I gcomhthéacs an nuashonraithe ar an Straitéis maidir le Tionsclaíocht, rinne an Coimisiún Eorpach grinn-athbhreithnithe ar roinnt réimsí a d’fhéadfaí a mheas gur réimsí straitéiseacha iad i ndáil le leasanna na hEorpa. Sna hathbhreithnithe sin déantar anailís ar charachtar na spleáchas straitéiseach a d’fhéadfadh a bheith ann, ar an tionchar a bheadh acu agus ar na freagairtí beartais ábhartha, cuid acu atá ar bun cheana féin. Níor cheart na measúnuithe sin a mheas mar anailís uileghabhálach ar spleáchais straitéiseacha uile an Aontais a d’fhéadfadh a bheith ann, ach mar chéim thosaigh measúnuithe a bhaineann le roinnt réimsí tábhachtacha.
Is cuid dár saol laethúil iad miotail agus mianraí. Le haistriú thionsclaíocht na hEorpa chuig an aeráidneodracht, tá baol ann go dtiocfaidh spleáchais ar amhábhair neamhfhuinnimh in áit an spleáchais ar bhreoslaí iontaise atá ann faoi láthair. Is rud bunúsach í an rochtain ar acmhainní le haghaidh thionsclaíocht uile an Aontais agus is cuid lárnach í d’uaillmhian na hEorpa an Comhaontú Glas a bhaint amach agus claochlú digiteach gheilleagar an Aontais a chinntiú.
Ós rud é nach dtáirgeann an tAontas na hamhábhair ar fad a bhfuil gá leo chun an t-éileamh a shásamh, tá iomaíocht dhomhanda roimh thionsclaíocht an Aontais maidir le rochtain ar amhábhair.
Shainaithin an Coimisiún 30 amhábhar criticiúil ar liosta 2020 na nAmhábhar Criticiúil. Is amhábhair iad sin atá an-tábhachtach ó thaobh an gheilleagair de agus a bhfuil ardriosca soláthair ag baint leo.
Úsáidtear dúil tearc-chré i maighnéid a bhogann gluaisteáin leictreacha agus a chuireann tuirbíní gaoithe ag obair.
Baineann gailliam agus indiam le teicneolaíocht na ndé-óidí astaithe solais (LED) i lampaí.
Úsáidtear miotal sileacóin i leathsheoltóirí.
Teastaíonn miotail de chuid an ghrúpa platanaim i mbreosla-chealla hidrigine agus i leictrealóirí.
Bíonn roinnt teicneolaíochtaí agus earnálacha straitéiseacha ag brath ar rochtain ar amhábhair chriticiúla
Is as tíortha sonracha a thagann an mhórchuid den soláthar domhanda i dtaca le hamhábhar áirithe
- Is ón tSín a thagann 98% de sholáthar dúl tearc-chré an Aontais
- Is ó Türkiye a thagann 98% de sholáthar bóráite an Aontais
- Is ón Afraic Theas a thagann 71% de riachtanais phlatanaim an Aontais
- Is gnólachtaí aonair a sholáthraíonn haifniam agus strointiam don Aontas
Tá níos mó ná 70% den táirgeadh domhanda i dtaca le cóbalt, dúil tearc-chré agus tungstan faoi réir srianta easpórtála.
Beidh ilmhéadú ar an éileamh ar phríomh-amhábhair i réimsí na bhfoinsí in-athnuaite fuinnimh agus na leictrea-shoghluaisteachta ó 2030 go 2050
Le Plean Gníomhaíochta 2020 maidir le hAmhábhair Chriticiúla, leag an tAontas gníomhaíochtaí éagsúla amach chun tacú le slabhra soláthair amhábhar atá athléimneach a fhorbairt. Chun slándáil acmhainní a bhaint amach tá soláthar éagsúlaithe ó fhoinsí príomha agus tánaisteacha araon ag teastáil, mar aon le spleáchais laghdaithe agus éifeachtúlacht agus ciorclaíocht acmhainní fheabhsaithe, agus dearadh táirgí inbhuanaithe san áireamh leis sin. I measc na bpríomhghníomhaíochtaí atá ar siúl ag an gCoimisiún tá:
An Chomhghuaillíocht Eorpach Amhábhair
Bunaíodh an Chomhghuaillíocht in 2020 agus is éard is aidhm dó slabhra soláthair amhábhar atá athléimneach a thógáil, le béim ar leith ar mhaighnéid agus mótair thearc-chré. Chuige sin, tá tionscadail infheistíochta de chuid na mBallstát agus na hearnála tionsclaíochta sainaitheanta cheana féin ag an gComhghuaillíocht chun tacú leis an méadú ar tháirgeadh maighnéad tearc-chré san Aontas.
