Ħarsa ġenerali
F’Diċembru 2025, Il-Kummissjoni Ewropea nediet sejħa għal proposti biex tappoġġa l-proġetti li jgħaqqdu ġenerazzjonijiet differenti permezz tat-tema tal-litteriżmu medjatiku fil-Bulgarija, ir-Rumanija, il-Greċja u Ċipru.
Intgħażlu erba’ proġetti biex jgħinu jżidu l-litteriżmu medjatiku u jibnu l-fiduċja interġenerazzjonali fil-komunitajiet rurali u fil-bliet żgħar, li jlaqqgħu flimkien ġenerazzjonijiet differenti fi spazji lokali fdati bħal libreriji, ċentri kulturali u ġonna tal-komunità.
Proġetti magħżula
B’finanzjament ta’ €50,000 kull wieħed fuq perjodu ta’ 8 xhur, l-erba’ inizjattivi se jippromwovu d-djalogu, l-iżvilupp tal-ħiliet u r-reżiljenza demokratika fi żmien ta’ bidla soċjali rapida. Il-ftehimiet ta’ għotja ġew iffirmati u l-proġetti diġà qed jiġu implimentati.
- Il-Bulgarija
Foundation Together se torganizza skambji ta’ ħiliet u diskussjonijiet ċiviċi fiċ-Chitalishte lokali f’Parvenets, li se jgħinu biex titħejja t-triq għal pjattaforma tal-media komunitarja.
- Ir-Rumanija
CEPEC.ONG se tgħaqqad lin-nies madwar il-muniċipalitajiet rurali ta’ Bran, Moieciu, Cheia u Peștera permezz ta’ workshops interġenerazzjonali, ġnien tal-komunità u teatru forum.
- Il-Greċja
L-Università tal-Jonju se tiggwida lill-parteċipanti fil-gżira ta’ Kefalonia biex joħolqu teatru tad-dellijiet dwar temi tal-litteriżmu medjatiku, li se jibbaża fuq it-tradizzjoni lokali u se jikkontribwixxi għaliha.
- Ċipru
CARDET se tipproduċi radjudramm interġenerazzjonali f’Paralimni li se jesplora temi tal-litteriżmu medjatiku, b’siltiet li aktar tard se jinqalbu f’sound trail aċċessibbli bil-QR fil-librerija lokali.
Sfond
L-applikazzjonijiet għal din is-sejħa fetħu fit-12 ta’ Diċembru 2025 u għalqu fis-6 ta’ Frar 2026.
Il-proġetti magħżula jridu jitwettqu f’żoni rurali u fi bliet żgħar u ta’ daqs medju b’popolazzjoni ta’ 50,000 jew inqas.
Kull proġett irid jinvolvi b’mod attiv mill-inqas żewġ gruppi demografiċi primarji minn tlieta (tfal u żgħażagħ taħt l-età ta’ 25 sena, adulti (25–64), u persuni akbar fl-età (65 u aktar)) f’attivitajiet konġunti sinifikattivi dwar it-tema tal-litteriżmu medjatiku fi spazju lokali fdat.
L-ispazji lokali fdati huma ambjenti f’komunità fejn il-membri tal-komunità jħossuhom sikuri u rispettati, u fejn jistgħu jiltaqgħu b’mod komdu, jinvolvu ruħhom flimkien u jiddiskutu suġġetti differenti. Dawn jistgħu jkunu aċċessibbli għall-pubbliku (eż. librerija jew ċentru tal-komunità), jew semipubbliċi (eż. dar għall-kura residenzjali, skola) dment li l-ispazju lokali fdat ikun jista’ jiffaċilita l-bini tal-fiduċja u l-konnessjoni soċjali fost il-parteċipanti tiegħu.
Għal aktar dettalji dwar l-eliġibbiltà u rekwiżiti oħra għal din is-sejħa magħluqa, jekk jogħġbok ara d-dokumenti ta’ hawn taħt.