L-implimentazzjoni tal-Ftehim dwar il-Ħruġ teħtieġ azzjoni kemm fil-livell tal-UE kif ukoll fil-livell tal-Istati Membri.
Kwalunkwe ftehim huwa tajjeb biss skont kemm jiġi implimentat b’mod effettiv. L-implimentazzjoni tal-Ftehim dwar il-Ħruġ tinvolvi l-adozzjoni ta’ atti legali mill-Unjoni Ewropea, l-Istati Membri tagħha u r-Renju Unit, kif ukoll l-implimentazzjoni bl-adozzjoni ta’ politiki u miżuri relatati mal-ħruġ tar-Renju Unit. Dan jinkludi wkoll ir-responsabbiltà li tiġi mmonitorjata l-implimentazzjoni miż-żewġ Partijiet u li tiġi żgurata l-konformità.
Xi oqsma se jkunu ta’ xogħol partikolarment intensiv mill-1 ta’ Jannar 2021, jiġifieri:
- it-tkomplija tal-ħidma tal-Kumitat Konġunt biex jissorvelja l-implimentazzjoni tal-Ftehim dwar il-Ħruġ. Dan hu magħmul minn rappreżentanti tal-UE u r-Renju Unit, u ppresedut b’mod konġunt minnhom.
- l-implimentazzjoni tal-Protokoll dwar l-Irlanda u l-Irlanda ta’ Fuq, li jirrikjedi arranġamenti mingħajr preċedent f’għadd ta’ oqsma, b’mod partikolari fir-rigward tad-dwana, u miżuri veterinarji u fitosanitarji.
- l-implimentazzjoni tad-dispożizzjonijiet dwar id-Drittijiet taċ-Ċittadini li teħtieġ ukoll monitoraġġ mill-qrib mill-Kummissjoni Ewropea.
- l-implimentazzjoni tas-saldu finanzjarju, li jiżgura li r-Renju Unit u l-UE se jonoraw l-obbligi finanzjarji kollha meħuda waqt li r-Renju Unit kien membru tal-Unjoni Ewropea.