Espansjoni ta’ pjattaformi online innovattivi fl-UE
Is-servizzi diġitali fl-UE bħalissa jridu jittrattaw ma’ 27 sett differenti ta’ regoli nazzjonali. L-ikbar kumpaniji biss jistgħu jittrattaw mal-ispejjeż tal-konformità li jirriżultaw.
X’se jbiddel l-Att dwar is-Servizzi Diġitali l-ġdid:
- Se japplikaw l-istess regoli fl-Unjoni kollha u se jkunu l-bażi ta’ suq domestiku kbir biex is-servizzi diġitali jikbru u jirnexxu. Il-kummerċ diġitali transfruntier fis-suq uniku hu mistenni li jiżdied sa 2%
- L-atturi ż-żgħar se jkollhom ċertezza legali biex jiżviluppaw is-servizzi u jipproteġu lill-utenti minn attivitajiet illegali u se jkunu appoġġjati minn standards, kodiċijiet ta’ kondotta u linji gwida
- L-intrapriżi ż-żgħar u l-mikrointrapriżi jiġu eżentati mill-obbligi l-aktar għaljin, iżda huma liberi li japplikaw l-aħjar prattiki, għall-vantaġġ kompetittiv tagħhom
- Appoġġ għall-espansjoni: L-eżenzjonijiet għall-intrapriżi żgħar jiġu estiżi għal 12-il xahar wara li jkunu espandew lil hinn mill-fatturat u l-limiti massimi tal-istaff li jikkwalifikawhom bħala kumpaniji żgħar
61% ta’ dawk li wieġbu stħarriġ tal-Ewrobarometru jgħidu li ltaqgħu ma’ kontenut illegali online, u 66.5% jgħidu li ma jaħsbux li l-Internet hu sikur għall-utenti.
Billi jiġu indirizzati l-attivitajiet u l-prodotti illegali online, in-negozji leġittimi jistgħu jirnexxu online.
X’se jbiddel l-Att dwar is-Servizzi Diġitali l-ġdid:
- It-tneħħija tad-diżinċentivi għall-kumpaniji biex jieħdu miżuri volontarji biex jipproteġu lill-utenti tagħhom minn kontenut, oġġetti jew servizzi illegali
- In-negozji se jużaw mekkaniżmi sempliċi u effettivi biex jissenjalaw kontenut u oġġetti illegali li jiksru d-drittijiet tagħhom, inklużi d-drittijiet tal-proprjetà intellettwali, jew jikkompetu fuq livell inġust
- In-negozji jistgħu jsiru wkoll “senjalaturi fdati” ta’ kontenut u oġġetti illegali, bi proċedura ta’ prijorità speċjali u kooperazzjoni stretta mal-pjattaformi
- Obbligi msaħħa għas-swieq biex japplikaw miżuri dissważivi, bħal politiki ta’ “kun af il-klijent kummerċjali tiegħek”, jagħmlu sforzi raġonevoli biex iwettqu kontrolli aleatorji fuq prodotti mibjugħa fuq is-servizz tagħhom, jew jadottaw teknoloġiji ġodda għat-traċċabbiltà tal-prodott
L-SMEs u n-negozji ġodda huma dipendenti fuq it-termini u l-kundizzjonijiet tal-pjattaformi l-kbar dwar kif il-kontenut tagħhom jiġi kklassifikat u rreklamat, u kif huma mmoderati l-mezzi ta’ komunikazzjoni tagħhom permezz tal-pjattaformi. In-negozji m’għandhomx aċċess għal data relatata mal-konsumaturi tagħhom u li tirriżulta mill-attività tagħhom fuq pjattaforma ta’ gwardjan filwaqt li data bħal din tippermetti lin-negozju jadatta l-istrateġija tas-suq tiegħu. Dan hu problematiku għan-negozji f’kompetizzjoni diretta ma’ gwardjan li jista’ juża din id-data għall-interess tiegħu stess.
X’se jibdlu r-regoli l-ġodda:
- L-Att dwar is-Servizzi Diġitali se jagħmel il-proċessi interni tal-pjattaformi online aktar trasparenti, u se jippermetti deċiżjonijiet kummerċjali aktar infurmati.
- L-Att dwar is-Swieq Diġitali se jagħti lin-negozji aċċess għal ċerta data miżmuma mill-gwardjani. Se jkunu jistgħu jagħżlu wkoll fost pjattaformi differenti fejn joffru s-servizzi jew il-prodotti tagħhom. Se jkollhom ukoll possibbiltà akbar li jaqilbu u jikkombinaw is-servizzi skont il-ħtiġijiet tagħhom.
