L-Istrument għall-Appoġġ ta’ Emerġenza (ESI) ġie attivat fl-2020 fl-istadju bikri tal-kriżi tal-COVID-19. L-għan tiegħu kien li jgħin lill-Istati Membri jirrispondu għall-pandemija tal-coronavirus billi jindirizza l-ħtiġijiet b’mod strateġiku u kkoordinat fil-livell Ewropew u kien fis-seħħ sa Jannar 2022.
Trasport ta’ oġġetti essenzjali, timijiet mediċi u pazjenti
Parti mill-finanzjament totali tal-Istrument għall-Appoġġ ta’ Emerġenza ġie allokat għall-Pakkett dwar il-Mobbiltà, li pprovda appoġġ:
Għat-trasport ta’ oġġetti mediċi lejn fejn kienu l-aktar meħtieġa, billi ġie ffinanzjat it-trasport tal-merkanzija ta’ oġġetti ta’ assistenza u ta’ sokkors lejn u bejn l-Istati Membri tal-UE.
Għat-trasferiment ta’ pazjenti bejn l-Istati Membri tal-UE jew mill-Istati Membri lejn pajjiżi ġirien. Dan ippermetta l-użu ta’ kapaċità żejda u taffa mill-pressjoni fuq is-servizzi tas-saħħa li kienu jinsabu f’riskju li ma jlaħħqux. Żgura wkoll it-trattament għall-akbar numru ta’ pazjenti possibbli.
Għat-trasport ta’ staff mediku u ta’ timijiet mediċi mobbli bejn l-Istati Membri tal-UE u fl-UE minn pajjiżi ġirien oħrajn, biex jgħinu lin-nies kull fejn l-assistenza medika kienet meħtieġa l-aktar.
Din l-opportunità ta’ finanzjament addizzjonali kienet miżjuda mal-appoġġ diġà disponibbli permezz tal-Mekkaniżmu tal-UE għall-Protezzjoni Ċivili u l-kunsinni ta’ tagħmir protettiv permezz tar-rescEU.
Matul l-attivazzjoni tal-ESI, il-Kummissjoni allokat aktar minn €164 miljun għal vjeġġi ta’ merkanzija ta’ oġġetti mediċi, tagħmir relatat mat-tilqim, u terapiji, kif ukoll €9 miljun għat-trasport ta’ timijiet mediċi u trasferimenti tal-pazjenti.
B’mod ġenerali, din l-assistenza appoġġjat aktar minn 2,000 operazzjoni bl-ajru, bl-art u bil-baħar. Dawn ittrasportaw tagħmir protettiv personali li jsalva l-ħajja, u tagħmir mediku lejn l-Ewropa kif ukoll 515-il ħaddiem tas-saħħa u 135 pazjent.
Robots UV għad-diżinfezzjoni tal-isptarijiet fl-Ewropa kollha
Il-Kummissjoni għamlet disponibbli €12-il miljun mill-Istrument għall-Appoġġ ta’ Emerġenza biex tagħti donazzjoni ta’ 305 robots ta’ diżinfezzjoni UV lill-isptarijiet f'27 Stat Membru. Ir-robots jiddiżinfettaw kamra tal-pazjenti ta’ daqs standard malajr u b’mod sikur. Billi jagħmlu dan, jgħinu biex tittaffa l-pressjoni fuq l-istaff tal-isptar filwaqt li joffru lill-pazjenti protezzjoni akbar kontra l-infezzjoni mill-patoġeni.
Taħriġ tal-professjonisti tal-kura tas-saħħa fil-ħiliet tal-kura intensiva
Il-Kummissjoni Ewropea għamlet €2.5 miljun disponibbli taħt l-Istrument għall-Appoġġ ta’ Emerġenza għat-taħriġ ta’ ġabra multidixxiplinari ta’ professjonisti fil-kura tas-saħħa biex jappoġġjaw u jassistu l-Unitajiet tal-Kura Intensiva. Il-programm dam għaddej 8 xhur u ħarreġ 17,000 tabib u infermier f’700 sptar fl-UE kollha. Hu pprovda ħiliet ta’ kura medika intensiva lill-professjonisti tal-kura tas-saħħa li ma jaħdmux b'mod regolari fl-Unitajiet tal-Kura Intensiva. Dan għin biex tiżdied id-disponibbiltà tal-istaff li jista’ jiġi stazzjonat fi żmien meta kien hemm bżonn li l-kapaċità fl-Unitajiet tal-Kura Intensiva tiżdied malajr, b’mod temporanju u sinifikanti.
