiki ġenerali. Jiffoka fuq il-prevenzjoni, il-kxif, il-mitigazzjoni tal-impatt u d-deterrenza tat-theddid ċibernetiku. Barra minn hekk, il-Pjan għandu l-għan li jistabbilixxi Ċentru pan-Ewropew ta’ Appoġġ għaċ-Ċibersigurtà biex jipprovdi lill-isptarijiet u lill-fornituri tal-kura tas-saħħa gwida aktar personalizzata. Sa tmiem is-sena, se jkompli jiġi rfinat permezz ta’ approċċ kollaborattiv u se jiġi implimentat b’mod progressiv matul is-sentejn li ġejjin. 

Id-diġitalizzazzjoni tas-settur tal-kura tas-saħħa tippermetti servizzi aħjar għall-pazjenti permezz tal-innovazzjonijiet, flimkien ma’ ħafna benefiċċji oħra. L-UE tibqa’ impenjata li trawwem ambjent tal-kura tas-saħħa fejn it-teknoloġija tagħti s-setgħa lill-pazjenti, ittejjeb il-kura, u tappoġġa lill-professjonisti fil-kura tas-saħħa. 

Għal aktar informazzjoni 

Iċ-ċibersigurtà tal-isptarijiet u tal-fornituri tal-kura tas-saħħa 

Pjan ġdid għall-prosperità u l-kompetittività sostenibbli tal-Ewropa  

Iċ-ċibersigurtà  

Stqarrija għall-istampa: Il-Kummissjoni tħabbar pjan ta’ azzjoni biex is-settur tas-saħħa jiġi protett mill-attakki ċibernetiċi 

Pjan ta’ azzjoni Ewropew dwar iċ-ċibersigurtà tal-isptarijiet u tal-fornituri tal-kura tas-saħħa 

L-Aġenzija tal-Unjoni Ewropea għaċ-Ċibersigurtà (ENISA)