An Clár um Oiriúnacht agus Feidhmíocht Rialála (REFIT) – dlí an Aontais a dhéanamh níos simplí, níos saoire agus slán i bhfad na haimsire

Eolas faoi REFIT

Cuid de Chlár Oibre an Choimisiúin maidir le Rialáil Níos Fearr is ea REFIT. Faoin gclár sin, cinntíonn an Coimisiún go mbíonn ar dhlíthe an Aontais an toradh a bhí ceaptha a bheith orthu, do shaoránaigh agus do ghnólachtaí, agus san am céanna dlíthe an Aontais atá ann cheana a shimpliú agus maorlathas a laghdú, aon uair is féidir. Is é is aidhm do REFIT dlíthe an Aontais a dhéanamh níos simplí, níos spriocdhírithe agus níos éasca a chomhlíonadh.

Is iad na saoránaigh agus na fiontair bheaga agus mheánmhéide – a chuimsíonn 99% de ghnólachtaí uile an Aontais – a bhaineann leas as REFIT go háirithe, ós rud é go bhféadfadh ualaí agus castacht na rialacha tionchar a imirt orthusan go háirithe.

Déanann an Coimisiún monatóireacht rialta ar an dul chun cinn faoi REFIT trí scórchlár REFIT, lena gcoinnítear taifead ar thionscnaimh REFIT ó thús deireadh a saolré. Tugtar forléargas bliantúil sa Suirbhé Bliantúil Ualaigh ar iarrachtaí an Aontais maidir le simpliú agus laghdú ualaigh, ina measc sin buaicphointí phríomhthionscnaimh REFIT, gníomhaíochtaí an Ardáin ‘Réidh don Todhchaí’, agus ó 2021 i leith, an cur chuige ‘ceann amháin isteach, ceann amháin amach’

Rialáil níos fearr: cén fáth agus cén chaoi?

Scórchlár REFIT

Iarrachtaí an Aontais an reachtaíocht a shimpliú – Suirbhé Bliantúil Ualaigh 2022

An chaoi a n-oibríonn REFIT

Ba cheart é a bheith d’aidhm ag na tograí uile ón gCoimisiún costais rialála neamhriachtanacha a shimpliú agus a laghdú, agus na cuspóirí beartais foluiteacha a bhaint amach ag an am céanna.

Leis an gcur chuige nua ‘ceann amháin isteach, ceann amháin amach’, comhlánaítear clár REFIT trí thionchar na gcostas comhlíontachta ar shaoránaigh agus ar ghnólachtaí a mheas. Déanfar costais choigeartaithe a chainníochtú agus a chúiteamh a mhéid is féidir, agus déanfar costais riaracháin a fhritháireamh.

Sa chleachtas:

Leis na measúnuithe tionchair féachtar ar na roghanna atá ar fáil chun cuspóirí beartais a chur i gcrích ar an mbealach is éifeachtúla agus anailís a dhéanamh ar acmhainn REFIT i leith na rogha ab fhearr.
Déanann na meastóireachtaí agus na seiceálacha oiriúnachta uile imscrúdú ar an acmhainneacht i dtaobh dhlíthe an Aontais Eorpaigh atá ann cheana a shimpliú agus costais rialála neamhriachtanacha a dhíothú.
Tugann an Bord um Ghrinnscrúdú Rialála aird ar leith ar chur i bhfeidhm an phrionsabail ‘ceann amháin isteach, ceann amháin amach’, déanann sé measúnú ar chaighdeán na meastachán costais agus ar chomhréireacht rogha na tosaíochta, agus measúnaíonn sé cé acu a dhéantar iniúchadh leordhóthanach ar laghdú ualaigh.
Cainníochtaítear an acmhainneacht i dtaobh simpliú a dhéanamh agus an t-ualach a laghdú, nuair is féidir.
Cuireann an Coimisiún an ghné REFIT i láthair i meabhrán míniúcháin a thograí.
San áireamh i gclár oibre an Choimisiúin tá athbhreithnithe ar an reachtaíocht lena mbaineann coigilteas costais do shaoránaigh, do ghnólachtaí agus d’údaráis

Freagracht chomhroinnte is ea dlíthe an Aontais a shimpliú agus an t-ualach rialála a bhaineann leo a laghdú, freagracht nach féidir a bhaint amach ach trí dhlúthchomhar leis na hinstitiúidí Eorpacha eile, na Ballstáit agus na páirtithe leasmhara.

Mar chuid de na hiarrachtaí chun ualaí ar ghnólachtaí agus ar údaráis riaracháin a laghdú, tá gealltanas tugtha ag an gCoimisiún ina straitéis fhadtéarmach maidir le hiomaíochtas, a foilsíodh i mí an Mhárta 2023, oibleagáidí tuairiscithe a chuíchóiriú agus ualaí den sórt sin a laghdú 25%, gan an bonn a bhaint de na cuspóirí beartais gaolmhara.

An 12 Meán Fómhair 2023, chomhlánaigh an pacáiste fóirithinte do FBManna an straitéis sin agus chuir sé tásca ar fáil maidir leis na chéad tograí a bhí le glacadh in éineacht le clár oibre 2024. Leis an bpacáiste fóirithinte do FBManna, cuireadh clocha míle soiléire ar bun a bheidh le baint amach faoi dheireadh 2023, ar a saothrófar an cleachtadh in 2024 agus ina dhiaidh sin.

Do thuairim a thabhairt

Mar dhlúthchuid den Rialáil níos fearr, tá clár REFIT bunaithe ar an ionchur a fhaightear ó shaoránaigh agus ó na páirtithe leasmhara.

