Nippreservaw l-ambjent tagħna
L-ibħra, l-oċeani u l-ambjent tal-Ewropa huma sors ta’ ġid naturali u ekonomiku għall-Ewropa. Irridu nippreservawhom u nipproteġuhom biex niżguraw li dawn ikomplu jsostnuna fil-futur.
Il-prijoritajiet tal-Patt Ekoloġiku Ewropew jinkludu
- il-protezzjoni tal-bijodiversità u tal-ekosistemi tagħna
- it-tnaqqis tat-tniġġis tal-arja, tal-ilma u tal-ħamrija
- iċ-ċaqliq lejn ekonomija ċirkolari
- it-titjib tal-immaniġġjar tal-iskart
- l-iżgurar tas-sostenibbiltà tal-ekonomija blu u tas-setturi tas-sajd tagħna
Permezz tal-ħidma fuq dawn l-oqsma ewlenin, l-UE se ttejjeb is-saħħa u l-kwalità tal-ħajja taċ-ċittadini, tindirizza l-problemi ambjentali u tnaqqas l-emissjonijiet tal-gassijiet serra.
Il-Kummissjoni Ewropea adottat sett ta’ proposti leġiżlattivi biex il-politiki tal-UE dwar il-klima, l-enerġija, t-trasport u t-tassazzjoni jiġu adattati sabiex inaqqsu l-emissjonijiet tal-gassijiet serra b’mill-anqas 55% sal-2030, meta mqabbla mal-livelli tal-1990. Aktar informazzjoni dwar Inwettqu l-Patt Ekoloġiku Ewropew.
Fiċ-ċentru tal-attenzjoni
5 ta’ Lulju 2023 - B’reazzjoni għall-inizjattiva taċ-ċittadini Ewropej “Waqqaf it-tneħħija tal-pinen tal-klieb il-baħar – Waqqaf il-kummerċ”, il-Kummissjoni ħabbret azzjonijiet biex ittemm il-prattika krudili u illegali. “It-tneħħija tal-pinen” tirreferi għat-tneħħija tal-pinen ta’ kelb il-baħar u r-rimi tal-annimal lura fil-baħar, spiss waqt li jkun għadu ħaj. L-azzjonijiet proposti mill-Kummissjoni jinkludu l-eżami tal-opportunità li tittieħed inizjattiva leġiżlattiva biex jintemm il-kummerċ ta’ pinen sfużi, il-bidu ta’ valutazzjoni tal-impatt u t-titjib tal-istatistika relatata mal-prattika.
