Beidh an Chéannacht Dhigiteach Eorpach ar fáil do shaoránaigh, cónaitheoirí agus gnólachtaí den Aontas ar mian leo iad féin a shainaithint nó deimhniú a sholáthar i dtaca le sonraí pearsanta ar leith. Beifear in ann é a úsáid le haghaidh seirbhísí príobháideacha agus poiblí, ar líne agus as líne araon, ar fud an Aontais.
Beidh gach saoránach den Aontas agus gach duine atá ina gcónaí ann ábalta tiachóg phearsanta dhigiteach a úsáid.
Gach uair a iarrann aip nó suíomh gréasáin orainn céannacht dhigiteach nua a chruthú nó logáil isteach go héasca trí ardán mór, ní bhíonn tuairim dá laghad againn cén úsáid a bhaintear as ár sonraí i ndáiríre. Is é sin an fáth a ndéanfaidh an Coimisiún ríomhchéannacht Eorpach shlán a mholadh. Ríomhchéannacht ar féidir linn muinín a chur inti agus ar féidir linn úsáid a bhaint aisti in áit ar bith san Eoraip chun idirbhearta a dhéanamh ar nós cánacha a íoc nó rothar a fháil ar cíos. Teicneolaíocht lenar féidir linn féin a rialú cé na sonraí a mbainfear úsáid astu agus an chaoi a ndéanfar sin.
Buntáistí na Céannachta Digití Eorpaí
An ceart ag gach duine atá i dteideal cárta céannachta náisiúnta céannacht dhigiteach a bheith acu, ar céannacht í a aithnítear gach áit san Aontas
Bealach simplí sábháilte chun smacht a bheith agat ar an méid eolais is mian leat a roinnt le seirbhísí ar gá eolas a roinnt lena n-úsáid
Déantar iad a oibriú trí thiachóga digiteacha atá ar fáil in aipeanna ar d’fhón póca agus ar ghléasanna eile chun:
- tú féin a shainaithint ar líne agus as líne
- eolas a chuireann rialtais ar fáil a stóráil agus a mhalartú e.g. ainm, sloinne, dáta breithe, náisiúntacht
- an t-eolas a chuireann foinsí príobháideacha iontaofa ar fáil a stóráil agus a mhalartú
- an t-eolas a úsáid chun ceart a dheimhniú e.g. an ceart chun cónaí, dul ag obair nó staidéar a dhéanamh i mBallstát ar leith
Tá ardán ar líne seolta ag an gCoimisiún chun aiseolas a fháil ó gach duine ar spéis leis a thuairimí a chur in iúl faoi Thiachóga na Céannachta Digití Eorpaí a bheidh ann amach anseo. Beidh an t-ardán ar líne ar oscailt do thuairimí le linn na hidirbheartaíochta reachtaí agus le linn phróiseas forbartha na sraithe straitéisí coitinne ag na Ballstáit, rud a chinnteoidh gur uirlis phraiticiúil do chách iad Tiachóga na Céannachta Digití Eorpaí.
Cad chuige é?
Sa lá atá inniu ann, níl ach tuairim agus 60% de dhaonra an Aontais i 14 Bhallstát in ann úsáid thrasteorann a bhaint as a ríomhchéannacht náisiúnta.
Ní cheadaíonn ach 14% de sholáthraithe príomhsheirbhísí poiblí sna Ballstáit go léir fíordheimhniú trasteorann trí chóras ríomhaitheantais, mar shampla chun céannacht duine éigin a chruthú ar an idirlíon gan aon ghá le pasfhocal a úsáid. Tá líon na bhfíordheimhnithe trasteorann a n-éiríonn leo in aghaidh na bliana an-íseal, ach tá méadú ag teacht ar an líon sin.
Is mian le 72% d’úsáideoirí fios a bheith acu conas a phróiseáiltear a sonraí nuair a úsáideann siad cuntais ar na meáin shóisialta. Is mian le 63% de shaoránaigh an Aontais aon chéannacht dhigiteach shlán amháin a bheith ann do gach seirbhís ar líne (suirbhé Eorabharaiméadair)
Príomhphrionsabail
Aon saoránach, cónaitheoir nó gnólacht den Aontas ar mian leis é a úsáid, beidh fáil aige air
Beifear in ann í a úsáid go forleathan mar bhealach chun úsáideoirí a shainaithint nó chun saintréithe pearsanta ar leith a dheimhniú le rochtain a fháil ar sheirbhísí digiteacha poiblí agus príobháideacha ar fud an Aontais
Beidh smacht iomlán ag úsáideoirí chun na gnéithe céannachta, na sonraí agus na deimhnithe a chomhroinneann siad le tríú páirtithe a roghnú, sin agus chun an chomhroinnt sin a rianú
Úsáid phraiticiúil
Is féidir an Chéannacht Dhigiteach Eorpach a úsáid i réimse leathan cásanna, cuir i gcás:
- seirbhísí poiblí a úsáid, mar shampla teastais bhreithe agus teastais leighis a iarraidh, nó athrú ar do sheoladh a chur in iúl
- cuntas bainc a oscailt
- tuairisceán cánach a dhéanamh
- iarratas a dhéanamh ar áit ollscoile i do thír féin nó i mBallstát eile
- oideas leighis a stóráil is féidir a úsáid in áit ar bith san Eoraip
- d’aois a chruthú
- carr a fháil ar cíos trí úsáid a bhaint as ceadúnas tiomána digiteach
- seiceáil isteach in óstán
Úsáid a bhaint as an gCéannacht Dhigiteach Eorpach: iarratas a dhéanamh ar iasacht ón mbanc
Próiseas a mbíonn céimeanna éagsúla i gceist leis de ghnáth is ea iarratas a dhéanamh ar iasacht ón mbanc, ó choinní a shocrú agus bualadh le hionadaí ón mbanc go dtí na doiciméid pháipéir ar fad a bhailiú agus a shíniú – agus é sin uilig a dhéanamh arís má tá aon rud ar iarraidh.
