L-Enerġija u l-Patt Ekoloġiku

Tranżizzjoni lejn enerġija nadifa

Il-produzzjoni u l-użu tal-enerġija jirrappreżentaw aktar minn 75% tal-emissjonijiet tal-gassijiet serra tal-UE.Id-dekarbonizzazzjoni tas-sistema tal-enerġija tal-UE hi għalhekk kruċjali biex nilħqu l-objettivi klimatiċi tagħna għall-2030 u l-istrateġija fit-tul tal-UE biex tinkiseb in-newtralità tal-karbonju sal-2050.

Il-Patt Ekoloġiku Ewropew jiffoka fuq 3 prinċipji ewlenin għat-tranżizzjoni lejn enerġija nadifa, li se jgħinu biex jitnaqqsu l-emissjonijiet tal-gassijiet serra u jtejbu l-kwalità tal-ħajja taċ-ċittadini tagħna:

jiżgura provvista tal-enerġija tal-UE sikura u bi prezz raġonevoli
jiżviluppa suq tal-enerġija tal-UE kompletament integrat, interkonness u diġitalizzat
jagħti prijorità lill-effiċjenza fl-enerġija, itejjeb il-prestazzjoni tal-enerġija tal-bini tagħna u jiżviluppa s-settur tal-enerġija bbażat l-aktar fuq sorsi rinnovabbli

L-għanijiet ewlenin tal-Kummissjoni biex tikseb dan huma:

il-bini ta’ sistemi tal-enerġija interkonnessi u grilji integrati aħjar biex jappoġġjaw sorsi tal-enerġija rinnovabbli
il-promozzjoni tat-teknoloġiji innovattivi u infrastruttura moderna
it-tisħiħ tal-effiċjenza fl-enerġija u l-ekodisinn tal-prodotti
id-dekarbonizzazzjoni tas-settur tal-gass u l-promozzjoni tal-integrazzjoni intelliġenti bejn is-setturi
l-għoti ta’ aktar saħħa lill-konsumaturi u l-Istati Membri jiġu megħjunin jindirizzaw il-faqar
il-promozzjoni tal-istandards tal-enerġija u t-teknoloġiji tal-UE fuq livell globali
l-iżvilupp tal-potenzjal sħiħ tal-enerġija mir-riħ lil hinn mill-kosta

Il-Kummissjoni Ewropea adottat sett ta’ proposti leġiżlattivi sabiex il-politiki tal-UE dwar il-klima, l-enerġija, t-trasport u t-tassazzjoni tagħmilhom tajbin biex inaqqsu l-emissjonijiet tal-gassijiet serra b’mill-anqas 55% sal-2030, meta mqabbla mal-livelli tal-1990. Aktar informazzjoni dwar Inwettqu l-Patt Ekoloġiku Ewropew.

Fiċ-ċentru tal-attenzjoni

Pjanijiet nazzjonali għall-enerġija u l-klima

Biex jintlaħqu l-miri tal-enerġija u tal-klima tal-UE għall-2030, il-pajjiżi tal-UE jeħtieġ li jistabbilixxu pjan nazzjonali integrat għall-enerġija u l-klima (NECP) fuq 10 snin għall-perjodu mill-2021 sal-2030. Il-pjanijiet nazzjonali jiddeskrivu kif il-pajjiżi tal-UE beħsiebhom jindirizzaw ħames oqsma: l-enerġija rinnovabbli, l-effiċjenza enerġetika, it-tnaqqis tal-emissjonijiet tal-gassijiet serra, l-interkonnessjonijiet u r-riċerka u l-innovazzjoni.

Pjanijiet nazzjonali għall-enerġija u l-klima