It-titjib tal-benessri tal-annimali

Il-Kummissjoni Ewropea pproponiet regoli ġodda biex ittejjeb il-benessri tal-klieb u l-qtates fl-UE, u l-kundizzjonijiet għall-annimali waqt it-trasport. Hija rrispondiet ukoll għal inizjattiva taċ-ċittadini li tipprojbixxi t-trobbija ta’ annimali għall-pil fl-UE.

Benessri aħjar tal-klieb u l-qtates

B’aktar minn 72 miljun kelb u aktar minn 83 miljun qattus fl-UE, il-valur stmat tal-bejgħ ta’ klieb u qtates huwa ta’ €1.3 biljun fis-sena. Il-kummerċ illegali żdied f’dawn l-aħħar snin u xi stabbilimenti jżommu l-annimali f’kundizzjonijiet ħżiena. Ir-regoli l-ġodda għandhom l-għan li jarmonizzaw l-istandards tal-UE dwar il-benessri tal-klieb u l-qtates, li jkopru l-akkomodazzjoni, il-kura, it-trasport u t-trattament fl-istabbilimenti tat-tnissil, il-ħwienet u x-shelters tal-annimali domestiċi.

Regoli aħjar għat-trasport tal-annimali

Kull sena, jiġu ttrasportati 1.6 biljun annimal fl-UE u minnha. Ir-regoli l-ġodda għandhom l-għan li jillimitaw il-ħinijiet tal-ivvjaġġar u jippermettu pawżi ta’ mistrieħ barra mill-vettura matul vjaġġi twal, iżidu l-ispazju minimu u jipprojbixxu t-trasport f’temperaturi estremi. Benessri aħjar tal-annimali mhux biss huwa ta’ benefiċċju għall-annimali nfushom iżda wkoll għall-konsumaturi u l-bdiewa, peress li jikkontribwixxi għal sistemi tal-ikel sostenibbli u jgħin biex jindirizzaw ir-riskji għas-saħħa pubblika.

Aktar ħidma fuq it-trobbija ta’ annimali għall-pil

L-Inizjattiva taċ-Ċittadini Ewropej (IĊE) “Fur Free Europe” appellat għal projbizzjoni tal-UE fuq it-trobbija ta’ annimali għall-pil u l-bejgħ ta’ prodotti tal-pil. Il-Kummissjoni inkarigat lill-Awtorità Ewropea dwar is-Sigurtà fl-Ikel tipproduċi opinjoni xjentifika dwar il-kwistjoni. Fuq il-bażi ta’ din l-opinjoni, il-Kummissjoni se tiddeċiedi dwar l-aktar azzjoni xierqa u se tqis ukoll miżuri oħra biex tiżgura l-benessri tat-trobbija ta’ annimali għall-pil.

Il-pakkett dwar il-benessri tal-annimali huwa pilastru importanti tal-istrateġija “Mill-Għalqa sal-Platt”, l-aġenda tal-Patt Ekoloġiku Ewropew għal agrikoltura u produzzjoni tal-ikel aktar sostenibbli.

Għal aktar informazzjoni

Agrikoltura u Patt Ekoloġiku

Stqarrija għall-istampa: Il-Kummissjoni tipproponi regoli ġodda biex ittejjeb il-benessri tal-annimali

Mistoqsijiet u Tweġibiet dwar il-Benesseri tal-Annimali waqt it-trasport

Skeda informattiva dwar it-Trasport tal-Annimali

Mistoqsijiet u Tweġibiet dwar il-benessri tal-klieb u l-qtates

Skeda informattiva dwar il-Qtates u l-Klieb

Mistoqsijiet u Tweġibiet dwar l-Inizjattiva taċ-Ċittadini Ewropej “Fur Free Europe”