Il-Kummissjoni Ewropea għandha l-għan li trawwem ambjent tax-xogħol varjat u inklużiv, ħieles mid-diskriminazzjoni, fejn il-forza tax-xogħol tagħna hija rappreżentattiva tas-soċjetà tagħna.
Trawwim ta’ post tax-xogħol varjat u inklużiv
Il-Kummissjoni Ewropea adottat diversi politiki biex issaħħaħ l-impenn tal-Ewropa għall-ugwaljanza, bħal:
- strateġija dwar l-ugwaljanza bejn il-ġeneri
- pjan ta' azzjoni għall-ġlieda kontra r-razziżmu
- qafas strateġiku għar-Rom
- strateġija dwar id-drittijiet tal-persuni LGBTIQ
- strateġija dwar id-drittijiet tal-persuni b’diżabbiltà
Bħala impjegatur, il-Kummissjoni stabbiliet għaliha nnifisha l-għan li tmexxi bl-eżempju. Fl-istrateġija l-ġdida tagħha dwar ir-riżorsi umani, għandha l-għan li ttejjeb id-diversità fost l-istaff tagħha biex tirrifletti aħjar id-diversità tal-popolazzjoni Ewropea.
Fil-mandat attwali tal-Kummissjoni (2019-2024), waħda mill-prijoritajiet politiċi hija li tinkiseb parità bejn il-ġeneri fil-livelli maniġerjali kollha.
Sa nofs l-2023, is-sehem tan-nisa fil-funzjonijiet maniġerjali huwa:
- kważi 9 punti perċentwali iktar mill-bidu tal-mandat fil-livell tal-maniġment superjuri (45.2%)
- 6 punti perċentwali aktar fil-livell tal-maniġment intermedju (47.5%)
- kważi 7 punti perċentwali aktar b’mod ġenerali (47.1%).
Dan diġà jqiegħed lill-Kummissjoni fost il-ftit amministrazzjonijiet pubbliċi fid-dinja bl-ogħla sehem ta’ nisa f’pożizzjonijiet ta’ tmexxija. Madankollu, l-għan tagħna huwa l-ugwaljanza bejn il-ġeneri fil-livelli kollha. Biex jintlaħaq dan l-għan, qed jiġu stabbiliti gradwalment miżuri inkrementali, sabiex sa tmiem il-mandat attwali tal-Kummissjoni tkun tista’ tintlaħaq parità ġenerali.
Barra minn hekk, l-istituzzjoni hija determinata li tipprattika politika ta’ tolleranza żero fir-rigward tad-diskriminazzjoni għal kwalunkwe raġuni lejn il-membri tal-istaff tagħha, kif stabbilit fit-Trattat dwar il-Funzjonament tal-Unjoni Ewropea.
L-Uffiċċju għad-Diversità u l-Inklużjoni (DIO) fid-DĠ Riżorsi Umani nħoloq fl-2020 biex:
- jikkoordina l-iżvilupp ta’ kultura tax-xogħol varjata u inklużiva
- jikkoopera ma’ istituzzjonijiet u organizzazzjonijiet oħra f’dan ir-rigward
Fl-2021, il-Kummissjoni wettqet stħarriġ biex tkejjel il-perċezzjonijiet tad-diversità u l-inklużjoni fost il-persuni li jaħdmu fil-Kummissjoni, l-aġenziji eżekuttivi tagħha u s-Servizz Ewropew għall-Azzjoni Esterna. L-10,000 tweġiba tawna stampa tas-sentiment tal-istaff u kkontribwixxew għal pjan ta’ azzjoni ġdid għad-diversità u l-inklużjoni, li huwa mfassal biex itejjeb l-ambjent tax-xogħol attwali u l-prospetti tal-Kummissjoni bħala impjegatur.
Il-pjan ta’ azzjoni aġġornat dwar id-diversità u l-inklużjoni ġie adottat fi tmiem l-2022 wara konsultazzjonijiet interni estensivi. Dan jistabbilixxi l-azzjonijiet ewlenin ippjanati madwar id-diversità u l-inklużjoni għall-2023 u l-2024 bħala parti mill-implimentazzjoni tal-Istrateġija tar-Riżorsi Umani.