Gníomhaíochtaí eile chun tacú le tionscadail amhábhar
- Dhá Thionscadal Thábhachtacha ar mhaithe le Leas na hEorpa i gCoitinne (IPCEI) a bhaineann leis an slabhra luacha ceallraí
- Deiseanna infheistíochta faoin tSaoráid Téarnaimh agus Athléimneachta
- €300 milliún le haghaidh taighde agus nuálaíocht maidir le hamhábhair faoin gclár Fís Eorpach
- Comhpháirtíochtaí idirnáisiúnta straitéiseacha chun soláthar amhábhar criticiúil atá éagsúlaithe inbhuanaithe a chinntiú
- Tacú leis an tsamhail ghnó ‘táirge mar sheirbhís’ chun athchúrsáil agus athúsáid amhábhar a dhreasú
- Amhábhair a rianú leis an teicneolaíocht, ceanglais chomhchuibhithe maidir le sonraí
- An próiseas ceadaithe a fheabhsú chun intuarthacht a chinntiú agus chun ardchaighdeáin chomhshaoil a choinneáil ar bun
- Prionsabail maidir le hamhábhair inbhuanaithe san Aontas a fhorbairt
Tá táirgí leighis ríthábhachtach don tsochaí. A bhuí leo, bíonn roghanna teiripeacha ar fáil maidir le galair a dhiagnóisiú, a chóireáil agus a chosc agus tá siad tábhachtach chun aghaidh a thabhairt ar bhagairtí ar an tsláinte phoiblí, ina measc sin paindéim COVID-19 agus aon phaindéim eile a bheidh ann amach anseo. Sa chomhthéacs seo, ní mór a chinntiú go bhfuil rochtain ag saoránaigh ar chógais leighis shábháilte éifeachtacha atá ar ardchaighdeán agus ar phraghas inacmhainne. Léiríonn an anailís a rinneamar, áfach, go bhfuil an chosúlacht ann go bhfuil an tAontas ag brath ar shlabhraí soláthair eachtracha maidir le roinnt soláthairtí agus táirgí san éiceachóras sláinte.
Mar gheall ar an gcastacht a bhaineann le slabhraí soláthair cógaisíochta, tá bristeacha féideartha rompu, bristeacha a d’fhéadfadh teacht chun cinn feadh an tslabhra soláthair laistigh den Aontas agus lasmuigh de. D’fhéadfadh sé gurb é atá i gceist leo díospóidí trádála, cibirionsaithe, stoc-charnadh neamhchomhordaithe, srianta easpórtála, bristeacha lóistíochta, dúnadh láithreán nó timpistí ar an láthair, mar aon le neamhchomhlíontacht na ndea-chleachtas déantúsaíochta.
Tá slabhra soláthair na cógaisíochta anois ar cheann de na slabhraí soláthair is comhtháite ar domhan. Go háirithe, tá táirgeadh na gcomhábhar gníomhach cógaisíochta (APInna) cineálach comhchruinnithe go mór i réigiúin áirithe. Ina theannta sin, tá treocht ag dul i méid maidir le táirgeadh na APInna cineálacha a bheith á chomhchruinniú san India agus sa tSín.
