Regolamentazzjoni aħjar

Objettivi tal-aġenda għal Regolamentazzjoni Aħjar

Niżguraw li t-tfassil tal-politika tal-UE jkun ibbażat fuq l-evidenza
Nagħmlu l-liġijiet tal-UE aktar sempliċi u aħjar, u nevitaw il-piżijiet bla bżonn
Ninvolvu liċ-ċittadini, lin-negozji u lill-partijiet ikkonċernati fil-proċess tat-teħid tad-deċiżjonijiet

X'qed tagħmel il-Kummissjoni

Il-Kummissjoni Ewropea hi responsabbli għall-ippjanar, it-tħejjija u l-proposta ta' liġijiet u politiki ġodda tal-UE. Il-ħidma hi ggwidata mill-Programm ta' Ħidma annwali tal-Kummissjoni. Meta tipproponi l-liġijiet, il-Kummissjoni qed tivvaluta l-impatti sinifikanti mistennija tagħhom, jiġifieri, iżda mhux biss, dawk ambjentali, soċjali u ekonomiċi. Il-prospettiva strateġika hija element importanti fil-ħolqien ta’ politiki li jibqgħu validi fil-futur fis-setturi kollha.

Il-Kummissjoni hija responsabbli wkoll għall-evalwazzjoni tal-liġijiet tal-UE u biex tipproponi titjib fejn meħtieġ fir-rieżami tal-politiki.

Il-Kummissjoni tkompli tissorvelja l-implimentazzjoni u l-applikazzjoni tal-inizjattivi adottati fl-Istati Membri.

Regolamentazzjoni aħjar tiżgura teħid ta’ deċiżjonijiet trasparenti u effiċjenti. Mill-2021, il-punti ewlenin tal-aġenda riveduta għal regolamentazzjoni aħjar jinkludu:

It-titjib tal-konsultazzjonijiet pubbliċi billi tintroduċi “Sejħa għal Evidenza” unika tradotta bil-lingwi kollha, fuq il-portal Semma’ Leħnek: Konsultazzjonijiet Pubbliċi u Feedback. L-approċċ jgħaqqad il-feedback dwar il-pjanijiet direzzjonali u l-valutazzjonijiet tal-impatt tal-bidu mal-kwestjonarju tal-konsultazzjonijiet pubbliċi f’ħaġa waħda.
It-tisħiħ tal-isforzi tal-Kummissjoni biex tissimplifika r-regoli tal-UE u tnaqqas il-piżijiet bla bżonn, filwaqt li tikseb il-benefiċċji tal-leġiżlazzjoni (il-programm REFIT) u billi tintroduċi l-prinċipju ta' "one in, one out". Dan il-prinċipju jfisser li piżijiet ġodda introdotti jiġu kkumpensati bit-tneħħija ta’ piżijiet ekwivalenti fl-istess qasam ta’ politika. Il-Kummissjoni wettqet proġett pilota ta’ “one-in, one-out” fit-tieni nofs tal-2021, b’għaxar proposti leġiżlattivi li jkopru firxa wiesgħa ta’ oqsma ta’ politika, li kellhom impatt fuq setturi u partijiet ikkonċernati differenti, biex tittestja l-prinċipju, il-metodoloġija tiegħu u l-kalkoli relatati. Filwaqt li tibni fuq it-tagħlimiet meħuda mill-proġett pilota, il-Kummissjoni issa qed timplimenta l-“one in, one out”, billi tibda bil-programm ta’ ħidma tal-Kummissjoni għall-2022. Il-Kummissjoni impenjat ruħha wkoll li tirrazzjonalizza r-rekwiżiti ta’ rapportar bil-ħsieb li tnaqqashom b’25%.
It-tneħħija tal-ostakli u l-burokrazija li jnaqqsu r-ritmu tal-investimenti, mill-partijiet ikkonċernati ewlenin fil-grupp ta’ esperti ta’ livell għoli Fit for Future.
L-integrazzjoni tal-Għanijiet ta’ Żvilupp Sostenibbli tan-Nazzjonijiet Uniti, sabiex jiġi żgurat li l-proposti leġiżlattivi jikkontribwixxu għall-aġenda tal-2030 għall-iżvilupp sostenibbli.
It-titjib tal-mod li bih ir-Regolamentazzjoni Aħjar tindirizza u tappoġġja l-miri tas-sostenibbiltà, b’mod partikolari l-prinċipju “la tagħmilx ħsara sinifikanti” u t-trasformazzjoni diġitali.
L-integrazzjoni tal-prospettiva strateġika fit-tfassil tal-politika sabiex jiġi żgurat li tkun adattata għall-futur, billi, pereżempju, jitqiesu l-megatendenzi emerġenti fil-kuntesti ekoloġiċi, diġitali, ġeopolitiċi u soċjoekonomiċi.