An tArdán ‘Réidh don Todhchaí’

Bunaíodh an tArdán ‘Réidh don Todhchaí’ chun fianaise a bhailiú ó údaráis náisiúnta, réigiúnacha agus áitiúla, ó shaoránaigh agus ó pháirtithe leasmhara chun comhairle a chur ar an gCoimisiún maidir le conas dlíthe an Aontais a dhéanamh níos éifeachtúla.

Chomh maith le hionchur óna chomhaltaí, breithnítear freisin san Ardán ‘Réidh don Todhchaí’ ionchur ó shaoránaigh agus ó pháirtithe leasmhara a chuirtear isteach tríd an tairseach ‘Cloisimis uait: ‘Simplímis iad!’.

Sin an áit ar féidir leat moltaí a dhéanamh maidir le conas dlíthe an Aontais atá ann cheana a shimpliú, a laghdú agus a nuachóiriú.

Chomh maith leis sin, féadfaidh tú do chuid tuairimí a chur in iúl faoi dhlíthe atá ann cheana agus faoi bheartais nua de chuid an Aontais de réir mar a bheidh siad á bhforbairt tríd an tairseach ‘Cloisimis uait’.

Na príomhnithe atá bainte amach

Ar an iomlán, déanann scórchlár REFIT monatóireacht ar dhul chun cinn an chláir ó 2015 i leith. Go dtí seo, tá an méid seo a leanas san áireamh sa scórchlár:
Breis agus 270 tionscnamh reachtach a glacadh lena mbaineann bearta simpliúcháin agus laghdaithe ualaigh.
210 meastóireacht chríochnaithe agus seiceáil oiriúnachta.

In 2022 bhí 24 mheastóireacht ar siúl agus bhí 18 gcinn acu tugtha chun críche. Thairis sin, glacadh 39 dtionscnamh ina raibh bearta simpliúcháin agus bearta laghdaithe ualaigh san áireamh.

Bileog eolais: Tionscnaimh chun reachtaíocht an Aontais a shimpliú agus a nuachóiriú agus an t-ualach a laghdú in 2022

Cúlra

2023 – d’fhoilsigh an Coimisiún Suirbhé Bliantúil Ualaigh 2022 inar tuairiscíodh, i measc nithe eile, ar an gcéad bhliain de chur chun feidhme iomlán an chur chuige ‘ceann amháin isteach, ceann amháin amach’ agus inar fógraíodh tuilleadh iarrachtaí ón gCoimisiún chun na ceanglais tuairiscithe ar chuideachtaí agus ar riaracháin a chuíchóiriú agus a shimpliú.

2022 – d’fhoilsigh an Coimisiún Suirbhé Bliantúil Ualaigh 2021, inar tuairiscíodh den chéad uair ar an treoirthionscadal ‘ceann amháin isteach, ceann amháin amach’ a rinneadh in 2021.

2020 – bhunaigh an Coimisiún an tArdán ‘Réidh don Todhchaí’, sainghrúpa ardleibhéil lenar tugadh le chéile na Ballstáit, Coiste na Réigiún, Coiste Eacnamaíoch agus Sóisialta na hEorpa agus páirtithe leasmhara. San áireamh leis freisin tá comhar le Líonra Toscairí na FBManna agus le REGHub.

2017 – d’fhoilsigh an Coimisiún an chéad Suirbhé Bliantúil Ualaigh.

2017 – chuir an Coimisiún feabhas ar REFIT trína chinntiú go ndéantar simpliú agus laghdú ualaigh a chur san áireamh gach uair a bhíonn reachtaíocht á meas agus á hathbhreithniú. Tá gach athbhreithniú ar reachtaíocht an Aontais san áireamh faoi REFIT darb aidhm an t-ualach a laghdú agus a shimpliú.

2015 – bhunaigh an Coimisiún Ardán REFIT; chuaigh a shainordú in éag an 31 Nollaig 2019.

2015 – d’fhoilsigh an Coimisiún staidéar (‘ABRplus’) ina ndearnadh anailís ar an gcaoi ar cuireadh i bhfeidhm sna Ballstáit 12 bheart a bhí sa chlár gníomhaíochta agus ar a mhéid a baineadh amach na torthaí a raibh coinne leo.

2012 – Faoi dheireadh an chláir gníomhaíochta, an sprioc a bhí ag an gCoimisiún laghdú 25% a dhéanamh ar an ualach riaracháin a bhí ar ghnólachtaí de dheasca reachtaíocht an Aontais, bhí sin bainte amach agus tuairim agus €30.8 billiún de choigilt sa bhliain gnóthaithe dá bharr.

2007 – sheol an Coimisiún clár gníomhaíochta chun an t-ualach riaracháin a bhaineann le rialáil san Aontas Eorpach a laghdú. Bunaíodh grúpa ardleibhéil chun comhairle a thabhairt faoi chur chun feidhme an chláir. Ar na moltaí a rinne an grúpa bhí sonrascú leictreonach a dhéanamh níos éasca agus díolúine a thabhairt do mhicrifhiontair ó rialacha cuntasaíochta an Aontais.

2005 – chuimsigh an clár rollach maidir le Simpliú 164 bheart le linn na tréimhse 2005-2009 agus rinneadh é a ionchorprú sa chlár oibre bliantúil.

2002 – ba chéadchéim é an clár ‘Rialáil Níos Fearr’ maidir le reachtaíocht an Aontais a shimpliú agus a fheabhsú. Tugadh isteach leis an gclár an oibleagáid measúnuithe tionchair a dhéanamh agus comhairliúcháin a dhéanamh le geallsealbhóirí i leith gach togra ón gCoimisiún.