Miżuri kontra l-frodi tal-UE

L-Uffiċċju Ewropew Kontra l-Frodi (OLAF)

L-użu mhux xieraq tal-fondi pprovduti mill-baġit tal-UE jew l-evażjoni tat-taxxi, id-dazji u l-imposti, li jiffinanzjaw il-baġit tal-UE, jagħmlu ħsara diretta liċ-ċittadini Ewropej. L-Uffiċċju Ewropew Kontra l-Frodi jinvestiga l-frodi fil-baġit tal-UE, il-korruzzjoni u l-imġiba ħażina serja fi ħdan l-istituzzjonijiet Ewropej, u jiżviluppa politika kontra l-frodi.

L-OLAF jagħmel parti mill-Kummissjoni Ewropea, iżda għandu indipendenza operazzjonali. Huwa jirċievi informazzjoni dwar frodi u irregolaritajiet possibbli li jaffettwaw l-interessi finanzjarji tal-UE minn firxa wiesgħa ta’ sorsi, u jista’ jinvestiga kwistjonijiet relatati mal-frodi, il-korruzzjoni u reati oħra li jikkonċernaw:

• in-nefqa kollha tal-UE: il-kategoriji prinċipali ta’ nefqa huma l-Fondi Strutturali, il-fondi tal-politika agrikola u l-iżvilupp rurali, in-nefqa diretta u l-għajnuna esterna;
• xi oqsma ta’ dħul tal-UE, l-aktar id-dazji tad-dwana;
• is-suspetti ta’ mġiba ħażina serja mill-persunal tal-UE u minn membri tal-Istituzzjonijiet tal-UE.

Irrapporta frodi

Is-Sistema ta’ Identifikazzjoni Bikrija u ta’ Esklużjoni (EDES)

Is-Sistema ta’ Identifikazzjoni Bikrija u ta’ Esklużjoni hija s-sistema stabbilita mill-Kummissjoni fl-2016 biex issaħħaħ il-protezzjoni tal-interessi finanzjarji tal-Unjoni u biex tiżgura ġestjoni finanzjarja tajba.

Hi tieħu post is-Sistema ta’ Twissija Bikrija u l-Bażi tad-Data Ċentrali dwar l-Esklużjoni. Ir-regoli tal-EDES huma applikabbli għall-kuntratti, l-għotjiet, il-ftehimiet, il-premjijiet, l-istrumenti finanzjarji u l-esperti remunerati kollha, kif ukoll għall-implimentazzjoni tal-baġit taħt ġestjoni indiretta.

L-għan tagħha huwa li tipproteġi l-interessi finanzjarji tal-Unjoni fir-rigward ta’ operaturi ekonomiċi mhux affidabbli billi tidentifikahom u teskludihom milli jirċievu fondi, u billi timponi penali finanzjarji fuqhom. Ir-raġunijiet għall-esklużjoni jikkonċernaw:

• sitwazzjonijiet ta’ falliment u insolvenza
• nuqqas ta’ ħlas ta’ taxxi jew kontribuzzjonijiet tas-sigurtà soċjali
• kondotta professjonali ħażina serja
• frodi, korruzzjoni, parteċipazzjoni f’organizzazzjoni kriminali eċċ.
• ksur serju tal-kuntratt
• irregolarità
• entitajiet maħluqa bl-intenzjoni li jevitaw obbligi fiskali, soċjali jew obbligi legali oħra (ħolqien ta’ kumpaniji fittizji).

Il-bażi tad-data tal-EDES hija stabbilita u operata mill-Kummissjoni, u l-informazzjoni dwar l-identifikazzjoni bikrija jew l-esklużjoni u/jew il-penali finanzjarja hija pprovduta mill-Kummissjoni, l-aġenziji eżekuttivi tagħha, istituzzjonijiet oħra, korpi jew uffiċċji Ewropej.