Il-prattiki ta’ Regolamentazzjoni Aħjar tal-Kummissjoni huma rikonoxxuti internazzjonalment mill-OECD, u jitqiesu avvanzati fost il-membri tal-OECD.

Tgħallem aktar dwar iċ-ċiklu tal-politika u tat-tfassil tal-liġijiet tal-UE.

Semma’ leħnek: Konsultazzjonijiet Pubbliċi u Feedback – aqsam il-fehmiet u l-ideat tiegħek

Il-Kummissjoni ilha tfittex evidenza u feedback mingħand iċ-ċittadini, in-negozji u l-partijiet ikkonċernati fl-istadji kollha tal-proċess leġiżlattiv u tat-tfassil tal-politika sa mill-2015. Tista’ taqsam il-fehmiet u l-ideat tiegħek dwar l-inizjattivi tal-Kummissjoni fl-oqsma kollha ta’ politika fuq il-portal Semma’ Leħnek: Konsultazzjonijiet Pubbliċi u Feedback. Huwa possibbli li wieħed jinkiteb għal notifiki dwar żviluppi ġodda hekk kif l-inizjattivi jieħdu forma, inkluż wara l-adozzjoni tal-leġiżlazzjoni.

Il-portal Semma’ Leħnek: Konsultazzjonijiet Pubbliċi u Feedback

Il-kontribut tiegħek jagħmel differenza

Il-kontributi miċ-ċittadini, in-negozji u l-partijiet ikkonċernati jagħmlu differenza reali fir-rigward tal-politiki tal-UE. Huma ggwidaw u tejbu l-ħidma tal-Kummissjoni fuq diversi inizjattivi importanti, bħall-Inizjattiva taċ-Ċittadini Ewropej, il-Korp Ewropew ta’ Solidarjetà, il-Politika Agrikola Komuni u l-Linji gwida għall-effiċjenza enerġetika tal-binjiet tagħna.

Skopri kif il-proċess ta’ konsultazzjoni għen fit-tiswir tal-leġiżlazzjoni .

Nissimplifikaw il-liġijiet tal-UE

Il-Kummissjoni qed tivvaluta l-prestazzjoni tal-liġijiet eżistenti tal-UE u qed twettaq tibdiliet fejn meħtieġ biex iżżommhom idoneji.

Il-Programm dwar l-Idoneità u l-Prestazzjoni tar-Regolamentazzjoni (REFIT) ġie stabbilit fl-2012 sabiex jagħmel il-liġi tal-UE aktar sempliċi u jnaqqas l-ispejjeż mhux neċessarji tar-regolamentazzjoni filwaqt li xorta waħda jilħaq l-objettivi tiegħu. Il-potenzjal għas-simplifikazzjoni u t-tnaqqis tal-piż dejjem jitqies meta l-leġiżlazzjoni tiġi evalwata u riveduta. Ir-reviżjonijiet kollha tal-leġiżlazzjoni tal-UE huma inklużi taħt REFIT u għandhom l-għan li jiksbu tnaqqis u simplifikazzjoni tal-piż.
Il-Pjattaforma Fit for Future , li tissostitwixxi l-pjattaforma REFIT, ġiet stabbilita fl-2020. Hija grupp ta' esperti ta' livell għoli magħmul minn rappreżentanti tal-Istati Membri, il-Kumitat tar-Reġjuni, il-Kumitat Ekonomiku u Soċjali Ewropew u partijiet ikkonċernati li jirrappreżentaw lis-soċejtà ċivili, lin-negozji u lill-organizzazzjonijiet nongovernattivi. Il-pjattaforma taħdem ukoll man-Network tar-Rappreżentanti tal-SMEs u r-RegHub. Il-Pjattaforma toħroġ opinjonijiet lill-Kummissjoni b’suġġerimenti konkreti dwar l-opportunitajiet għas-simplifikazzjoni, it-tnaqqis tal-piżijiet u l-modernizzazzjoni tal-liġijiet eżistenti tal-UE.
Kulħadd jista’ jipproponi suġġerimenti għas-simplifikazzjoni tal-liġijiet eżistenti tal-UE permezz tal-portal Semma’ Leħnek: Issimplifika!.
L-evalwazzjonijiet u l-kontrolli tal-idoneità huma użati biex jivvalutaw jekk il-liġijiet, il-politiki u l-programmi ta' finanzjament tal-UE humiex iwasslu r-riżultati mistennija bi spiża minima.

