Illum niċċelebraw il-Jum Internazzjonali għall-Eliminazzjoni tad-Diskriminazzjoni Razzjali. L-Unjoni Ewropea ssejset fuq il-valuri tal-ħarsien tad-dinjità u tad-drittijiet tal-bniedem, tal-libertà, tad-demokrazija u tal-ugwaljanza. Ħadd fl-UE ma għandu jiġi ddiskriminat abbażi tal-oriġini razzjali jew etnika tiegħu. Fl-2020, il-Kummissjoni Ewropea stinkat aktar biex tindirizza il-kwistjonijiet persistenti u ppreżentat l-ewwel Pjan ta' azzjoni tal-UE għall-Ġlieda kontra r-Razziżmu, li stabbilixxa sensiela ta’ miżuri u laqqa’ flimkien l-atturi fil-livelli kollha biex jindirizzaw ir-razziżmu b’mod aktar effettiv fl-UE. Minkejja dan, għad jeżistu ċerti kwistjonijiet. Stħarriġ tal-UE mill-2023 juri li aktar minn nofs dawk li wieġbu jaħsbu li hemm diskriminazzjoni mifruxa f’pajjiżhom abbażi tal-fatt li wieħed ikun Rom (65%), il-kulur tal-ġilda (61%,) jew l-oriġini etnika (60%). Fl-2023, l-Aġenzija tal-Unjoni Ewropea għad-Drittijiet Fundamentali rrappurtat li l-fastidju u l-vjolenza kontra l-persuni ta’ dixxendenza Afrikana u l-Musulmani fl-UE ma tjibux mill-2016 ’l hawn. Id-diskriminazzjoni kienet l-aktar komuni fit-tiftix tal-akkomodazzjoni, fit-tiftix ta’ impjieg, fuq ix-xogħol jew fil-qasam tal-edukazzjoni. Hemm ħtieġa distintiva għal aktar azzjoni. U bħala parti mill-prijoritajiet il-ġodda tagħha, il-Kummissjoni qed taħdem fuq Strateġija ġdida tal-UE Kontra r-Razziżmu, sabiex ir-razziżmu ma jkollux post fl-UE. Għal aktar informazzjoni: Pjan ta’ Azzjoni tal-UE għall-Ġlieda Kontra r-Razziżmu 2020–2025 Stħarriġ tal-Ewrobarometru dwar id-Diskriminazzjoni fl-Unjoni Ewropea - Diċembru 2023 Rapport: Being Black in the EU Rapport: Being Muslims in the EU Il-korpi tal-ugwaljanza għall-promozzjoni tat-trattament ugwali u n-nondiskriminazzjoni Dettalji Data tal-pubblikazzjoni21 Marzu 2025AwturId-Direttorat Ġenerali għall-Komunikazzjoni