Sciar den luach táirgthe domhanda maidir le APInna cineálacha (2015)
- 66% i Réigiún an Aigéin Chiúin agus na hÁise (an India agus an tSín)
- 24% san Aontas Eorpach
- 3% i Meiriceá Thuaidh
- 7% sa chuid eile den domhan
Tá acmhainneacht táirgthe láidir ag an Aontas. Mar sin féin, níl sé sách soiléir a mhéid a bhíonn an tAontas ag brath ar an acmhainneacht i dtíortha nach bhfuil san Aontas i dtaca leis na próisis agus an t-ionchur a bhíonn ag teastáil chun APInna a dhéanamh. Ní mór táirgí criticiúla a shainiú atá ábhartha ó thaobh na sláinte poiblí de, táirgí nach bhfuil a dhóthain acmhainneachta ag an Aontas iad a tháirgeadh. Chun aghaidh a thabhairt air sin, tá an tionscnamh seo a leanas curtha ar bun ag an gCoimisiún:
Idirphlé struchtúrtha ar shlándáil an tsoláthair cógas leighis
Mar a fógraíodh sa Straitéis Chógaisíochta don Eoraip, tá idirphlé struchtúrtha curtha ar bun ag an gCoimisiún leis na gníomhaithe poiblí agus príobháideacha ábhartha a bhíonn ag plé le slabhra soláthair na cógaisíochta ar mhaithe leis na rudaí seo a leanas a bhaint amach:
- Ar an gcéad dul síos. tuiscint níos fearr a fháil ar na leochaileachtaí agus ar na spleáchais a d’fhéadfadh a bheith ann, agus
- Ar an dara dul síos, bearta a dhéanamh chun athléimneacht shlabhraí soláthair na cógaisíochta a neartú agus chun slándáil an tsoláthair cógas leighis d’othair san Aontas a chinntiú
Is cuid lárnach iad ceallraí den phlean maidir le claochlú glas agus digiteach an Aontais a chur i gcrích. Tá siad ríthábhachtach chun uaillmhian an Chomhaontaithe Ghlais don Eoraip a bhaint amach, is é sin go mbeidh an tAontas aeráidneodrach faoi 2050. Cuidíonn siad le gnólachtaí freisin ionas go mbeidh siad ina gceannródaithe domhanda in earnáil na dtáirgí agus na dteicneolaíochtaí glana. Tá tábhacht ar leith ag baint le ceallraí maidir le feithiclí leictreacha a tháirgeadh. Tá méadú ag teacht ar an úsáid a bhaintear astu chun fuinneamh a stóráil agus i bhfeidhmeanna tionsclaíocha eile ar nós innealra, uirlisí cumhachta nó forcardaitheoirí.
Cé go bhfuil teicneolaíochtaí ceallra éagsúla ann, is cuid lárnach den iliomad cineálacha ceallraí é ian litiam mar gheall go bhfuil feidhmíocht níos fearr aige i gcomparáid le teicneolaíochtaí ceallra éagsúla atá aibí agus seanbhunaithe.
An acmhainneacht táirgthe dhomhanda maidir le cealla ceallraí ian litiam in 2018
Na tosca cumasúcháin chun acmhainneacht táirgthe a mhéadú
|
Is féidir le ceallraí ian litiam 300% níos mó fuinnimh a stóráil i gcomparáid le 1991 | Laghdú costais (USD 1100/kWh in 2010 -> USD 156/kWh in 2019) |
---|---|---|
Tá tuar ann go dtiocfaidh méadú ar an éileamh domhanda ó 90 gigeavatuair (GWh) in 2016 go 4,000 GWh faoi 2040 | Meastar go sroichfidh éileamh na hEorpa 400 GWh faoi 2028 |
Na príomh-shaincheisteanna
Ní tháirgeann an tAontas ach 1% de na hamhábhair ceallraí ar fad. Chun riachtanais na n-earnálacha soghluaisteachta agus stórála fuinnimh a chumhdach, tá an méid seo a leanas de dhíth ar an Aontas:
- 7-18 n-uaire níos mó litiam faoi 2030
- 2-5 huaire níos mó cóbailt faoi 2030
- 16-57 n-uaire níos mó litiam faoi 2050
