Oġġetti ta' konsum li tista’ ġġorr fil-bagalja tiegħek

Minkejja l-libertà tal-moviment tal-oġġetti fl-UE, hemm ċerti regoli dwar il-ġarr ta’ ċerti oġġetti ta' konsum minn pajjiż tal-UE għal ieħor. In-nuqqas ta’ konformità mal-kwoti stabbiliti, li jistgħu jvarjaw minn pajjiż għal ieħor, jista’ jirriżulta fil-konfiska tal-oġġetti tiegħek, multa jew saħansitra prosekuzzjoni kriminali. 

Meta tivvjaġġa fl-UE 

L-aħbar it-tajba hija li jekk qed tivvjaġġa fl-UE, tista’ ġġorr miegħek kwalunkwe laħam jew prodotti tal-ħalib sakemm dawn ikunu għall-konsum personali tiegħek stess. L-istess jgħodd għall-fjuri maqtugħin, il-frott jew il-ħxejjex sakemm dawn ikunu tkabbru f’pajjiż tal-UE u jkunu ħielsa minn organiżmi ta’ ħsara jew mard. Dawn ir-regoli japplikaw ukoll meta ġġorr miegħek laħam, prodotti tal-ħalib jew tal-pjanti fil-bagalji tiegħek, jew jekk tordna dawn l-oġġetti online jew tordnahom bil-posta.  

Madankollu, hemm limiti fuq il-ħalib tat-trab tat-trabi (inqas minn 10 kg), l-ikel tat-trabi, l-ikel meħtieġ għal raġunijiet mediċi, u l-għalf speċjali għall-annimali domestiċi. 

F’dak li għandu x’jaqsam mal-alkoħol u t-tabakk, inti intitolat li tittrasporta tali prodotti, sakemm dawn ikunu għall-użu tiegħek stess u mhux għall-bejgħ mill-ġdid. Kull pajjiż tal-UE jista’ jistabbilixxi l-valuri gwida tiegħu stess għall-kwantitajiet li tista’ ddaħħal. Madankollu, dawn il-valuri ma jistgħux ikunu aktar baxxi mil-livelli tal-linji gwida stabbiliti fil-livell tal-UE: 800 sigarett, 1 kg tabakk, 10 litri ta’ spirti, 20 litru ta’ nbid imqawwi, 90 litru nbid u 110 litru birra. 

Ma hemm l-ebda regola għall-UE kollha dwar l-ivvjaġġar bi flus kontanti bejn il-pajjiżi tal-UE. Madankollu, għandek dejjem tiċċekkja qabel tivvjaġġa mal-awtoritajiet doganali lokali, jekk jeżistux regoli lokali fil-pajjiż tat-tluq, tat-tranżitu u tal-wasla. 

Jekk għandek problema b’oġġetti difettużi, kontenut diġitali difettuż jew servizz diġitali difettuż mixtri fi kwalunkwe pajjiż tal-UE waqt li tkun barra minn pajjiżek, iċ-Ċentru Ewropew tal-Konsumatur f’pajjiżek jista’ jgħin. Għal informazzjoni aktar dettaljata dwar drittijietek skont il-liġi nazzjonali, iċċekkja r-regoli speċifiċi dwar il-garanziji legali u l-garanziji kummerċjali għall-pajjiż fejn wettaqt ix-xiri. 

Meta tivvjaġġa fl-UE lejn l-UE minn pajjiż mhux tal-UE 

Jekk qed tivvjaġġa lejn l-UE minn pajjiż li mhux fl-UE, m’għandekx permess iddaħħal prodotti tal-laħam jew tal-ħalib miegħek. Madankollu, tista’ ġġib kwantità limitata ta’ frott u ħaxix kif ukoll bajd, prodotti tal-bajd u għasel. Kwantitajiet ristretti ta’ ħut jew prodotti tal-ħut huma permessi wkoll. Il-biċċa l-kbira tal-pajjiżi tal-UE għandhom regoli stretti dwar il-ġarr ta’ annimali jew pjanti fil-periklu, u f’xi każijiet, jista’ jkollok bżonn permess.  

Tista’ ddaħħal ukoll fl-UE ċerti oġġetti mingħajr VAT u dazji tas-sisa miegħek jekk ma jkunux għall-bejgħ mill-ġdid u tirrispetta l-limiti stabbiliti. Pereżempju, tista’ ddaħħal 4 litri ta’ nbid bla gass u 16-il litru ta’ birra. Barra minn hekk, tista’ ġġib litru spirti ta’ aktar minn 22% vol. (bħal vodka jew gin) jew litru ta’ alkoħol mhux żnaturat (alkoħol etiliku) ta’ 80% vol. jew 2 litri ta’ nbid imsaħħaħ (pereżempju sherry jew port) jew frizzanti. Fir-rigward tat-tabakk, għandek tiċċekkja l-limiti indikati mill-awtoritajiet doganali fil-pajjiż tal-UE li tkun qed tivvjaġġa fih.  

Għal oġġetti oħra, inkluża l-fwieħa, tista’ ġġorr sa valur ta’ €300 għal kull vjaġġatur jew €430 għall-vjaġġaturi bl-ajru u bil-baħar. Xi pajjiżi tal-UE japplikaw limitu aktar baxx ta’ €150 għall-vjaġġaturi ta’ taħt il-15-il sena. U jekk qed issuq fl-UE, tista’ ġġorr 10 litri (massimu) ta’ fjuwil f’kontenitur portabbli, minbarra l-fjuwil li jkun hemm fit-tank tal-fjuwil tiegħek.  

Jekk qed tippjana li tidħol jew toħroġ mill-UE b’€10,000 fi flus kontanti (jew l-ekwivalenti tagħhom f’muniti oħra) trid tiddikjarahom lill-awtoritajiet doganali fil-pajjiż tal-UE li tkun dieħel jew ħiereġ, billi tuża l-formola tad-dikjarazzjoni tal-flus kontanti tal-UE. Jekk ma tissottomettix dikjarazzjoni ta’ flus kontanti jew id-dikjarazzjoni ta’ flus kontanti ma tkunx korretta jew kompluta, tkun soġġett għal penali. 

Għal aktar informazzjoni 

X'tista' tieħu miegħek meta tivvjaġġa fl-UE? 

Xiri fl-UE

Formola tad-dikjarazzjoni ta’ flus kontanti tal-UE 

Siti web doganali nazzjonali 

Drittijiet tal-passiġġieri fl-UE 

Assigurazzjoni tas-saħħa waqt li tivvjaġġa fl-UE 

Meta tivvjaġġa bl-annimali tad-dar tiegħek fl-Ewropa 

Network taċ-Ċentri Ewropej tal-Konsumaturi 

L-Ivvjaġġar fl-Ewropa 2024