Kull sena, il-Kummissjoni tippreżenta ħarsa ġenerali tal-isforzi tagħha dwar is-simplifikazzjoni u t-tnaqqis tal-piżijiet fl-Istħarriġ Annwali dwar il-Piżijiet. Hija timmonitorja wkoll regolarment kif l-opportunitajiet ta’ simplifikazzjoni u tnaqqis tal-piżijiet jiġu kkunsidrati matul iċ-ċiklu tat-tfassil tal-politika fit-tabella ta’ valutazzjoni REFIT.

Niżguraw il-kwalità

Il-linji gwida u s-sett ta’ għodod għal Regolamentazzjoni Aħjar se jgħinu biex jipprovdu gwida konkreta lis-servizzi tal-Kummissjoni Ewropea meta jħejju inizjattivi u proposti ġodda kif ukoll fil-ġestjoni u fl-evalwazzjoni tal-leġiżlazzjoni eżistenti.

Fl-2015, il-Kummissjoni stabbilixxiet il-Bord tal-Iskrutinju Regolatorju, korp indipendenti ta’ uffiċjali tal-Kummissjoni u esperti minn barra l-Kummissjoni. Il-Bord tal-Iskrutinju Regolatorju jirrevedi l-valutazzjonijiet tal-impatt u l-evalwazzjonijiet magħżula. Il-Bord jippubblika rapporti annwali dwar x’għamel biex iwettaq il-missjoni tiegħu.

Insaħħu s-sussidjarjetà u l-proporzjonalità

Il-prinċipji tas-sussidjarjetà u tal-proporzjonalità huma l-pedamenti tat-trattati tal-UE, u huma applikati b’mod sistematiku għall-proposti leġiżlattivi tal-Kummissjoni.

Bil-prinċipju tas-sussidjarjetà, il-Kummissjoni għandha l-għan li taġixxi biss fejn meħtieġ u fejn twassal benefiċċji ċari li jmorru lil hinn mill-miżuri meħuda fil-livell nazzjonali, reġjonali jew lokali. Ħlief f’każijiet fejn l-UE għandha kompetenza esklużiva, m’għandhiex tittieħed azzjoni fil-livell Ewropew sakemm ma tkunx aktar effettiva minn azzjoni meħuda fil-livell nazzjonali, reġjonali jew lokali. Grilja tas-sussidjarjetà hija mehmuża mal-inizjattivi kollha politikament sensittivi u importanti flimkien ma’ valutazzjoni tal-impatt.

Il-proporzjonalità tiffoka fuq l-impatt finanzjarju u amministrattiv tal-leġiżlazzjoni proposta, biex tiżgura li l-azzjonijiet regolatorji ma jmorrux lil hinn minn dak li huwa meħtieġ biex jintlaħqu l-objettivi leġiżlattivi u politiċi. Kwalunkwe impatt bħal dan għandu jkun minimizzat u jkun proporzjonat mal-objettivi tal-politika. Għall-Kummissjoni dan ifisser li nwettqu l-politiki ambizzjużi tagħna bl-aktar mod sempliċi u bl-inqas spejjeż, filwaqt li nevitaw il-burokrazija żejda.

