Il-Kummissjoni tfassal pjanijiet għal lawrja Ewropea

Illum aħna pass eqreb lejn il-ħolqien ta’ lawrja Ewropea, tip ġdid ta’ programm konġunt volontarju bejn universitajiet minn pajjiżi differenti tal-UE li se jiġi rikonoxxut mal-UE kollha. Dan seħħ wara li l-Kummissjoni ppreżentat pakkett biex tavvanza l-kooperazzjoni transfruntiera bejn l-istituzzjonijiet tal-edukazzjoni għolja.

Lawrja Ewropea se tkun ta’ benefiċċju għall-istudenti billi tagħti spinta lill-mobbiltà għat-tagħlim u billi tagħmel lill-gradwati aktar attraenti għall-impjegaturi. Fl-istess ħin, din se tgħin biex tintlaħaq id-domanda tas-suq tax-xogħol, u fl-aħħar mill-aħħar tagħti spinta lill-kompetittività tal-Ewropa.

Il-pakkett huwa magħmul minn tliet inizjattivi li jindirizzaw l-ostakli legali u amministrattivi għall-istabbiliment ta’ programmi ta’ lawrji konġunti kompetittivi fil-livelli ta’ Baċellerat, Master jew Dottorat. B’mod aktar importanti, huma jagħmlu dan filwaqt li jirrispettaw bis-sħiħ l-awtonomija u l-kompetenza tal-universitajiet tal-pajjiżi tal-UE u tal-gvernijiet reġjonali fil-qasam tal-edukazzjoni għolja.

L-ewwel waħda minn dawn l-inizjattivi hija l-pjan ta’ azzjoni għal lawrja Ewropea, li tistabbilixxi triq konkreta ta’ kooperazzjoni bejn il-pajjiżi tal-UE u s-settur tal-edukazzjoni għolja. Minħabba d-diversità tas-sistemi Ewropej tal-edukazzjoni għolja, din se ssegwi approċċ gradwali b’żewġ punti ta’ dħul possibbli

• tikketta Ewropea preparatorja: il-programmi konġunti li jissodisfaw il-kriterji Ewropej proposti jingħataw tikketta Ewropea preparatorja u l-istudenti jirċievu ċertifikat tat-tikketta tal-lawrja Ewropea flimkien mal-lawrja konġunta tagħhom
• lawrja Ewropea: tip ġdid ta’ kwalifika ankrat fil-leġiżlazzjoni nazzjonali, mogħti b’mod konġunt minn diversi universitajiet jew entità legali komuni stabbilita minn tali universitajiet, u rikonoxxuta awtomatikament

Bħala appoġġ għal dan u biex is-settur tal-edukazzjoni għolja jkollu l-appoġġ b’mod aktar ġenerali, hemm żewġ inizjattivi oħra fil-pakkett. Waħda tħares lejn modi kif jittejbu l-proċessi tal-assigurazzjoni tal-kwalità u r-rikonoxximent awtomatiku tal-kwalifiki fl-edukazzjoni għolja, u l-oħra lejn kif il-karrieri akkademiċi jistgħu jsiru aktar attraenti u sostenibbli.

Sib aktar informazzjoni

Sit web iddedikat għall-Pakkett dwar l-Edukazzjoni Għolja

Skeda informattiva dwar lawrja Ewropea

Erasmus+

Stqarrija għall-istampa: Il-Kummissjoni tfassal pjanijiet għal lawrja Ewropea