Fi tmiem it-28 Konferenza tan-NU dwar it-Tibdil fil-Klima (COP28), l-Unjoni Ewropea u l-mexxejja dinjija impenjaw ruħhom mill-ġdid li jilħqu l-għanijiet tal-Ftehim ta’ Pariġi u jillimitaw iż-żieda fit-temperatura medja globali għal 1.5 Celsius. Huma qablu li jaċċelleraw it-tnaqqis tal-emissjonijiet lejn żero netti sal-2050, b’azzjoni urġenti f’dan id-deċennju kritiku. Dan jinkludi t-tranżizzjoni lil hinn mill-fjuwils fossili u t-tnaqqis tal-emissjonijiet globali b’43% sal-2030.
Impenji u azzjonijiet ewlenin imħabbra mill-UE fil-COP28:
- impenn Globali dwar l-Enerġija Rinnovabbli u l-Effiċjenza Enerġetika biex tittriplika l-kapaċità tal-enerġija rinnovabbli u tirdoppja r-rata ta’ titjib fl-effiċjenza enerġetika sal-2030. €2.3 biljun mill-baġit tal-UE se jappoġġjaw it-tranżizzjoni tal-enerġija fil-viċinat Ewropew u madwar id-dinja
- €175 miljun f’appoġġ finanzjarju mill-UE u l-Istati Membri tagħha biex jitnaqqsu l-emissjonijiet tal-metan
- aktar minn €400 miljun f’finanzjament mill-UE u l-Istati Membri tagħha biex jiġi attivat fond ġdid għat-telf u l-ħsara għall-emerġenzi klimatiċi
- l-ewwel żewġ proġetti ta’ teknoloġija nadifa Ewropej li għandhom jiġu appoġġjati mis-sħubija UE-Catalyst biex jgħinu lill-UE tilħaq il-miri klimatiċi tagħha għall-2030
- kontribut ta’ €20 biljun ta’ Tim Ewropa għall-Inizjattiva għall-Enerġija Ekoloġika bejn l-Afrika u l-UE
- inizjattiva ġdida ta’ Tim Ewropa ffukata fuq ktajjen tal-valur mingħajr deforestazzjoni
Il-Konferenza tal-Partijiet għall-Konvenzjoni Qafas tan-Nazzjonijiet Uniti dwar it-Tibdil fil-Klima, hija summit internazzjonali ta’ kull sena fejn il-mexxejja dinjija, l-esperti ambjentali, l-attivisti, u l-partijiet ikkonċernati jiltaqgħu biex jiddiskutu u jinnegozjaw azzjonijiet għall-ġlieda kontra t-tibdil fil-klima.
Għal iktar informazzjoni
L-UE fil-Konferenza dwar it-Tibdil fil-Klima COP28
L-azzjoni klimatika u l-Patt Ekoloġiku
Dikjarazzjoni tal-President von der Leyen dwar l-eżitu tal-COP28
Dettalji
- Data tal-pubblikazzjoni
- 13 Diċembru 2023
- Awtur
- Id-Direttorat Ġenerali għall-Komunikazzjoni