An Bhliain Eorpach um Scileanna 2023

Borradh a chur faoin iomaíochas, faoin rannpháirtíocht agus faoin tallann

Lucht saothair a bhfuil na scileanna acu atá ar éileamh, cuireann sé leis an bhfás inbhuanaithe freisin, rud a fhágann go mbíonn níos mó nuálaíochta ann agus cuireann sé feabhas ar iomaíochas na gcuideachtaí. Cuideoidh an Bhliain Eorpach um Scileanna 2023 le cuideachtaí, go háirithe fiontair bheaga agus mheánmhéide, aghaidh a thabhairt ar ghanntanas scileanna san Aontas. Cuirfidh sé meon athscilithe agus uas-scilithe chun cinn, rud a chuideoidh le daoine na scileanna cearta a fháil le haghaidh poist ardcháilíochta. 

Leis an aistriú glas agus leis an aistriú digiteach, tá deiseanna nua á gcur ar fáil do dhaoine agus do gheilleagar an Aontais.

Beidh deiseanna fostaíochta níos fearr ag oibrithe oilte agus glacfaidh siad páirt iomlán sa tsochaí. Tá sé sin ríthábhachtach chun a chinntiú go mbeidh an téarnamh eacnamaíoch cothrom agus cóir go sóisialta, chomh maith leis an aistriú glas agus leis an aistriú digiteach.

Ugach úr don fhoghlaim ar feadh an tsaoil

Leis an mBliain Eorpach um Scileanna, beidh ugach úr ann chun spriocanna sóisialta 2030 an Aontais a bhaint amach, is é sin 60% ar a laghad de dhaoine fásta a bheith faoi oiliúint gach bliain, agus 78% ar a laghad a bheith ag obair. 

Cuideoidh an tionscnamh freisin le spriocanna 2030 an Chompáis Dhigitigh a bhaint amach, is é sin 80% ar a laghad de dhaoine fásta a bhfuil bunscileanna digiteacha acu agus 20 milliún saineolaí TFC a bheith ag obair san Aontas. 

San am i láthair, tuairiscíonn níos mó ná trí cheathrú de na cuideachtaí san Aontas go mbíonn deacrachtaí acu oibrithe a aimsiú a bhfuil na scileanna riachtanacha acu, agus ní thugann ach 37% de dhaoine fásta faoi oiliúint ar bhonn rialta. 

Léirítear san Innéacs um an nGeilleagar Digiteach agus an tSochaí Dhigiteach nach bhfuil bunscileanna digiteacha ag ceathrar as gach deichniúr fásta ná ag gach tríú duine a oibríonn san Eoraip. Tá mná faoi ghannionadaíocht i ngairmeacha agus i léann a bhaineann leis an teicneolaíocht; bean is ea duine amháin as gach cúigear speisialtóirí TFC, agus bean is ea duine amháin as gach triúr céimithe san eolaíocht, sa teicneolaíocht, san innealtóireacht agus sa mhatamaitic (ETIM).

An dóigh a mbainfimid an méid sin amach

Agus muid ag obair i gcomhar le Parlaimint na hEorpa, na Ballstáit, comhpháirtithe sóisialta, seirbhísí fostaíochta, comhlachais tráchtála agus tionscail, soláthraithe oideachais agus oiliúna, oibrithe agus cuideachtaí, molaimid dlús a chur le forbairt scileanna ar an láthair.  

Cuirfidh an Coimisiún béim ar thionscnaimh ábhartha agus ar mhaoiniú ábhartha ón Aontas, chun tacú lena nglacadh, lena gcur chun feidhme agus lena gcur i gcrích ar an láthair. Beidh imeachtaí agus feachtais ardaithe feasachta ann chun tacú le foghlaim fhrithpháirteach na gcomhpháirtithe maidir le huas-sciliú agus athsciliú.

Díreofar go speisialta ar níos mó daoine a ghníomhachtú don mhargadh saothair, go háirithe mná agus daoine óga, agus go speisialta iad siúd nach bhfuil i mbun oideachais, fostaíochta ná oiliúna.
 

