Jum l-Ewropa

Jum l-Ewropa 2025

Fl-10 ta’ Mejju ta’ din is-sena fil-Kummissjoni Ewropea ftaħna l-bibien tagħna u lqajna aktar minn 17,000 ruħ fil-kwartieri ġenerali tagħna fil-binja Berlaymont fi Brussell. Dan l-avveniment offra lill-viżitaturi l-opportunità li jagħtu daqqa t’għajn wara l-kwinti u stedinhom jieħdu sehem f’varjetà ta’ attivitajiet differenti. 

Dawn kienu jikkonsistu f’logħob edukattiv, sfidi kreattivi, sensiela ta’ stands tematiċi li kienu jispjegaw il-ħidma tal-Kummissjoni, u programm ta’ divertiment bi spettakli live. Il-viżitaturi kellhom ukoll l-opportunità li jiltaqgħu mat-timijiet tal-Europe Direct u jesploraw il-wirja interattiva Experience Europe. 

Dwar Jum l-Ewropa

Jum l-Ewropa għandu l-għeruq tiegħu fid-9 ta’ Mejju 1950. Dakinhar, il-Ministru tal-Affarijiet Barranin Franċiż Robert Schuman għamel diskors storiku li eventwalment wassal għall-ħolqien tal-Komunità Ewropea tal-Faħam u l-Azzar.  

Id-diskors li għamel dakinhar, li huwa magħruf bħala d-Dikjarazzjoni ta’ Schuman, illum jitqies b’mod ġenerali bħala d-data tat-twelid tal-Unjoni Ewropea. Fih ippreżenta pjan għal kooperazzjoni aktar profonda fl-Ewropa. Dan il-pjan kien ibbażat fuq il-prinċipji fundamentali tal-paċi u s-solidarjetà u kellu jitwettaq bl-integrazzjoni tal-industriji tal-faħam u l-azzar tal-Ewropa tal-Punent. 

Hekk twieled Jum l-Ewropa u miegħu ċelebrazzjoni annwali li l-istituzzjonijiet tal-UE jimmarkaw billi jiftħu l-bibien tagħhom għall-viżitaturi.