Is-27 Konferenza tan-NU dwar it-Tibdil fil-Klima (COP27) saret mis-6 sal-20 ta’ Novembru 2022 f’Sharm El-Sheikh.
Taħt il-presidenza tal-Eġittu, is-summit tal-COP27 laqqa’ lill-partijiet flimkien biex jaċċellera l-azzjoni lejn l-għanijiet tal-Ftehim ta’ Pariġi u l-Konvenzjoni Qafas tan-NU dwar it-Tibdil fil-Klima.
Fil-COP27, il-Kummissjoni Ewropea wriet ambizzjoni u flessibbiltà biex l-għan li t-tisħin globali jinżamm limitat għal 1.5 gradi jibqa’ tragward li jista’ jintlaħaq. Sforz Ewropew b’saħħtu u magħqud għen biex jiġi żgurat ftehim diffiċli biex il-miri tal-Ftehim ta’ Pariġi jinżammu ħajjin. Il-medjazzjoni tal-UE għenet ukoll biex jitqiegħdu fis-seħħ arranġamenti ġodda bilanċjati għall-finanzjament, b’bażi estiża ta’ donaturi, biex tgħin lill-komunitajiet vulnerabbli jiffaċċaw telf u ħsara kkawżati mit-tibdil fil-klima.
Il-COP27 żammet ħajja l-għan ta’ 1.5C. Sfortunatament, hija ma waslitx biex il-mittenti ewlenin tad-dinja jżommu mal-impenn tagħhom li jnaqqsu gradwalment il-fjuwils fossili, u lanqas ma ġabet magħha impenji ġodda dwar il-mitigazzjoni tat-tibdil fil-klima. Iżda l-UE se tibqa’ fuq din id-direzzjoni, b’mod partikolari permezz tal-Patt Ekoloġiku Ewropew u tar-REPowerEU, minħabba li huwa essenzjali li l-ambizzjoni tal-Ftehim ta’ Pariġi tibqa’ tista’ tintlaħaq.
- Il-Partijiet qablu li l-limitazzjoni tat-tisħin globali għal 1.5C tirrikjedi tnaqqis rapidu, profond u sostnut fl-emissjonijiet globali tal-gassijiet serra, b'tali mod li jitnaqqsu b’43 fil-mija sal-2030 meta mqabbla mal-livell tal-2019.
- Huma tennew l-appell mill-Patt Klimatiku ta’ Glasgow biex il-kontributi stabbiliti fil-livell nazzjonali (NDCs) jiġu aġġornati kif meħtieġ biex jiġi allinjat mal-għan tat-temperatura tal-Ftehim ta’ Pariġi, sa tmiem l-2023.
- Il-Patt Klimatiku ta’ Glasgow se jiggwida Programm ta’ Ħidma ġdid dwar il-Mitigazzjoni biex iħeġġeġ lill-Partijiet jallinjaw il-miri u l-azzjonijiet tagħhom lejn żero netti.
- Intlaħaq qbil bejn il-Partijiet biex jistabbilixxu arranġamenti ta’ finanzjament ġodda biex jgħinu lill-pajjiżi li qed jiżviluppaw li huma partikolarment vulnerabbli għall-effetti negattivi tat-tibdil fil-klima. Dawn jinkludu fond ġdid b’enfasi fuq l-indirizzar tat-telf u l-ħsara.
Inizjattivi tal-UE fil-COP27
Sħubijiet strateġiċi
Matul il-COP27, il-Kummissjoni żgurat ħafna ftehimiet bilaterali u multilaterali. Hi ffirmat ftehimiet ta’ sħubija strateġika ma’
- il-Każakistan dwar il-materja prima, il-batteriji u l-idroġenu rinnovabbli
- in-Namibja dwar il-materja prima sostenibbli u l-idroġenu rinnovabbli
- l-Eġittu dwar l-Idroġenu Rinnovabbli
Sħubijiet dwar il-Foresti
Il-President tal-Kummissjoni Ursula von der Leyen nediet Sħubijiet dwar il-Foresti mal-Guyana, il-Mongolja, il-Kongo, l-Uganda u ż-Żambja. Permezz ta’ dawn is-Sħubijiet, l-UE se tappoġġja lis-sħab tagħha fil-ġestjoni u l-preservazzjoni sostenibbli tal-foresti, waħda mill-aktar riżorsi naturali għonja fid-dinja biex jiġi miġġieled it-tibdil fil-klima u tiġi kkonservata l-bijodiversità kif ukoll biex jiġi promoss l-iżvilupp sostenibbli. Aqra aktar
L-importanza tan-natura għall-kriżijiet interkonnessi tal-klima u tal-bijodiversità kienu wkoll fokus ewlieni tal-COP15 dwar il-Bijodiversità, li saret f’Montreal, il-Kanada f’Diċembru.
