Spjegazzjoni tal-Att dwar l-Industrija b’Emissjonijiet Żero Netti
L-Att dwar l-Industrija b’Emissjonijiet Żero Netti hu inizjattiva li ġejja mill-Pjan Industrijali tal-Patt Ekoloġiku li għandu l-għan li jżid il-manifattura ta’ teknoloġiji nodfa fl-UE. Dan ifisser li tiżdied il-kapaċità tal-manifattura tal-UE tat-teknoloġiji li jappoġġjaw it-tranżizzjoni lejn enerġija nadifa u jirrilaxxaw emissjonijiet ta’ gassijiet serra estremament baxxi, żero jew negattivi meta joperaw.
Dan l-Att se jattira l-investimenti u joħloq kundizzjonijiet aħjar u aċċess għas-suq għal teknoloġija nadifa fl-UE. L-għan hu li sal-2030 il-kapaċità ta’ manifattura ġenerali tat-teknoloġiji strateġiċi b’emissjonijiet żero netti toqrob jew tilħaq mill-inqas 40% tal-ħtiġijiet tal-użu tal-Unjoni. Dan se jaċċellera l-progress lejn il-miri tal-UE għall-klima u l-enerġija għall-2030 u t-tranżizzjoni lejn in-newtralità klimatika sal-2050. Se jagħti spinta wkoll lill-kompetittività tal-industrija tal-UE, joħloq impjiegi ta’ kwalità, u jappoġġja l-isforzi tal-UE biex issir indipendenti fl-enerġija.
L-Att jissimplifika wkoll il-qafas regolatorju għall-manifattura ta’ dawn it-teknoloġiji. Dan se jgħin biex tiżdied il-kompetittività tal-industrija tat-teknoloġija b’emissjonijiet żero netti fl-Ewropa u se jaċċellera wkoll il-kapaċità li jinħażnu l-emissjonijiet tas-CO2.
L-Att jindirizza teknoloġiji li se jagħtu kontribut sinifikanti għad-dekarbonizzazzjoni. Hu jappoġġja, b’mod partikolari, teknoloġiji strateġiċi b’emissjonijiet żero netti li huma disponibbli kummerċjalment u li għandhom potenzjal tajjeb għal espansjoni rapida. Teknoloġiji bħal dawn isaħħu l-kompetittività industrijali u r-reżiljenza tas-sistema tal-enerġija tal-UE filwaqt li jippermettu t-tranżizzjoni lejn enerġija nadifa.
Fis-6 ta’ Frar 2024, il-Parlament Ewropew u l-Kunsill laħqu ftehim politiku dwar l-Att dwar l-Industrija b’Emissjonijiet Żero Netti. Ladarba jiġi adottat formalment, l-Att jidħol fis-seħħ.
Teknoloġiji ewlenin
Teknoloġiji b’emissjonijiet żero netti oħra huma appoġġjati wkoll mill-miżuri fl-att, inklużi teknoloġiji sostenibbli ta’ fjuwils alternattivi, teknoloġiji avvanzati għall-produzzjoni tal-enerġija minn proċessi nukleari bi skart minimu miċ-ċiklu tal-fjuwil, reatturi modulari żgħar, u fjuwils tal-aħjar kwalità relatati.
Il-ħolqien tal-kundizzjonijiet għal settur tat-teknoloġija nadifa tal-UE mar-ritmu tax-xejriet globali
Sabiex jiġi stimulat l-investiment f’teknoloġiji b’emissjonijiet żero netti, l-Att jipproponi:
- Proġetti Strateġiċi b’Emissjonijiet Żero Netti: l-identifikazzjoni ta’ proġetti prijoritarji essenzjali għat-tisħiħ tar-reżiljenza u l-kompetittività tal-industrija b’emissjonijiet żero netti tal-UE
- Tnaqqis tal-burokrazija u tħaffif tal-permessi: it-tnaqqis tal-piż amministrattiv għall-iżvilupp ta’ proġetti ta’ manifattura b’emissjonijiet żero netti u proċeduri ta’ għoti ta’ permessi aktar sempliċi u aktar rapidi. Dan huwa partikolarment għal proġetti strateġiċi li se jibbenefikaw minn permessi saħansitra aktar rapidi, biex tiżdied iċ-ċertezza tal-ippjanar u tal-investiment.