L-istituzzjonijiet tal-UE jaħdmu flimkien

It-titjib tat-tfassil tal-liġijiet tal-UE huwa objettiv komuni u r-responsabbiltà tal-istituzzjonijiet kollha tal-UE u tal-Istati Membri. L-aħjar mod biex jittejjeb it-tfassil tal-liġijiet tal-UE u jinkisbu riżultati aħjar huwa li l-Parlament Ewropew, il-Kunsill tal-Unjoni Ewropea u l-Kummissjoni Ewropea jaħdmu flimkien aktar mill-qrib fis-snin li ġejjin.

Minħabba l-opportunitajiet u l-isfidi li għandna quddiemna fit-triq tagħna lejn irkupru sostenibbli, huwa kruċjali li nilleġiżlaw bl-aktar mod effiċjenti possibbli, filwaqt li nżommu f’moħħna l-futur tagħna. L-applikazzjoni, l-implimentazzjoni u l-infurzar effettivi tal-liġi tal-UE huma prijorità għall-Kummissjoni von der Leyen. Il-Kummissjoni tista’ tiddetermina biss l-ispejjeż u l-iffrankar assoċjati mal-proposti leġiżlattivi tagħha stess. Il-bidliet li jsiru matul in-negozjati mal-Parlament Ewropew u mal-Kunsill jistgħu jbiddlu b’mod sinifikanti l-impatti fuq in-nies u n-negozji. Bħala tali, il-Kummissjoni tilqa’ t-tnedija mill-ġdid tad-djalogu politiku biex jiġu diskussi l-ideat, sabiex il-partijiet kollha jkunu jistgħu jissodisfaw l-impenji tagħhom skont il-ftehim interistituzzjonali dwar it-tfassil aħjar tal-liġijiet.

Il-Kummissjoni gradwalment se tagħmel il-bażijiet tad-data interni u r-repożitorji aċċessibbli għall-pubbliku, f’konformità mal-politika tagħna dwar it-trasparenza tad-data. Aħna se nikkomunikaw mal-Parlament Ewropew u lill-Kunsill biex nistabbilixxu reġistru komuni tal-evidenza, il-Portal Leġiżlattiv Konġunt, li se jippermetti lil kull min ikun interessat fit-tfassil tal-politika tal-UE jsib faċilment l-evidenza kollha li fuqha tkun ibbażata inizjattiva partikolari.

Kooperazzjoni regolatorja internazzjonali

L-UE hija mibnija fuq regoli maqbula b’mod komuni. Biex dawn ir-regoli jaħdmu, l-Istati Membri għandhom jimplimentawhom bis-sħiħ u jinfurzawhom f’waqthom. Imbagħad jeħtieġ li jiżguraw li r-regoli jiġu applikati u infurzati b’mod korrett, minħabba li n-nuqqas ta’ infurzar iġorr l-ispejjeż għaċ-ċittadini u n-negozji.

L-applikazzjoni, l-implimentazzjoni u l-infurzar effettivi tal-liġi tal-UE huma prijorità għall-Kummissjoni von der Leyen. Kif imħabbar fil-linji gwida politiċi tal-President von der Leyen, il-Kummissjoni se tkompli tiggwida u tappoġġja lill-Istati Membri fl-isforzi tagħhom biex jittrasponu d-direttivi, jimplimentaw ir-regolamenti u japplikaw ir-regoli tal-UE kif suppost. Il-kontrolli tal-konformità jivverifikaw kif l-Istati Membri jsarrfu l-leġiżlazzjoni tal-UE fil-leġiżlazzjoni nazzjonali. Biex niżguraw djalogu effettiv fil-fażi tat-traspożizzjoni, aħna niddependu fuq l-Istati Membri għal informazzjoni ċara u preċiża dwar il-leġiżlazzjoni nazzjonali.

Għall-pass li jmiss, il-Kummissjoni beħsiebha twettaq rendikont tal-attivitajiet tagħha ta’ sorveljanza u infurzar, biex tiżgura li dawn jibqgħu adattati biex il-liġi tal-UE taħdem fil-prattika.

Regolamentazzjoni Aħjar: għaliex u kif