- 3-15 huaire níos mó cóbailt faoi 2050
- Is ón Áise a thagann 84% d’ábhair agus comhpháirteanna próiseáilte
- Is ón Aontas Eorpach a thagann 8-9% d’ábhair agus comhpháirteanna próiseáilte
- Fógraíodh roinnt infheistíochtaí in ábhair ceallraí san Aontas, ach tá infheistíochtaí breise ag teastáil
I bhfianaise na tábhachta a bhaineann le ceallraí ian litiam, ghlac an Coimisiún Plean Gníomhaíochta Straitéiseach chun slabhra luacha Eorpach a fhorbairt. Mar fhreagairt air sin, rinneadh infheistíochtaí poiblí agus príobháideacha a shlógadh ar scála le blianta beaga anuas, trí na tionscnaimh seo a leanas:
An Chomhghuaillíocht Eorpach Ceallraí
Seoladh an Chomhghuaillíocht Eorpach Ceallraí in 2017 agus is tacú í le forbairt slabhra luacha ceallraí san Eoraip atá nuálach iomaíoch inbhuanaithe. Go háirithe, is cuidiú é chun aghaidh a thabhairt ar an easpa acmhainneachta san Aontas i dtaca le déantúsaíocht ceallraí. Is iad seo a leanas na torthaí a mheastar a bheidh ann:
- 15 ghigeamhonarcha ar a laghad a thógáil san Aontas faoi 2025
- Cealla ceallraí a sholáthar faoi 2025 a d’fhéadfadh sé mhilliún gluaisteán leictreach a chumhachtú (360 GWh)
D’fhéadfadh an Eoraip a bheith ar an dara déantóir ceall ian litiam is mó faoi 2024. D’fhéadfadh an sciar atá againn den acmhainneacht táirgthe dhomhanda a mhéadú go 14.7% faoi 2024 agus go 16.6% faoi 2029, i gcomparáid le 5.9% in 2019.
Infheistíochtaí foriomlána
Leictrea-shoghluaisteacht |
€60 billiún d’infheistíochtaí i slabhra luacha na leictrea-shoghluaisteachta san Eoraip in 2019 amháin, ar infheistíochtaí príobháideacha iad den chuid is mó |
= 3.5 uair níos mó ná an tSín |
Taighde |
Thart ar €270 milliún ó chláir thaighde an Aontais idir 2019-2020 |
€925 mhilliún beartaithe le haghaidh na Comhpháirtíochta Eorpaí nua um Shlabhra Luacha na gCeallraí Tionsclaíocha faoin gclár Fís Eorpach |
Tionscadal Thábhachtacha ar mhaithe le Leas na hEorpa i gCoitinne (IPCEI). |
An chéad deontas IPCEI: €3.2 billiún i státchabhair, agus meastar go ndéanfaidh an méid sin €5 bhilliún breise d’infheistíochtaí san earnáil phríobháideach a ghiaráil |
An dara deontas IPCEI: €2.9 billiún i státchabhair, agus meastar go mbeidh €9 mbilliún breise ann d’infheistíochtaí san earnáil phríobháideach |
Tionscnaimh eile atá ar siúl
- Creat reachtach nua maidir le ceallraí le teacht i bhfeidhm, ar dócha gur in 2022 a thiocfaidh sé i bhfeidhm
- Athléimneacht shlabhraí luacha na n-amhábhar criticiúil san Aontas a neartú
- Cur chun feidhme éifeachtach an mhaoinithe ón gclár Fís Eorpach le haghaidh taighde ceallraí a chinntiú
- Lucht saothair Eorpach a fhorbairt atá oilte in ábhar na gceallraí
Beidh ról lárnach ag hidrigin in-athnuaite nó hidrigin ísealcharbóin agus aghaidh á tabhairt ar na dúshláin chriticiúla atá nasctha le dícharbónú agus iomaíochas thionsclaíocht an Aontais. Is ceannródaí teicneolaíochta é an tAontas i roinnt teicneolaíochtaí hidrigine glaine agus is déantóirí Eorpacha iad leath na ndéantóirí leictrealóirí. Bíonn an Eoraip ag brath ar iompórtáil na n-amhábhar, áfach, le haghaidh príomh-chomhpháirteanna agus le haghaidh an tsoláthair fuinnimh in-athnuaite.
