An Comhaontú um Tharraingt Siar idir an tAontas agus an Ríocht Aontaithe

Leis an gComhaontú um Tharraingt Siar arna thabhairt i gcrích idir an tAontas Eorpach agus an Ríocht Aontaithe bunaítear téarmaí tharraingt siar rianúil na Ríochta Aontaithe as an Aontas, i gcomhréir le hAirteagal 50 den Chonradh ar an Aontas Eorpach.

Tháinig an Comhaontú um Tharraingt Siar i bhfeidhm an 1 Feabhra 2020, tar éis dó a chomhaontaithe an 17 Deireadh Fómhair 2019. Cuimsítear ann, i measc nithe eile, Prótacal maidir le hÉirinn agus Tuaisceart Éireann.

An méid a chumhdaítear leis an gComhaontú um Tharraingt Siar

• Forálacha Coiteanna: ina leagtar amach clásail chaighdeánacha maidir le tuiscint chuí ar an gComhaontú um Tharraingt Siar agus maidir lena oibriú cuí.
• Cearta na Saoránach: lena dtugtar cosaint do na roghanna saoil atá ag os cionn 5 mhilliún saoránach den Aontas sa Ríocht Aontaithe, agus breis agus milliún náisiúnach den Ríocht Aontaithe i dtíortha an Aontais, lena gcaomhnaítear a gceart chun fanachta agus lena gcinntítear gur féidir leo leanúint de rannchuidiú lena bpobail.
• Saincheisteanna maidir leis an scaradh: cinntíodh críoch ordúil na socruithe reatha agus éascaíodh tarraingt siar rianúil na Ríochta Aontaithe, lena n-áirítear, i measc nithe eile: 
  • cumasaíodh d’earraí a chuirfí ar an margadh roimh dheireadh na hidirthréimhse faoi rialacha an Aontais leanúint ar aghaidh chuig a gceann scríbe
  • cosnaítear cearta maoine intleachtúla atá ann cheana, lena n-áirítear tásca geografacha
  • tugadh chun deiridh próisis leanúnacha a bhain le comhar póilíneachta agus breithiúnach in ábhair choiriúla agus próisis riaracháin agus bhreithiúnacha eile
  • tugadh aghaidh ar an úsáid a bhaintear as sonraí agus faisnéis a malartaíodh roimh dheireadh na hidirthréimhse
  • tugadh aghaidh ar shaincheisteanna a bhaineann le Euratom
• Idirthréimhse (1 Feabhra – 31 Nollaig 2020) ar dhéileáil an tAontas Eorpach leis an Ríocht Aontaithe lena linn amhail is dá mba Bhallstát í, cé is moite de rannpháirtíocht in institiúidí agus struchtúir rialachais an Aontais. Bhain an tAontas agus an Ríocht Aontaithe leas as na míonna sin chun an Comhaontú Trádála agus Comhair idir an tAontas Eorpach agus an Ríocht Aontaithe a chaibidliú.
• An socrú airgeadais: a chinntiú go n-urramóidh an Ríocht Aontaithe agus an tAontas na hoibleagáidí airgeadais uile a ndeachthas ina mbun nuair a bhí an Ríocht Aontaithe ina ball den Aontas.
• Struchtúr rialachais foriomlán an Chomhaontaithe um Tharraingt Siar: bainistíocht, cur chun feidhme agus forfheidhmiú éifeachtach an Chomhaontaithe a chinntiú, agus sásraí iomchuí chun díospóidí a réiteach san áireamh.
• Éire: réiteach atá oibríoch ó thaobh an dlí de agus lena seachnaítear teorainn chrua ar oileán na hÉireann, lena gcosnaítear an geilleagar uile-oileánda agus Comhaontú Aoine an Chéasta faoina ghnéithe ar fad, agus lena gcaomhnaítear sláine Mhargadh Aonair an Aontais.

• An Chipir: prótacal maidir leis na Limistéir Bhunáite Fhlaitheasacha (SBA) sa Chipir, lena dtugtar cosaint do leasanna na gCipireach a mhaireann agus atá ag obair sna Limistéir Bhunáite Fhlaitheasacha tar éis don Ríocht Aontaithe tarraingt siar as an Aontas.

• Giobráltar: prótacal maidir le Giobráltar, lena n-éascaítear dlúthchomhar idir an Spáinn agus an Ríocht Aontaithe i ndáil le Giobráltar maidir le cur chun feidhme chearta na saoránach faoin gComhaontú um Tharraingt Siar. Baineann an Prótacal freisin le comhar riaracháin idir údaráis iomchuí i roinnt réimsí beartais.

Ceanglaítear bearta ar leibhéal an Aontais agus ar leibhéal na mBallstát araon chun an Comhaontú um Tharraingt Siar a chur i bhfeidhm.