Il-G20 hu l-forum internazzjonali li jiġbor flimkien l-akbar 20 ekonomija u li qed jikbru bl-aktar mod mgħaġġel. Il-membri tiegħu jirrappreżentaw aktar minn 80% tal-PDG dinji, 75% tal-kummerċ globali u 60% tal-popolazzjoni tal-pjaneta.
L-Unjoni Ewropea hi membru sħiħ tal-G20, flimkien ma’ tlieta mill-Istati Membri tagħha: Franza, il-Ġermanja, u l-Italja. Spanja u n-Netherlands huma mistiedna għal-laqgħat tal-G20 bħala mistednin. Ursula von der Leyen, il-President tal-Kummissjoni Ewropea, u Charles Michel, il-President tal-Kunsill Ewropew, jirrappreżentaw lill-Unjoni Ewropea fil-G20.
L-Unjoni Ewropea hi waħda mill-akbar ekonomiji fid-dinja u hi l-akbar żona ta’ suq uniku fid-dinja, li tirrappreżenta madwar 15% tal-prodott domestiku gross dinji (2021). L-Unjoni Ewropea tirrappreżenta madwar 6% tal-popolazzjoni dinjija, li tinqabeż biss miċ-Ċina u l-Indja meta niġu għan-numru ta’ nies li tirrappreżenta fil-laqgħa tas-Summit tal-G20.
Summit ta’ New Delhi, 9-10 ta’ Settembru 2023
Is-Summit tal-G20 ta’ din is-sena, ospitat mill-presidenza Indjana tal-G20, sar fid-9 u l-10 ta’ Settembru 2023 fi New Delhi. Hu laqqa’ flimkien Kapijiet ta’ Stat u ta’ Gvern tal-membri tal-G20 u stieden pajjiżi u rappreżentanti ta’ xi wħud mill-organizzazzjonijiet internazzjonali u reġjonali ewlenin. Bit-tema “Dinja Waħda – Familja Waħda – Futur Wieħed” il-parteċipanti ddiskutew, fost suġġetti oħrajn
- Il-gwerra tar-Russja kontra l-Ukrajna
- It-tkabbir b’saħħtu, sostenibbli, ibbilanċjat u inklużiv
- L-aċċelerazzjoni tal-progress fl-Għanijiet ta’ Żvilupp Sostenibbli (SDGs)
- Il-patt ta’ żvilupp ekoloġiku għal futur sostenibbli
- L-istituzzjonijiet multilaterali għas-seklu 21
- It-trasformazzjoni teknoloġika u infrastruttura pubblika diġitali
- It-tassazzjoni internazzjonali
- L-ugwaljanza bejn il-ġeneri u t-tisħiħ tal-pożizzjoni tan-nisa u l-bniet kollha
- Il-kwistjonijiet tas-settur finanzjarju
- Il-ħolqien ta’ dinja aktar inklużiva
L-Indja qed tippjana li torganizza laqgħa virtwali finali tal-Mexxejja qabel l-aħħar ta’ Novembru.
Fis-Summit ta’ din is-sena, l-Unjoni Afrikana ntlaqgħet bħala membru permanenti tal-G20. L-UE ilha sostenitur qawwi tal-inklużjoni tal-Unjoni Afrikana fil-G20 bħala membru sħiħ sa mill-bidu tal-laqgħat tal-G20. Jidher ċar li din hi rebħa għas-summit tal-G20 u għall-kontinent Afrikan.
It-tisħiħ tal-infrastruttura kritika fid-dinja kollha
Sentejn wara t-tnedija tal-inizjattiva tas-Sħubija għall-Infrastruttura u l-Investiment Globali (PGII) tal-G7, il-President von der Leyen enfasizzat, fis-summit tal-G20 fi New Delhi, il-kontribut ewlieni tal-UE għal tnejn mill-proġetti ewlenin tal-PGII.
Il-Kuritur Ekonomiku Indja – Lvant Nofsani – Ewropa se jgħaqqad it-tliet reġjuni permezz ta’ infrastruttura ta’ konnettività tal-ogħla livell. Dan se jgħin biex iġib ir-relazzjoni ekonomika bejn dawn ir-reġjuni f’livell ġdid u jipprovdi aċċess imtejjeb għall-prodotti, l-enerġija u d-data liċ-ċittadini u lin-negozji.
L-għan ta’ dan il-kuritur hu li:
- jintegra l-linji ferrovjarji u l-konnessjonijiet tal-portijiet mill-Indja lejn l-Ewropa, li jwasslu għal ħin ta’ tranżitu aktar faċli u aktar mgħaġġel għall-oġġetti
- jiżviluppa infrastruttura tal-enerġija li tippermetti l-produzzjoni u t-trasport tal-idroġenu ekoloġiku
- isaħħaħ it-telekomunikazzjoni u t-trasferimenti tad-data bis-saħħa ta’ konnessjoni ġdida bil-cable taħt il-baħar
L-UE qed tingħaqad ukoll mal-Istati Uniti biex tippromwovi l-proġett tal-Kuritur Trans-Afrikan. Dan se jgħaqqad il-port ta’ Lobito fl-Angola mar-reġjun ta’ Katanga fir-Repubblika Demokratika tal-Kongo u ċ-ċinturin tar-ram fiż-Żambja. Hu se jgħin biex jitrawwem l-investiment fil-ktajjen tal-valur lokali biex tiġi ttrasformata l-materja prima estratta, sabiex il-prodotti minn dawn ir-reġjuni jingħataw aċċess għas-swieq dinjija u jittejbu l-opportunitajiet ta’ mobbiltà għaċ-ċittadini.
L-UE hi attur ewlieni fil-PGII permezz tal-inizjattiva Global Gateway tagħha, li se tattiva €300 biljun ta’ investimenti fi proġetti ta’ konnettività kritika bejn l-2021 u l-2027. Nofs l-investimenti huma destinati għall-Afrika.
Presidenzi futuri tal-G20
Il-Brażil se jieħu post l-Indja fil-Presidenza tal-G20 mill-1 ta’ Diċembru 2023, segwit mill-Afrika t’Isfel fl-2025.
Is-Summit tal-G20 tal-Brażil hu skedat għat-18-19 ta’ Novembru 2024 f’Rio de Janeiro. Il-prijoritajiet irrapportati tal-Presidenza Brażiljana huma:
- l-inklużjoni soċjali u l-ġlieda kontra l-ġuħ
- it-tranżizzjoni tal-enerġija u l-iżvilupp sostenibbli fit-tliet aspetti tagħha (soċjali, ekonomiċi u ambjentali)
- riforma tal-istituzzjonijiet ta’ governanza globali
Dawn il-prijoritajiet huma riflessi fil-motto tal-Presidenza tal-Brażil tal-G2O: “Nibnu dinja ġusta u pjaneta sostenibbli.”