Rialacha do sheirbhísigh shibhialta an Aontais Eorpaigh
Tá baill na seirbhíse sibhialta Eorpaí faoi réir roinnt ceart agus oibleagáidí lena rialaítear a gcuid gníomhartha agus a n-iompar agus iad i mbun a ngníomhaíochtaí gairmiúla.
Tá na rialacha sin sna Rialacháin Foirne agus sa Chód um Dhea-iompraíocht Riaracháin, rud atá i gceangal le Rialacha Nós Imeachta an Choimisiúin. Na coinbhleachtaí leasa a d’fhéadfadh a bheith ann, cuimsíonn siad bronntanais agus gradaim a fhaightear, gníomhaíochtaí seachtracha le linn do na baill foirne a bheith ag obair don Aontas Eorpach, agus fostaíocht i ndiaidh dóibh scor d'obair an Aontais.
Tá rialacha ar leith ann do na Coimisinéirí Eorpacha.
Gearáin
Is féidir le saoránaigh gearán a dhéanamh má mheasann siad gur sháraigh an Coimisiún Eorpach na prionsabail maidir le seirbhís phoiblí atá leagtha amach sa Chód um Dhea-iompraíocht Riaracháin.
Coinbhleachtaí leasa
Tá sé d'oibleagáid ar fhoireann an Aontais Eorpaigh bheith neamhspleách neamhchlaonta oibiachtúil dílis. Aon leas pearsanta nó aon leas in aon ghnólacht nó in aon eagraíocht a d'fheadfadh comhlíonadh na n-oibleagáidí sin a chur i mbaol, ní mór an leas sin a dhearbhú láithreach bonn.
Ní mór faomhadh roimh ré a fháil do ghníomhaíochtaí seachtracha a thagann faoi na rialacha seo, bíodh íocaíocht i gceist leo nó ná bíodh. Ní mór do na baill foirne an institiúid a bhfuil siad ag obair di a chur ar an eolas freisin:
- má tá a gcéile fostaithe agus an áit a bhfuil sé/sí fostaithe; nó
- má tá aon leas pearsanta ann a d'fhéadfadh a neamhspleáchas a chur i mbaol, nó má thagann aon choinbhleacht leasa eile i gceist agus a gcuid dualgais á ndéanamh acu.
Bronntanais a fháil
Ní féidir le baill foirne an Aontais Eorpaigh glacadh le bronntanais ó thríú páirtithe nó bheith faoi chomaoin acu gan cead a fháil roimh ré, ach amháin más lú ná €50 luach an bhronntanais agus gan luach carnach os a chionn sin i gceist.
Tar éis an post a fhágáil
Más mian le ball foirne de chuid an Aontais Eorpaigh a institiúid a fhágáil agus post nua a thosú laistigh de 2 bliana, ní mór dó sin a chur in iúl don Choimisiún chun réamhúdarú a fháil.
Má bhaineann an ghníomhaíocht sin leis an obair a rinne siad le linn na 3 bliana deiridh a chaith siad leis an gCoimisiún agus dá bhféadfadh an obair sin a bheith i gcoinbhleacht le leasanna dlisteanacha an Choimisiúin, d'fhéadfadh an Coimisiún é a chosc nó cead a thabhairt dó, faoi réir aon choinníoll riachtanacha.
Tá cosc i bprionsabal ar oifigigh shinsearacha, sna 12 mhí tar éis dóibh imeacht ón tseirbhís, dul i mbun brústocaireachta nó aon chineáil abhcóideachta eile i leith na hinstitiúide ina raibh siad fostaithe maidir le nithe a raibh siad freagrach astu le linn na 3 bliana deiridh ag obair san institiúid sin dóibh.
Documents