Ċertifikat COVID Diġitali tal-UE
Ir-Regolament dwar iċ-Ċertifikat COVID Diġitali tal-UE ġie introdott fl-1 ta’ Lulju 2021. Diġà fis-17 ta’ Marzu 2021, il-Kummissjoni Ewropea ppreżentat proposta biex jinħoloq Ċertifikat COVID Diġitali tal-UE biex jiffaċilita l-moviment liberu sikur taċ-ċittadini fl-UE matul il-pandemija. Fis-27 ta’ Settembru 2021 il-Kummissjoni tat għotjiet lil 20 Stat Membru li jammontaw għal €95 miljun biex jinxtraw testijiet dijanjostiċi tal-COVID-19 biex jiffaċilitaw it-twassil taċ-Ċertifikat COVID Diġitali tal-UE.
Niżguraw l-interoperabbiltà
Il-Kummissjoni mmobilizzat madwar €16-il miljun taħt l-Istrument għall-Appoġġ ta’ Emerġenza biex tistabbilixxi l-infrastruttura meħtieġa għall-ħruġ u l-verifika ta’ ċertifikati interoperabbli dwar it-tilqim kontra l-COVID-19, l-ittestjar u l-irkupru.
Filwaqt li bniet fuq l-esperjenza miksuba mill-istabbiliment tas-Servizz Ewropew ta’ Federation Gateway (EFGS) għall-iskambju transfruntier tad-data bejn l-applikazzjonijiet nazzjonali għall-apparati mobbli għat-traċċar tal-kuntatti u għat-twissija, il-Kummissjoni żviluppat il-portal tal-UE. Dan sar l-infrastruttura diġitali sigura li tgħaqqad is-sistemi nazzjonali li jiżguraw verifika affidabbli ta’ ċertifikati interoperabbli madwar l-UE. Wara fażi pilota ta’ suċċess, il-portal tal-UE beda jopera fl-1 ta’ Ġunju 2021, li ppermetta li ċ-ċertifikati jiġu vverifikati bejn il-fruntieri.
Ċertifikat COVID Diġitali tal-UE
Kollegament tal-applikazzjonijiet mobbli għat-traċċar tal-kuntatti bejn il-fruntieri
22 pajjiż tal-UE/taż-ŻEE użaw applikazzjonijiet mobbli nazzjonali għat-traċċar tal-kuntatti u għat-twissija biex ikissru l-katina tal-infezzjonijiet tal-coronavirus u jsalvaw il-ħajjiet. Dawn il-pajjiżi u l-Kummissjoni ħadmu biex jiżguraw li dawn l-applikazzjonijiet ikunu interoperabbli bejn il-fruntieri. 19 mit-22 pajjiż kienu konnessi mas-Servizz Ewropew ta’ Federation Gateway (EFGS), u b’hekk kienu konnessi ma’ xulxin.
Madwar €10 miljun saru disponibbli taħt l-Istrument għall-Appoġġ ta’ Emerġenza biex tiġi appoġġjata l-interoperabbiltà tal-applikazzjonijiet mobbli għat-traċċar tal-kuntatti u għat-twissija. Minn dawn, €7 miljun intużaw għall-iżvilupp u l-iskjerament tal-EFGS – il-portal għall-UE kollha li ppermetta tali interoperabbiltà transfruntiera, u €3 miljun saru disponibbli biex jappoġġjaw lill-Istati Membri jadattaw l-applikazzjonijiet u s-sistemi nazzjonali tagħhom biex jikkonnettjaw mas-servizz tal-gateway tal-interoperabbiltà.
Apps mobbli għat-traċċar tal-kuntatti fl-Istati Membri tal-UE
Links utli
- Ir-rispons tal-Kummissjoni għall-coronavirus fil-qasam tas-saħħa pubblika.
- M&T dwar l-Istrument għall-Appoġġ ta’ Emerġenza.
- Bażi legali tal-2016 tal-Istrument għall-Appoġġ ta’ Emerġenza u l-attivazzjoni fl-2020.
- Punt ċentrali ta’ koordinament għat-tagħmir mediku tal-Kummissjoni