Tionscnaimh de chuid an Aontais chun tacú le forbairt scileanna

I gcás na Bliana Eorpaí um Scileanna, cuirfidh an tAontas leis an iliomad tionscnamh atá ar siúl faoi láthair, lena n-áirítear:

• Is é an Clár Oibre Scileanna don Eoraip an creat le haghaidh comhair i mbeartas scileanna an Aontais agus leanfaidh sé de bheith ag cuidiú le daoine aonair agus le gnólachtaí scileanna a fhorbairt agus a chur i bhfeidhm.
• An Comhshocrú um Scileanna, ina bhfuil 1,000 ball agus 14 chomhpháirtíocht mhórscála in earnálacha straitéiseacha, tá gealltanais ann go gcuideofar chun suas le 6 mhilliún duine a uas-sciliú.
• Leis na Moltaí ón gComhairle maidir le Cuntais Foghlama Aonair agus Micridhintiúir, cuidítear le daoine a gcuid scileanna a nuashonrú nó a chur i gcrích ar bhealach níos solúbtha agus níos spriocdhírithe.
• Téann Comhghuaillíocht an Aontais um Scileanna Digiteacha agus Poist i ngleic leis an mbearna scileanna digiteacha trí na comhpháirtithe ábhartha uile a thabhairt le chéile chun feasacht a mhúscailt agus chun an oiliúint a spreagadh chun borradh a chur faoi scileanna digiteacha.
• Leis an Ardán Eorpach um Scileanna Digiteacha agus Poist Dhigiteacha a seoladh faoin tSaoráid um Chónascadh na hEorpa, cuirtear eolas agus acmhainní ar fáil maidir le scileanna digiteacha, amhail uirlis féinmheasúnaithe.
• San Idirphlé Struchtúrtha le Ballstáit an Aontais maidir leis an Oideachas Digiteach agus Scileanna, pléitear an dóigh chun teicneolaíochtaí digiteacha nua a thabhairt isteach san oideachais agus chun cuidiú le scileanna digiteacha a fheabhsú.
• Sa Chlár Oibre Nua Eorpach um Nuálaíocht, moltar tionscnamh suaitheanta agus sraith gníomhaíochtaí chun na creatdálaí cearta a chruthú dár gcuid buanna.
• Moltar roinnt gníomhaíochtaí sa straitéis Eorpach um ollscoileanna chun scileanna ardleibhéil a fhorbairt a bheidh slán i bhfad na haimsire do raon leathan foghlaimeoirí, foghlaimeoirí ar feadh an tsaoil ina measc.
• Le feidhmiú céimneach Linn Tallann an Aontais agus Comhpháirtíochtaí Tallainne le tríú comhpháirtithe roghnaithe, cuideofar chun scileanna na n-iarrthóirí a mheaitseáil le riachtanais mhargadh an tsaothair san Eoraip.

Maoiniú ón Aontas Eorpach le haghaidh Scileanna

Tá maoiniú suntasach agus tacaíocht theicniúil shuntasach ón Aontas ar fáil chun tacú le hinfheistíocht san uas-sciliú agus san athsciliú:

• Is é Ciste Sóisialta na hEorpa Plus (CSE+), ag a bhfuil buiséad níos mó ná €99 mbilliún le haghaidh 2021-2027, príomhionstraim an Aontais chun infheistíocht a dhéanamh sna daoine.
• Leis an tSaoráid Téarnaimh agus Athléimneachta, is féidir tacú le hathchóirithe agus infheistíochtaí na mBallstát, i réimse na scileanna agus na bpost ina measc. 
• Le €580 milliún an Chláir don Eoraip Dhigiteach, cuirtear maoiniú ar fáil chun ardscileanna digiteacha a fhorbairt agus chun tacú le linn tallann saineolaithe digiteacha a fhorbairt.
• Is bonn agus is taca í Fís Eorpach do scileanna taighdeoirí, fiontraithe agus nuálaithe, go háirithe trína Gníomhaíochtaí Marie Skłodowska-Curie, an Chomhairle Nuálaíochta Eorpach agus an Institiúid Eorpach um Theicneolaíocht.
• Tacaíonn Erasmus+, ag a bhfuil buiséad €26.2 billiún, le forbairt phearsanta agus ghairmiúil foghlaimeoirí, ball foirne agus institiúidí gairmoideachais agus gairmoiliúna, agus maoiníonn sé Ollscoileanna Eorpacha chomh maith.

An scéala is déanaí

• An Tallann san Eoraip a chur chun tairbhe: borradh nua faoi Réigiúin an Aontais
• Imirce lucht oibre: an Coimisiún agus na Ballstáit ag cur feabhas ar an gcomhar chun dul i ngleic le ganntanais i margadh saothair an Aontais
• Tréimhsí oiliúna: Anailís déanta ag meastóireacht an Choimisiúin ar thionchar an Chreata Cáilíochta Eorpaigh
• Preaseisiúint: Tús curtha ag an gCoimisiún leis an obair ar an mBliain Eorpach um Scileanna
• Preaseisiúint: Leathnaítear an Comhshocrú um Scileanna go 1 000 comhalta agus comóradh á dhéanamh ar dhá bhliain an chomhshocraithe

Doiciméid