Trí úsáid a bhaint as an gCéannacht Dhigiteach Eorpach, níl le déanamh ag an úsáideoir ach na doiciméid riachtanacha a stóráiltear go háitiúil ina thiachóg dhigiteach a roghnú chun freagra a thabhairt ar iarratas an bhainc. Cruthóidh sé sin doiciméid dhigiteacha infhíoraithe a sheolfar ar bhealach slán chuig an mbanc lena bhfíorú, agus ansin beidh an banc in ann leanúint leis an bpróiseas iarratais.
An saol a éascú do shaoránaigh agus do ghnólachtaí
Na seirbhísí aitheantais agus iontaoibhe seo a leanas, baineann éifeacht dhlíthiúil leo ar fud an Aontais agus is féidir iad a úsáid a bhuí leis an gcreat iontaoibhe a cruthaíodh le Rialachán eIDAS. Is príomhuirlisí iad chun iontaoibhe agus slándáil a chumasú sa Mhargadh Aonair Digiteach. Déanfar roinnt seirbhísí, cuir i gcás ríomhShínithe, a chomhtháthú sa tiachóg chun go mbeifear in ann iad a úsáid.
| Saoránaigh | Gnólachtaí | ||
|---|---|---|---|
 | ríomhShíniú Sainráiteas i bhformáid leictreonach de ghlacadh duine leis an ábhar atá i ndoiciméad. Comhtháthófar an fheidhm sin sa tiachóg. | Cuideoidh sé liom doiciméid dhlíthiúla a shíniú agus iad a sheoladh trí ríomhphost gan aon rud a chló ar pháipéar | Laghdóidh sé costais agus am trí phróisis chuíchóirithe agus cuideoidh sé chun nósanna imeachta gnólachtaí a dhéanamh nuálach |
|
ríomhStampa Ama Fianaise leictreonach go raibh ann do thacar sonraí ag am ar leith | Tabharfaidh sé fianaise dom gur cheannaigh mé mo thicéid cheolchoirme | Cuirfidh sé le rianú doiciméad agus bainfear cuntasacht níos fearr amach a bhuí leis |
|
ríomhChéannacht Bealach chun go mbeidh gnólachtaí agus tomhaltóirí in ann a gcéannacht a chruthú go leictreonach | Cuirfidh sé ar mo chumas dom cuntas bainc a oscailt i dtír eile le mo chéannacht náisiúnta | Méadóidh sé mo bhonn custaiméirí, sábhálfaidh sé costais agus am, agus cothóidh sé muinín in idirbhearta trasteorann |
|
Deimhniú Cáilithe Barántúlachta Gréasáin Deimhin a dhéanamh de go bhfuil suíomhanna gréasáin iontaofa agus gur féidir brath orthu | Cuirfidh sé ar an eolas mé go bhfuil na suíomhanna gréasáin agus na haipeanna is maith liom a úsáid iontaofa sábháilte | Méadóidh sé muinín an tomhaltóra agus cuideoidh sé chun fioscaireacht a sheachaint, rud a chosnóidh cáil mo ghnólachta |
|
ríomhShéala Dearbhú a thabhairt maidir le bunús agus sláine doiciméid | Dearbhóidh sé gur fíorthicéid iad na ticéid don chluiche, nach cinn bhréige iad | Laghdóidh sé costais agus am trí phróisis chuíchóirithe agus cothóidh sé iontaoibh maidir le bunús an doiciméid |
|
Ríomhsheirbhís Seachadta Chláraithe Cuireann sí cosaint ar fáil maidir leis an mbaol caillteanais, gada, damáiste nó athruithe nuair atá doiciméid á seoladh | Cinnteoidh sé go seachadfar an bronntanas do bhreithlá mo mhic go sábháilte | Laghdóidh sé an t-am agus na costais a bhaineann le doiciméid a mhalartú, méadóidh sé éifeachtúlacht agus iontaoibhe agus cuirfidh sé feabhas ar an gcaoi le doiciméid a rianú |