Suq intern ġust u bbilanċjat
Xi drabi, il-gwardjani jaqdu rwol doppju u jiffavorixxu s-servizzi tagħhom stess, li jwassal għall-esklużjoni tal-utenti kummerċjali li huma dipendenti fuqhom biex jaslu għand il-konsumaturi. Dan inaqqas l-għażla għan-negozji, potenzjalment idgħajjef il-kwalità tas-servizz u jżid il-prezzijiet għall-konsumaturi.
88% tan-negozji u tal-utenti kummerċjali ltaqgħu ma’ kundizzjonijiet kummerċjali inġusti fuq pjattaformi kbar, skont l-eżitu tal-Konsultazzjoni pubblika miftuħa dwar Għodda Ġdida tal-Kompetizzjoni.
X’se jbiddel l-Att dwar is-Swieq Diġitali l-ġdid:
- Se jiftaħ opportunitajiet ġodda għan-negozji, li se jkunu jistgħu jinnovaw u jikkompetu kontra s-servizzi tal-gwardjani f’termini ugwali.
- Il-konsumaturi se jkunu jistgħu jaraw liema huma l-aħjar għażliet disponibbli u mhux biss dawk li l-gwardjani jriduhom jaraw.
Aktar ċertezza legali għan-negozji
Il-pjattaformi tal-gwardjani għandhom is-setgħa li jaġixxu bħala produtturi privati tar-regoli li jistgħu jimponu b’mod unilaterali termini u kundizzjonijiet fuq l-utenti kummerċjali tagħhom.
X’se jbiddel l-Att dwar is-Swieq Diġitali l-ġdid:
- L-utenti kummerċjali se jkunu jafu x’għandhom jistennew meta jittrattaw mal-gwardjani.
- Il-gwardjani se jkunu jafu l-obbligi ċari applikabbli għalihom.
- Ir-regoli ta’ proċedura definiti b’mod ċar se jiżguraw deċiżjonijiet rapidi li se jissarrfu f’vantaġġi rapidi kemm għall-utenti kummerċjali kif ukoll għall-konsumaturi.
Swieq kontestabbli
Il-livell ta’ konċentrazzjoni tas-setgħa ekonomika fis-swieq diġitali hu bla preċedent:
X’se jbiddel l-Att dwar is-Swieq Diġitali l-ġdid:
- Se jippermetti lin-negozji jkollhom aċċess għal aktar informazzjoni dwar il-prestazzjoni tal-prodotti jew tas-servizzi tagħhom fuq pjattaformi ta’ partijiet terzi.
- Se jieqaf il-klassifikar inġust tas-servizzi u l-prodotti proprji tal-gwardjani mqabbla ma’ dawk offruti minn negozji oħrajn fuq l-istess pjattaforma
- In-negozji se jkunu jistgħu jattiraw aktar faċilment lill-konsumaturi li mhux se jkunu jistgħu jibqgħu jiġu msakkrin mill-pjattaformi tal-gwardjani
- Ir-regoli l-ġodda se jagħmluha aktar faċli għan-negozji ż-żgħar u n-negozji l-ġodda biex jikbru u jespandu, u jikkompetu mal-pjattaformi tal-gwardjani.
- Aktar kompetizzjoni mistennija li twassal għal potenzjal akbar ta’ innovazzjoni fost in-negozji ż-żgħar kif ukoll kwalità tas-servizz imtejba, b’żidiet assoċjati fil-benessri tal-konsumaturi.
L-Att dwar is-Swieq Diġitali hu mistenni li jwassal għal surplus tal-konsumatur ta’ madwar €13-il biljun. Iż-żieda fl-opportunitajiet għal diversità ta’ operaturi tas-suq se twassal għal żieda fl-investiment min-naħa tagħhom. Dan mistenni li jkollu impatt fuq it-tkabbir ekonomiku li jvarja bejn €12-il biljun u €23 biljun.
Aktar impjiegi
Il-gwardjani huma gateways meħtieġa għas-suq intern Ewropew. Dawn huma pjattaformi li għandhom impatt sinifikanti fuq is-suq intern, iservu bħala gateway importanti għall-utenti kummerċjali biex jilħqu lill-konsumaturi tagħhom, u li jgawdu, jew prevedibbilment se jgawdu, minn pożizzjoni stabbilita u durabbli.