Volkswagen
Wara l-iskandlu tad-Dieselgate, fis-7 ta’ Settembru 2017, l-awtoritajiet tas-CPC bagħtu ittra lill-Grupp Volkswagen, fejn ħeġġew lill-grupp biex isewwi malajr il-karozzi kollha affettwati. F’Diċembru 2017, Volkswagen impenjat ruħha li tkompli toffri tiswijiet mingħajr ħlas fl-2018. F’Lulju 2018, il-Kummissjoni Ewropea u l-awtoritajiet nazzjonali tal-konsumaturi ppubblikaw il-konklużjonijiet tagħhom dwar it-8.5 miljun karozza manufatturati fl-Unjoni mill-grupp Volkswagen wara d-Dieselgate. L-awtoritajiet laqgħu l-isforz tal-Grupp VW biex tinbena l-fiduċja fis-sejħa lura kif ukoll it-titjib sinifikanti fl-informazzjoni mogħtija lill-konsumaturi. Ir-rata ta’ tiswija issa qed tilħaq it-80% u l-Grupp impenja ruħu li jkompli l-aġġornament bla ħlas sa tmiem l-2020. Il-Kummissjoni u l-awtoritajiet tal-konsumaturi madanakollu ddispjaċihom li l-kumpanija ma setgħetx tagħti garanzija sħiħa u ċara f’każ ta’ problemi wara t-tiswija.
Fil-11 ta’ Awwissu 2020, il-Kummissarju għall-Ġustizzja u l-Konsumaturi Didier Reynders kiteb lill-Grupp Volkswagen biex iħeġġeġ bil-qawwa lill-grupp joffri kumpens ġust lill-konsumaturi kollha affettwati tal-UE, filwaqt li enfasizza li l-konsumaturi jistennew li jiġu ttrattati b’mod ġust u jirċievu kumpens adegwat għad-dannu li ġarrbu b’mod simili fl-Unjoni kollha.
Wara s-sentenza tal-Qorti Ewropea tal-Ġustizzja, l-awtoritajiet tas-CPC, ikkoordinati mill-Kummissjoni Ewropea, ħarġu dikjarazzjoni fit-28 ta’ Settembru 2021 li fiha kkonkludew li l-prattiki kummerċjali ta’ Volkswagen fir-rigward tal-kummerċjalizzazzjoni ta’ karozzi diżil mgħammra b’sistemi illegali ta’ manipulazzjoni tal-gass tal-egżost kisru l-liġi tal-UE dwar il-protezzjoni tal-konsumatur. L-awtoritajiet talbu lill-kumpanija ssib soluzzjonijiet xierqa għall-konsumaturi tal-UE li jfittxu rimedju f’diversi kawżi fl-UE kollha, biex jiġu evitati snin ta’ litigazzjoni ulterjuri. S’issa, VW qablet biss li tikkumpensa lill-konsumaturi tal-UE residenti fil-Ġermanja fiż-żmien tax-xiri tal-karozzi. Bi tweġiba għal dan, VW qalet lill-Kummissjoni u lill-awtoritajiet tas-CPC li hija qieset li pagamenti volontarji lill-konsumaturi residenti barra mill-Ġermanja mhumiex ġustifikati peress li l-karozzi affettwati issa nbidlu biex jissodisfaw ir-rekwiżiti legali. Il-pożizzjoni tal-kumpanija ma nbidlitx minkejja d-deċiżjonijiet riċenti tal-UE u tal-qrati nazzjonali.
Stqarrija għall-istampa 17/07/2018