Ilkoll nafu lil xi ħadd milqut mill-kanċer. Madwar 2.7 miljun persuna fl-Unjoni Ewropea jiġu dijanjostikati bil-kanċer kull sena, u dan in-numru huwa previst li jikber fil-futur. Madwar 40% tal-każijiet ta’ kanċer fl-UE jistgħu jiġu evitati. Jeżistu vaċċini sikuri u effettivi u jistgħu jsalvaw ħafna ħajjiet.
Għalhekk, il-Kummissjoni ressqet rakkomandazzjonijiet ġodda biex tappoġġja lill-Istati Membri fl-isforzi tagħhom biex jipprevjenu l-kanċer permezz tat-tilqim, bħala parti mill-Pjan tal-Ewropa biex Jingħeleb il-Kanċer. Din tirrakkomanda b’mod sinifikanti iż-żieda fit-teħid ta’ żewġ vaċċini ewlenin li jistgħu jipprevjenu infezzjonijiet virali li jistgħu jwasslu għall-kanċer:
- Papillomaviruses umani (HPV)
- Virus tal-epatite B (HBV)
Il-kopertura ta’ dan it-tilqim għandha wkoll tiġi mmonitorjata aktar mill-qrib.
Il-miżuri l-ġodda jinkludu:
- l-iżgurar li t-tilqim ikun faċilment aċċessibbli u b’xejn
- l-integrazzjoni tal-programmi tat-tilqim kontra l-HPV u l-HBV fil-pjanijiet nazzjonali għall-prevenzjoni tal-kanċer
- l-istabbiliment ta’ miri konkreti
- it-tisħiħ tal-komunikazzjoni u s-sensibilizzazzjoni
- it-titjib tal-monitoraġġ u r-rappurtar tal-kopertura tat-tilqim permezz tal-implimentazzjoni ta’ reġistri elettroniċi tat-tilqim
- l-iskambju tal-aħjar prattiki.
Il-kopertura tat-tilqim kontra l-HPV hija ferm inqas minn 50% f’ħafna Stati Membri. Hemm ukoll nuqqas sinifikanti ta’ data dwar ir-rati tat-tilqim kontra l-HBV. Il-mira tal-Pjan tal-Ewropa biex Jingħeleb il-Kanċer hija li jitlaqqmu 90% tal-bniet u għadd sinifikanti ta’ subien kontra l-HPV sal-2030. Il-Kummissjoni ddedikat l-akbar baġit li qatt sar għall-ġlieda kontra l-kanċer, inklużi €4 biljun mill-programm EU4Health u strumenti oħra.
Għal iktar informazzjoni
Pjan tal-Ewropa kontra l-kanċer
Skeda informattiva dwar il-prevenzjoni tal-kanċer permezz tat-tilqim
Skeda informattiva – kif il-Pjan tal-Ewropa biex Jingħeleb il-Kanċer qed jagħmel differenza
Video – ilkoll nafu lil xi ħadd milqut mill-kanċer
Mistoqsijiet u Tweġibiet dwar it-tipi ta’ kanċer li jistgħu jiġu evitati bit-tilqim
Dettalji
- Data tal-pubblikazzjoni
- 2 Frar 2024
- Awtur
- Id-Direttorat Ġenerali għall-Komunikazzjoni