An dara grinn-athbhreithniú ar réimsí straitéiseacha i ndáil le leasanna na hEorpa

An 23 Feabhra 2022 chuir an Coimisiún Eorpach an dara grinnanailís ar spleáchais straitéiseacha na hEorpa i láthair. Dírítear san anailís sin ar chúig réimse ina mbíonn an Eoraip ag brath níos mó agus níos mó ar thríú tíortha, agus is é is aidhm don anailís tuiscint níos fearr a fhorbairt maidir leis na rioscaí agus leis na deiseanna chun aghaidh a thabhairt ar na spleáchais sin.

Tearc-chré agus maignéisiam

Na príomh-shaincheisteanna

• Tá an tAontas ag brath go mór ar an tSín chun rochtain a fháil ar mhaignéisiam agus ar thearc-chré. Déanann an tSín 93% de tháirgeadh domhanda na maighnéad tearc-chré agus 89% de mhaignéisiam.
• Tá méadú ag teacht ar éileamh an Aontais ar na hamhábhair sin. Faoi 2030, d’fhéadfadh méadú faoi dhó a bheith ann ar riachtanais an Aontais do mhaighnéid bhuana tearc-chré go dtí 40,000 tona in aghaidh na bliana, ó 18,000 tona in 2019.

Ceimiceáin

Na príomh-shaincheisteanna

• Tá roinnt spleáchais léirithe ag an Eoraip ar líon teoranta tríú tíortha chun rochtain a fháil ar roinnt ceimiceán. Tá tábhacht straitéiseach ar leith le roinnt acu, amhail iaidín, fluairín, fosfar dearg, ocsaíd litiam agus hiodrocsaíd, dé-ocsaíd mholaibdéineam agus tungstáit.
• Is easpórtálaithe tábhachtacha iad na tíortha Eoráiseacha (e.g. an Chasacstáin, an Rúis, an tSín) chuig an Aontas le haghaidh na gceimiceán straitéiseach sin a sainaithníodh.
• Baineann réimse leathan úsáidí deiridh leis na ceimiceáin sin, mar chuid de shlabhraí soláthair agus luacha, e.g. stóráil fuinnimh, táirgeadh bia, táirgeadh leathsheoltóirí a úsáidtear i ngrianphainéil agus táirgeadh ceallraí leictreacha le haghaidh feithiclí.

Grianphainéil

Na príomh-shaincheisteanna

Tá éileamh ollmhór ar ghiniúint grianfhuinnimh de dhíth ar an gComhaontú Glas don Eoraip: tá gá le méadú faoi dheich faoi 2050.

Is ceannairí domhanda iad cuideachtaí an Aontais i roinnt deighleoga iartheachtacha den slabhra luacha FV gréine. Mar sin féin, tá spleáchais straitéiseacha thábhachtacha roimh an Aontas sna deighleoga monaraíochta réamhtheachtacha:

• Is ag an tSín atá 96% de tháirgeadh domhanda na sliseog gréine.
• 1% de tháirgeadh domhanda na sliseog gréine, 0.4% de ghrianchealla agus 2-3% de mhodúil atá ag cuideachtaí an Aontais.

Bhí tionchar tromchúiseach ag imeachtaí a tharla ar fud an domhain le déanaí ar iompórtáil agus ar imscaradh na bpainéal FV gréine san Aontas: Rinneadh 20-25% de thionscadail ghréine an Aontais a chur ar athlá nó a chur ar ceal in 2021.

Tionscnamh Gréine na hEorpa, atá faoi threoir phríobháideach, díríonn sé ar mhéadú tháirgeadh fótavoltach bliantúil an Aontais go dtí 20 GW faoi 2025.

An Chibearshlándáil

Na príomh-shaincheisteanna

Cé gur ceannródaí é an tAontas i dtaighde cibearshlándála domhanda, tá an tAontas chun deiridh ó thaobh na nuálaíochta cibearshlándála agus na n-infheistíochtaí príobháideacha de.

• Níl ceanncheathrú san Aontas ach ag 14% de na 500 cuideachta cibearshlándála is mó ar domhan.
• Formhór na gcrua-earraí agus na mbogearraí atá in úsáid faoi láthair san Aontas le haghaidh na cibearchosanta, is sna Stáit Aontaithe a fhorbraítear iad agus is sa tSín a mhonaraítear iad.
• An formhór de chuideachtaí cibearshlándála an Aontais, is micreachuideachtaí nó cuideachtaí beaga iad a bhíonn ag brath ar thríú páirtithe.

Bogearraí TF néalríomhaireachta agus imeall-ríomhaireachta

Na príomh-shaincheisteanna

• I margadh na dteicneolaíochtaí den chineál sin tá líon teoranta soláthraithe néalríomhaireachta domhanda nach den Aontas iad. D’fhéadfadh rioscaí a bheith ann don Aontas mar thoradh air sin, rioscaí a d’fhéadfadh teacht as cur isteach ar néalseirbhís eachtrach, as éifeacht ghlasála d’úsáideoirí Eorpacha, nó as rochtain neamhdhleathach ar shonraí i gcás ina ndéanfaí reachtaíocht tríú tíortha is infheidhme a chur chun feidhme nó a mhodhnú ar bhealach iomarcach.
• Is fiú €5.9 billiún margadh néalríomhaireachta na hEorpa. Mhéadaigh a luach faoi thrí idir 2017 agus 2020. Mar sin féin, tháinig laghdú ar an sciar den mhargadh atá ag soláthraithe néalríomhaireachta an Aontais ó 26% in 2017 go dtí 16% in 2020.