Wegħda Globali b'rabta mal-Metan
L-Istati Uniti, l-UE u s-sħab tagħha formalment nedew il-Wegħda Globali b'rabta mal-Metan fl-2021, inizjattiva biex jitnaqqsu l-emissjonijiet globali tal-metan biex l-għan li t-tisħin jiġi limitat għal 1.5 gradi Celsius ikun jista’ jintlaħaq. Fil-COP27, il-Kummissjoni laqgħet l-appoġġ dejjem jikber għal din l-inizjattiva, li issa hija appoġġjata minn aktar minn 150 pajjiż. Aqra aktar
Afrika: Appoġġ għall-adattament għat-tibdil fil-klima u r-reżiljenza
L-UE u l-Unjoni Afrikana ħabbru Inizjattiva ġdida tat-Tim Ewropa dwar l-Adattament għat-Tibdil fil-Klima u r-Reżiljenza fl-Afrika bħala parti mill-Pakkett ta’ Investiment tal-Global Gateway UE-Afrika. Din l-Inizjattiva tat-Tim Ewropa se tiġbor flimkien programmi eżisteni u ġodda għall-adattament għat-tibdil fil-klima ta’ aktar minn €1 biljun u se żżid l-impatt tagħha permezz ta’ kordinazzjoni imtejba u djalogu ta' politika msaħħaħ dwar l-adattament bejn l-UE u UA.
Sħubija għal Tranżizzjoni Enerġetika Ġusta
Fl-2021, il-gvernijiet tal-Afrika t’Isfel, Franza, il-Ġermanja, ir-Renju Unit u l-Istati Uniti, flimkien mal-UE, ħabbru Sħubija għal Tranżizzjoni Enerġetika Ġusta ġdida, ambizzjuża u fit-tul biex tappoġġja l-isforzi ta’ dekarbonizzazzjoni tal-Afrika t’Isfel. Is-Sħubija għandha l-għan li taċċellera d-dekarbonizzazzjoni tal-ekonomija tal-Afrika t’Isfel, b’enfasi fuq is-sistema tal-elettriku. Waqt il-COP27 l-UE laqgħet u approvat ukoll il-Pjan ta’ Investiment għal Tranżizzjoni Ġusta tal-Enerġija tal-Afrika t’Isfel, u ffirmat Sħubija ġdida għal Tranżizzjoni Ġusta tal-Enerġija mal-Indoneżja fil-G20 ta’ Bali.
Matul il-konferenza, il-Kummissjoni ospitat aktar minn 125 avveniment parallel fil-Pavaljun tal-UE f’Sharm el-Sheikh u online dwar kwistjonijiet bħall-protezzjoni tal-bijodiversità u r-restawr tan-natura, is-sigurtà tal-enerġija u t-tranżizzjoni ekoloġika, il-finanzi sostenibbli, is-sigurtà tal-ikel u tal-ilma, u r-riċerka u l-innovazzjoni. Dawn inkludew djalogu bejn il-Viċi President Eżekuttiv Timmermans u rappreżentanti taż-żgħażagħ mid-dinja kollha.
Kontribut tat-Tim Ewropa għall-finanzjament globali għall-klima
Biex tiġi indirizzata l-kriżi klimatika jeħtieġ li l-emissjonijiet jonqsu kullimkien fid-dinja. Ħafna pajjiżi diġà qed jiffaċċjaw l-impatt ta’ din il-kriżi. L-UE ġabret fondi bejn l-2013 u l-2020 li qed jappoġġjaw lill-pajjiżi li qed jiżviluppaw biex itaffu u jadattaw għat-tibdil fil-klima, billi
- jiffinanzjaw il-miżuri ta’ azzjoni klimatika globalment, b’enfasi fuq l-aktar pajjiżi u komunitajiet foqra u vulnerabbli
- jużaw l-għotjiet għall-ingranaġġ tal-investiment privat u l-finanzjament minn banek internazzjonali tal-iżvilupp
Flimkien, l-UE u l-Istati Membri tagħha huma l-akbar kontributur tal-finanzjament pubbliku għall-klima għall-ekonomiji li qed jiżviluppaw, b’impenn ta’ €23.4 biljun fl-2020, bi kważi nofshom fil-forma ta’ għotjiet. Dan jirrappreżenta sehem sinifikanti tal-għan globali ta’ $100 biljun kif imwiegħda mill-pajjiżi żviluppati fis-summit ta’ Kopenħagen dwar il-klima fl-2009.