Tá réimse leathan feidhmeanna ag hidrigin ar fud na n-éiceachóras, cuir i gcás tionscail cheimiceacha agus scagtha, ach in earnáil na soghluaisteachta, na stórála fuinnimh agus an téimh freisin. Tá ardluach fuinnimh aige in aghaidh an aonaid, rud a fhágann go bhfuil sé oiriúnach d’iompar trom, cuir i gcás. Ní mór é a ‘eastóscadh’ ar dtús áfach ar chostas fuinnimh – ó ghás nádúrtha nó trí leictrealú uisce.
Méadú spriocdhírithe ar acmhainneacht na leictrealóirí in-athnuaite
An chonair céim ar chéim i dtreo éiceachóras hidrigine Eorpach
- Ón lá inniu go dtí 2024
Cuirfimid tacaíocht ar fáil chun ar a laghad 6 ghigeavata de leictrealóirí hidrigine inathnuaite a shuiteáil san Aontas agus suas le milliún tonna de hidrigin inathnuaite a tháirgeadh.
- 2025 - 2030
Is gá go mbeidh hidrigin ina dlúthchuid dár gcóras fuinnimh comhtháite, agus go mbeidh ar a laghad 40 gigeavata de leictrealóirí hidrigine inathnuaite san Aontas, sin agus go ndéanfar suas le 10 milliún tonna de hidrigin inathnuaite a tháirgeadh
- 2030
Ó 2030 ar aghaidh, cuirfear hidrigin inathnuaite chun úsáide ar mhórscála i ngach earnáil atá deacair a dhícharbónú
Chun na príomhearnálacha a dhícharbónú (cuir i gcás an chruach, ceimiceáin nó an t-iompar trom), tá gá le soláthar mór iontaofa hidrigine glaine. Má tá easpa soláthair hidrigine in-athnuaite agus hidrigine ísealcharbóin sa ghearrthéarma agus easpa bonneagair ann, d’fhéadfadh sé sin moill a chur ar chinntí infheistíochta iartheachtacha.
- Tá nasc 80-120 GW d’acmhainneacht táirgthe fuinnimh gréine agus gaoithe ag teastáil chun an leictreachas is gá a sholáthar faoi 2030.
Bíonn an tAontas ag brath ar iompórtálacha amhábhar le haghaidh príomh-chomhpháirteanna a theastaíonn ón ngeilleagar hidrigine (cuir i gcás leictrealóirí agus breosla-chealla).
- Teastaíonn thart ar 30 amhábhar chun breosla-chealla, leictrealóirí agus teicneolaíochtaí stórála hidrigine a tháirgeadh. Aicmítear 13 cinn acu siúd mar amhábhair chriticiúla.
- An Chomhghuaillíocht Eorpach don Hidrigin Ghlan: Chuir an Coimisiún an Chomhghuaillíocht Eorpach don Hidrigin Ghlan ar bun, mar a fógraíodh sa Straitéis maidir le Tionsclaíocht, mí an Mhárta 2020. Tá sé i mbun píblíne infheistíochta agus tionscadal a chur ar fáil lena ndéanfar Straitéis Hidrigine an Aontais a chur chun feidhme.
- Maoiniú ón Aontas. Is féidir le roinnt clár cuidiú chun slabhra luacha hidrigine a fhorbairt, ina measc sin an Chomhpháirtíocht don Hidrigin Ghlan a bheidh ann amach anseo faoin gclár Fís Eorpach, an Ciste don Nuálaíocht, an tSaoráid um Chónascadh na hEorpa, Ciste Forbraíochta Réigiúnaí na hEorpa agus an Ciste um Aistriú Cóir.
- IPCEInna. Tá plé ar siúl faoi láthair a bhfuil roinnt Ballstát páirteach ann maidir le ceapadh IPCEI féideartha amháin nó níos mó.