- Kapaċità ta’ injezzjoni ta’ CO2: l-appoġġ għal proġetti ta’ qbid u ħżin tal-karbonju, notevolment bit-titjib tad-disponibbiltà ta’ siti għall-ħżin tas-CO2
- Attrazzjoni tal-investiment: l-attrazzjoni tal-investiment permezz tal-Pjattaforma Net-Zero Europe u l-Bank Ewropew tal-Idroġenu
- Faċilitar tal-aċċess għas-swieq: spinta lid-domanda għas-sorsi ta’ enerġija rinnovabbli bl-implimentazzjoni ta’ kriterji ta’ sostenibbiltà u reżiljenza fil-proċeduri tal-akkwist u fl-irkanti
- Innovazzjoni: l-istabbiliment ta’ ambjenti ta’ esperimentazzjoni regolatorja biex jgħinu fl-iżvilupp u l-ittestjar ta’ teknoloġiji innovattivi b’emissjonijiet żero netti u joħolqu kundizzjonijiet ekwi għall-innovazzjoni
- Titjib tal-ħiliet: l-istabbiliment ta’ Akkademji tal-Industrija b’Emissjonijiet Żero Netti, bl-appoġġ u s-sorveljanza mill-Pjattaforma Net-Zero Europe. Dawn se jipprovdu taħriġ u edukazzjoni dwar teknoloġiji b’emissjonijiet żero netti, u jwasslu għall-ħolqien ta’ impjiegi ta’ kwalità.
Il-Pjattaforma Net-Zero Europe
Il-Pjattaforma Net-Zero Europe se tgħin biex tissorvelja l-miżuri kollha skont l-Att. Din se tlaqqa’ flimkien il-Kummissjoni Ewropea u l-Istati Membri, biex jikkoordinaw u jiddiskutu l-azzjonijiet proposti. Rappreżentanti tal-industrija u esperti oħra jistgħu jiġu mistiedna fil-Pjattaforma.
Il-Bank Ewropew tal-Idroġenu
L-Idroġenu hu wieħed mit-teknoloġiji ewlenin tal-Att Ewropew dwar l-Industrija b’Emissjonijiet Żero Netti. Huwa indispensabbli li l-industrija Ewropea tiġi dekarbonizzata u li jintlaħqu l-miri klimatiċi tal-UE għall-2030 u n-newtralità klimatika sal-2050. Jekk inżidu l-produzzjoni tal-idroġenu, inkunu nistgħu nnaqqsu l-użu tal-fjuwils fossili fl-industriji Ewropej u naqdu l-ħtiġijiet tas-setturi li diffiċli jiġu elettrifikati.
Il-Bank Ewropew tal-Idroġenu se jappoġġja l-użu tal-idroġenu rinnovabbli fl-UE kif ukoll l-importazzjonijiet mis-sħab internazzjonali. Għandu l-għan li jisfrutta l-investimenti privati fil-ktajjen tal-valur tal-idroġenu billi jgħaqqad b’mod effiċjenti l-provvista tal-enerġija rinnovabbli mad-domanda u jindirizza l-isfidi inizjali tal-investiment.
Il-Bank se joħloq suq emerġenti tal-idroġenu Ewropew, joffri opportunitajiet ġodda ta’ tkabbir u l-ħolqien ta’ impjiegi ta’ kwalità u jgħin biex jintlaħqu l-għanijiet tal-UE b’rabta mal-idroġenu, f’konformità mar-REPowerEU u mat-triq lejn in-newtralità klimatika.
L-ewwel irkanti pilota se jitnedew taħt il-Fond għall-Innovazzjoni fil-ħarifa tal-2023 li jappoġġja l-produzzjoni tal-idroġenu rinnovabbli. Dan jibgħat sinjal ċar li l-Ewropa hija l-post tal-produzzjoni tal-idroġenu.
Sfond
L-UE impenjat ruħha li tikseb in-newtralità klimatika sal-2050, iżda bħalissa hija importatur nett ta’ diversi teknoloġiji u komponenti b’emissjonijiet żero netti li huma kruċjali biex jintlaħaq dan l-objettiv. Għalhekk, il-Kummissjoni pproponiet l-Att dwar l-Industrija b’Emissjonijiet Żero Nett bħala parti mill-Pjan Industrijali tal-Patt Ekoloġiku biex tiżgura li t-tranżizzjoni ekoloġika ma titpoġġiex f’riskju minn dipendenzi strateġiċi. Bl-istabbiliment ta’ objettiv aggregat tal-kapaċità tal-manifattura għall-2030 u s-simplifikazzjoni tal-qafas regolatorju għal teknoloġiji b’emissjonijiet żero netti, l-Att se jippermetti lill-UE ssir mexxejja industrijali f’dan is-suq. Filwaqt li jislet mit-tagħlimiet tal-pandemija tal-COVID-19 u mill-kriżi tal-enerġija, l-Att se jiżgura li l-ktajjen tal-provvista ma jibqgħux iħabbtu wiċċhom ma’ tfixkil u li t-tranżizzjoni lejn enerġija nadifa tkun sostnuta mill-kapaċità tal-manifattura domestika li hija meħtieġa.