An Lipéad Oidhreachta Eorpach faighte ag seacht láithreán nua

Mar cheiliúradh ar oidhreacht chultúrtha shaibhir éagsúil na hEorpa, d’fhógair an Coimisiún Eorpach na láithreáin ar bronnadh an Lipéad Oidhreachta Eorpach orthu le haghaidh 2023. Tríd an lipéad sin a bhronnadh orthu, tugadh aitheantas do 7 láithreán stairiúla ar fud na mór-roinne as a ról suntasach maidir le stair agus cultúr na hEorpa agus forbairt an Aontais Eorpaigh. 

Seo a leanas na láithreáin bhuaiteacha: 

• Cisterscapes – Tírdhreacha Cistéirseacha a nascann an Eoraip (an Ghearmáin, an Ostair, an Pholainn, an tSeicia, an tSlóivéin) 
• Mainistir San Jerónimo de Yuste, Cuacos de Yuste (an Spáinn) 
• Músaem ár dTiarna san Áiléar (an Ísiltír) 
• Amharclann Ríoga Toone (an Bheilg) 
• Kalevala (an Fhionlainn) 
• Athenaeum na Rómáine (an Rómáin) 
• Sant’Anna di Stazzema (an Iodáil) 

Chuir an tAontas Eorpach an Lipéad Oidhreachta Eorpach ar bun in 2011 chun muintearas agus féiniúlacht a chur chun cinn i measc na nEorpach. Cuireann sé béim ar láithreáin a raibh ról tábhachtach acu maidir le stair chomhroinnte ár mór-roinne a mhúnlú. Is in 2013 a bronnadh an lipéad den chéad uair. Agus roghnú na bliana seo san áireamh, tá 67 láithreán san iomlán ar fud na hEorpa a bhfuil an lipéad acu. 

Orthu sin tá:

• séadchomharthaí 
• láithreáin nádúrtha, láithreáin faoi uisce, láithreáin seandálaíochta, láithreáin tionsclaíochta nó láithreáin uirbeacha 
• tírdhreacha cultúrtha 
• áiteanna cuimhneacháin 
• earraí cultúrtha 
• rudaí 
• oidhreacht dholáimhsithe a bhaineann le háit, an oidhreacht chomhaimseartha san áireamh 

Is féidir le gach tír rannpháirteach san Aontas suas le dhá láithreán a mholadh chun an lipéad a fháil, rud a bhronntar gach dara bliain. Is painéal Eorpach saineolaithe neamhspleácha a roghnaíonn láithreán amháin in aghaidh gach tíre rannpháirtí. Bunaithe ar an moladh sin, is é an Coimisiún Eorpach a ainmníonn na láithreáin a mbeidh an lipéad le bronnadh orthu. Roghnaíodh na 7 láithreán i mbliana as 16 láithreán is iarrthóirí.

Tuilleadh eolais

Liosta na láithreán uile ar a bhfuil an Lipéad Oidhreachta Eorpach 

Eolas maidir le searmanas bronnta na ngradam do na láithreáin bhuaiteacha 

Beartas an Aontais Eorpaigh maidir leis an oidhreacht chultúrtha 

Preaseisiúint – An Lipéad Oidhreachta Eorpach faighte ag seacht láithreán stairiúla ar fud an Aontais Eorpaigh