- Comhar le tíortha nach bhfuil san Aontas. Beidh comhar domhanda maidir le taighde agus nuálaíocht ríthábhachtach i dtaca le teacht chun cinn margaidh dhomhanda atá riailbhunaithe, mar aon le caighdeáin agus sainmhínithe maidir leis an hidrigin ghlan.
- Spleáchais. Tá gníomhaíochtaí i réimse na n-amhábhar ar siúl faoi láthair faoin bplean gníomhaíochta um Amhábhair agus faoin gComhghuaillíocht Eorpach Amhábhar chun spleáchais a theorannú a mhéid a bhaineann le breosla-chealla agus leictrealóirí.
Cumhachtaíonn leathsheoltóirí na gléasanna cliste agus na seirbhísí a úsáidimid gach lá. Cuireann siad ar chumas na bpríomhthionscal a bheith nuálach agus dul san iomaíocht ar an leibhéal domhanda ionas gur féidir leis an Eoraip na próiseálaithe is cumhachtaí a dhearadh agus a tháirgeadh. Mar sin féin, tá acmhainneacht táirgthe theoranta, costais arda iontrála agus easpa chothrom na Féinne ag bagairt ar chumas an Aontais na deiseanna a bhaineann leis an gclaochlú digiteach a thapú go hiomlán.
An ganntanas a bhí ann i dtionscal na ngluaisteán le déanaí, is léiriú é sin ar na dúshláin atá roimh an Aontas. Is iad slisíní leathsheoltóra bunchlocha gach táirge dhigitigh agus gach seirbhíse digití. Tá siad leabaithe i ngluaisteáin, aerárthaí, trealamh leighis, gutháin phóca, líonraí agus sár-ríomhairí.
Na príomh-shaincheisteanna
Sa lá atá inniu ann d’fhéadfadh costas chomh hard le €1 bhilliún a bheith ag baint leis na sliseanna is sofaisticiúla a dhearadh agus a fhorbairt. Bíonn suas le €20 billiún d’infheistíocht ag teastáil ó mhonarcha dhéantúsaíochta cheannródaíoch. In 2020 ní raibh ach dhá dhéantúsóir ag táirgeadh na sliseanna is sofaisticiúla: TSMC (an Téaváin) agus Samsung (An Chóiré Theas).
Bíonn an tAontas Eorpach ag brath go mór ar na Stáit Aontaithe ó thaobh uirlisí deartha ginearálta de agus ar an Áise ó thaobh déantúsaíocht sliseanna sofaisticiúla de.
Déanann teannas geopholaitiúil agus easpa chothrom na Féinne dochar don iomaíocht sa réimse seo. Bíonn fóirdheontais ollmhóra i gceist le forbairt agus déantúsaíocht na sliseanna agus is ag dul i méid atá an treocht sin.
An sciar den ioncam domhanda atá ag an Aontas, tá sé ag thart ar 10% ar an iomlán agus ag thart ar 6% i gcás na ndeighleog a bhaineann leis an ríomhaireacht agus an chumarsáid.
- Teicneolaíochtaí a threisiú. Is gá go ndíreoidh gníomhaíochtaí agus tionscnaimh chomhpháirteacha Eorpacha go mór ar acmhainní a atógáil i bpróiseálaithe agus i dteicneolaíochtaí leathsheoltóra atá ríthábhachtach ionas go gcumasófaí próiseáil sonraí atá cumhachtach agus fuinneamhéifeachtúil, mar aon le cumarsáid, bonneagar agus an iliomad feidhmeanna a bhaineann leis an Intleacht Shaorga.
- Iarracht Eorpach chomhpháirteach. I mí na Nollag 2020 chomhaontaigh líon mór Ballstát i ndearbhú comhpháirteach go n-oibreoidh siad le chéile chun an t-éiceachóras a neartú agus chun an láithreacht thionsclaíoch a mhéadú feadh an tslabhra soláthair.
- Comhghuaillíocht maidir le próiseálaithe agus teicneolaíochtaí leathsheoltóirí. Tá seoladh na Comhghuaillíochta seo á ullmhú ag an gCoimisiún chun raon leathan páirtithe leasmhara a thabhairt le chéile. Beidh an chomhghuaillíocht ina cuidiú chun príomhchuspóirí beartais an Aontais a bhaint amach i réimse na micrileictreonaice.
