Oifig an Ionchúisitheora Phoiblí Eorpaigh (OIPE)

Misean

Is oifig ionchúisimh phoiblí neamhspleách dhíláraithe an Aontais Eorpaigh í Oifig an Ionchúisitheora Phoiblí Eorpaigh (www.eppo.europa.eu) lena ngabhann an inniúlacht chun coireanna i gcoinne bhuiséad an Aontais a imscrúdú, a ionchúiseamh agus a thabhairt chun breithiúnais, cuir i gcás calaois, éilliú nó calaois thromchúiseach trasteorann CBL. An Rialachán lena mbunaítear Oifig an Ionchúisitheora Phoiblí Eorpaigh faoi chomhar feabhsaithe, glacadh é an 12 Deireadh Fómhair 2017 agus tháinig sé i bhfeidhm an 20 Deireadh Fómhair 2017. Faoi láthair, tá 22 thír den Aontas rannpháirteach.

San am i láthair, is iad na húdaráis náisiúnta amháin atá in ann calaois i gcoinne bhuiséad an Aontais a imscrúdú agus a ionchúiseamh. Ach níl cumhacht ar bith acu lasmuigh dá dteorainneacha féin. Comhlachtaí de chuid an Aontais atá ann cheana, cuir i gcás Eurojust, Europol agus Oifig Frith-Chalaoise an Aontais, níl na cumhachtaí is gá acu chun imscrúduithe coiriúla a dhéanamh ná iad a ionchúiseamh.

Struchtúr agus saintréithe

Tá Oifig an Ionchúisitheora Phoiblí Eorpaigh á cur ar bun faoi láthair, agus is é an aidhm atá ann go mbeidh sí feidhmiúil i mí an Mhárta 2021. Is i Lucsamburg atá Oifig an Ionchúisitheora Phoiblí Eorpaigh lonnaithe.

Feidhmeoidh Oifig an Ionchúisitheora Phoiblí Eorpaigh mar aon oifig amháin ar fud na dtíortha go léir den Aontas atá rannpháirteach inti, agus tabharfaidh sí le chéile iarrachtaí Eorpacha agus iarrachtaí náisiúnta forfheidhmithe dlí trí chur chuige aontaithe, éifeachtúil, gan uaim. Tógfar Oifig an Ionchúisitheora Phoiblí Eorpaigh ar dhá leibhéal: an leibhéal lárnach agus an leibhéal náisiúnta. Beidh an leibhéal lárnach comhdhéanta den Phríomh-Ionchúisitheoir Eorpach, beirt Ionadaithe, 22 Ionchúisitheoir Eorpacha (ceann amháin in aghaidh na tíre rannpháirtí den Aontas), beirt díobh sin ina gcáil mar Ionadaí an Phríomh-Ionchúisitheora Eorpaigh agus Ionadaí an Stiúrthóra Riaracháin. Beidh an leibhéal díláraithe comhdhéanta d’Ionchúisitheoirí Tarmligthe Eorpacha a bheidh lonnaithe sna tíortha den Aontas atá rannpháirteach. Déanfaidh an leibhéal lárnach maoirseacht ar na himscrúduithe agus na hionchúisimh a dhéanfar ar an leibhéal náisiúnta. Mar riail bhunaidh, is iad na hIonchúisitheoirí Tarmligthe Eorpacha a dhéanfaidh coireanna a imscrúdú agus a ionchúiseamh ina dtír féin.

Cinnteofar cearta na ndaoine atá faoi dhrochamhras agus na daoine a bhfuil coir curtha ina leith trí choimircí cuimsitheacha nós imeachta, iad bunaithe ar dhlí an Aontais agus ar an dlí náisiúnta atá ann cheana. Déanfaidh Oifig an Ionchúisitheora Phoiblí Eorpaigh deimhin de go ndéanfaidh gníomhaíochtaí na hoifige na cearta faoi ráthaíocht na Cairte um Chearta Bunúsacha san Aontas a urramú, an ceart chun triail chóir a fháil agus an ceart chun cosanta san áireamh. Gníomhartha nós imeachta Oifig an Ionchúisitheora Phoiblí Eorpaigh, beidh siad faoi réir athbhreithniú breithiúnach ag na cúirteanna náisiúnta. Trí réamhrialuithe, tá cumhachtaí iarmharacha ag Cúirt Bhreithiúnais an Aontais chun cur chun feidhme comhsheasmhach dhlí an Aontais a chinntiú.

Treoir CLA

Amhail ón 6 Iúil 2019, ní mór Treoir (AE) 2017/1371 maidir leis an gcomhrac in aghaidh na calaoise ar leasanna airgeadais an Aontais trí bhíthin an dlí choiriúil a bheith trasuite ag na Ballstáit ina ndlíthe náisiúnta (‘Treoir CLA’). Leis na rialacha nua, méadófar leibhéal cosanta bhuiséad an Aontas trí shainmhínithe, smachtbhannaí agus tréimhsí teorann a chomhchuibhiú maidir le coireanna coiriúla a dhéanann difear do leasanna airgeadais an Aontais. Is ionstraim fhíor-riachtanach í an Treoir maidir le dlí coiriúil na mBallstát a chomhchuibhiú i réimse coireanna i gcoinne bhuiséad an Aontais ach, sa bhreis air sin, leagtar síos inti an bhunsraith d'Oifig an Ionchúisitheora Phoiblí Eorpaigh amach anseo, ar oifig í a dhéanfaidh na coireanna a imscrúdú, a ionchúiseamh agus a fhorfheidhmiú sa chleachtas.