L-ambjent online tal-UE qed isir post aktar sikur, aktar ġust u aktar trasparenti fis-17 ta’ Frar, meta l-ġabra tar-regoli storiku tagħha, l-Att dwar is-Servizzi Diġitali, tidħol fis-seħħ kompletament. Dan se jara responsabbiltajiet ġodda imposti fuq pjattaformi online li għandhom utenti fl-UE, bl-għan li dawk l-utenti u d-drittijiet tagħhom jiġu protetti aħjar.
Ir-regoli, li kienu diġà applikaw għal għadd ta’ pjattaformi kbar ħafna u magni tat-tiftix kbar ħafna mill-2023, se jibdew japplikaw għall-pjattaformi u s-servizzi ta’ hosting kollha. Dan ifisser li lkoll se jkollhom bżonn jimplimentaw għadd ta’ miżuri differenti biex jagħtu s-setgħa lill-utenti. Dan jinkludi:
- niġġieldu l-kontenut illegali, l-oġġetti u s-servizzi illegali billi l-utenti jingħataw il-mezzi biex jissenjalaw tali attività illegali
- nipproteġu l-minuri, anke billi nipprojbixxu għalkollox li l-minorenni jkunu l-mira ta’ reklami bbażati fuq xi profiling jew data personali tagħhom
- nagħtu s-setgħa lill-utenti b’informazzjoni dwar ir-reklami li jaraw, bħal pereżempju għalfejn ikunu qed jaraw dawk ir-reklami partikolari u min ikun ħallas għar-reklam
- nipprojbixxu r-reklami mmirati għall-utenti skont xi data sensittiva, bħat-twemmin politiku jew reliġjuż, il-preferenzi sesswali, u l-bqija.
- niffaċilitaw is-sottomissjoni tal-ilmenti u l-kuntatt magħhom
Biex jgħinu lill-Kummissjoni timmonitorja u tinforza l-obbligi f’din il-liġi l-ġdida, l-awtoritajiet responsabbli se jgħinu biex jiġi żgurat li l-pjattaformi jaqdu r-regoli f’kull pajjiż tal-UE. Flimkien mal-Kummissjoni, dawn se jiffurmaw korp konsultattiv biex jiżguraw li r-regoli jiġu applikati b’mod konsistenti, u li l-utenti fl-UE kollha jgawdu l-istess drittijiet.
Għal iktar informazzjoni:
L-Att dwar is-Servizzi Diġitali
Pjattaformi online u magni tat-tiftix kbar ħafna
Dettalji
- Data tal-pubblikazzjoni
- 16 Frar 2024
- Awtur
- Id-Direttorat Ġenerali għall-Komunikazzjoni