- An tSaoráid Téarnaimh agus Athléimneachta. Tá leathsheoltóirí i measc na réimsí a sainaithníodh i dtaca le hinfheistíocht a bhaineann leis an tSaoráid Téarnaimh agus Athléimneachta i gcomhréir le rialacha an Aontais maidir le Státchabhair. Ba cheart go mbeidh 20% de phleananna Téarnaimh agus Athléimneachta na hEorpa dírithe ar an aistriú digiteach.
- Creat rialála. Ceannach gnólachtaí ar thug an tAontas agus na Ballstáit tacaíocht airgeadais dóibh, d’imir sé sin tionchar ar an earnáil. Leis an Rialachán maidir le Scagadh Infheistíochta Dírí Eachtraí, ar Rialachán de chuid an Aontais é, tugtar an deis measúnú a dhéanamh ar na rioscaí a bhaineann le hinfheistíochtaí eachtracha don tslándáil agus don ord poiblí. Sa Rialachán nua atá beartaithe maidir le fóirdheontais eachtracha a shaobhann an margadh aonair, tá uirlis nua beartaithe maidir le measúnú a dhéanamh ar shaobhadh ar chothrom na Féinne sa mhargadh aonair, saobhadh arb iad fóirdheontais arna ndeonú ag rialtais eachtracha is cúis leis.
- Athléimneacht slabhraí soláthair. Le meascán comhleanúnach beartas tionsclaíochta, taighde agus trádála, is féidir próiseas an éagsúlaithe go foinsí soláthair malartacha a éascú agus na slabhraí soláthair atá ann cheana a neartú trí chomhpháirtíocht agus comhar le comhpháirtithe domhanda.
Sócmhainn straitéiseach le haghaidh gach eagraíochta is ea iad sonraí. Bíonn teicneolaíochtaí ar nós na hIntleachta Saorga, Idirlíon na Rudaí Nithiúla agus 5G/6G in ann feidhmiú a bhuí le teicneolaíochtaí néalríomhaireachta. Is teicneolaíocht chumasúcháin straitéiseach lárnach iad le haghaidh todhchaí ghlas dhigiteach thionscail an Aontais agus na hearnála poiblí. Tá nideog uathúil ag an Eoraip sna deich mbliana atá romhainn chun a cuid teicneolaíochtaí próiseála sonraí a neartú trí leas a bhaint as na hathruithe atá le teacht, go háirithe na hathruithe a bhaineann leis imeall-ríomhaireacht.
Cuireann teicneolaíochtaí néil stóráil agus próiseáil sonraí ar fáil, ar seirbhísí ar éileamh, solúbtha agus níos saoire iad. Feidhmíonn siad in ionaid sonraí láraithe, i saoráidí dáilte nó ar ghléasanna nasctha atá gar don úsáideoir (imeall-ríomhaireacht). Neart seirbhísí a úsáideann gnólachtaí, údaráis riaracháin phoiblí agus saoránaigh gach lá, is bunaithe ar an imeall-ríomhaireacht atá siad.
Deiseanna le haghaidh neamhspleáchas an Aontais
Meastar gur ar an imeall a phróiseálfar na sonraí uile a ghintear faoi 2025, agus níl aon ghníomhaí ceannasach margaidh ann faoi láthair
Is deis mhór é an fás láidir i seirbhísí bogearraí le haghaidh soláthraithe Eorpacha chun an seasamh atá acu a dhaingniú
Is deis ar leith iad líonraí 5G agus an ríomhaireacht ilnéil (uirlis maolaithe riosca)
D'ainneoin fás éigin le blianta beaga anuas, tá an úsáid a bhaintear as néalseirbhísí san Aontas fós íseal. De réir shonraí Eurostat, cé go bhfuil feabhas ann i gcomparáid le 2018, níor úsáid ach 36% d’fhiontair an Aontais néalseirbhísí in 2020, agus is le haghaidh seirbhísí simplí a úsáideadh iad den chuid is mó, ar nós ríomhphoist agus stóráil comhad.
An soláthraí néalríomhaireachta is mó san Aontas, níl aige ach níos lú ná 1% den ioncam iomlán a ghintear sa mhargadh Eorpach. I gcomparáid leis sin, is breis agus 80% den ioncam domhanda in 2021 atá ag na ceithre cheannaire dhomhanda (Amazon Web Services, Microsoft Azure, Google Cloud agus Alibaba Cloud). Mar gheall ar an seasamh atá ag na hollghnólachtaí sa mhargadh agus an scála ar a bhfuil siad ag feidhmiú, is beag luach atá ann d’iomaitheoirí eile dul isteach sa mhargadh agus cuireann sé cosc ar cheannairí Eorpacha teach chun cinn.
Is measa an scéal sin mar gheall ar bhearna san infheistíocht idir an méid a infheistíonn na Stáit Aontaithe agus an tSín sa néal agus an méid a infheistíonn an tAontas Eorpach ann, bearna a mheastar ag €11 bhilliún in aghaidh na bliana.
I gcleachtas, tá féidearthacht an-teoranta ag úsáideoirí néalríomhaireachta aistriú idir soláthraithe seirbhíse néalríomhaireachta éagsúla, nó fiú ní ann don fhéidearthacht sin ar chor ar bith. Ina theannta sin, cuireann siad na hábhair imní atá acu in iúl maidir le néalseirbhísí eachtracha a úsáid ar chúiseanna a bhaineann le cosaint sonraí pearsanta, an chibearshlándáil agus ceisteanna faoin dlí is infheidhme.
- Comhghuaillíocht Nua um Shonraí Tionsclaíochta, an tImeall agus an Néal. Tá seoladh na Comhghuaillíochta seo á ullmhú ag an gCoimisiún chun raon leathan páirtithe leasmhara a thabhairt le chéile, le cuidiú chun seasamh tionsclaíoch na hEorpa a neartú i margadh domhanda na néalríomhaireachta agus na himeall-ríomhaireachta, agus aghaidh á tabhairt go háirithe ar an treocht maidir le méadú ar dháileadh agus dílárú na n-acmhainneachtaí próiseála sonraí, agus ar an ngá atá le héiceachóras néalríomhaireachta a chumasú atá cónasctha agus il-oiriúnach ó thaobh díoltóirí de.
- Infheistíochtaí an Aontais i gcónaidhm néalríomhaireachta Eorpach. Is í an uaillmhian atá againn comhinfheistíocht a dhéanamh i spásanna sonraí Eorpacha agus i gcónaidhm néalríomhaireachta Eorpach le haghaidh na tréimhse 2021-2027. Seolfar infheistíochtaí an Aontais Eorpaigh tríd an gClár don Eoraip Dhigiteach, an tSaoráid um Chónascadh na hEorpa 2 agus Fís Eorpach.
- Infheistíochtaí príobháideacha agus náisiúnta. I mí Dheireadh Fómhair 2020. shínigh na Ballstáit uile Dearbhú comhpháirteach agus chomhaontaigh siad oibriú le chéile chun na hacmhainneachtaí atá ann faoi láthair a uasghrádú, chun an chéad ghlúin eile den néalríomhaireacht a mhúnlú agus chun úsáid seirbhísí néalríomhaireachta a spreagadh ar fud an Aontais. Beidh an tSaoráid Téarnaimh agus Athléimneachta (mar chuid de NextGenerationEU) ina cainéal tábhachtach le haghaidh infheistíochtaí na mBallstát.
- Tionscadal Tábhachtach ar mhaithe le Leas na hEorpa i gCoitinne (IPCEI). Tá próiseas seolta ag roinnt Ballstát chun IPCEI féideartha a ullmhú i gcomhar, ar tionscadal é ina ndírítear ar bhonneagar agus seirbhísí néalríomhaireachta agus imeall-ríomhaireachta na chéad ghlúine eile.
Doiciméid