Laethanta Oscailte 2024: Tar ar cuairt chugainn!

Dé Sathairn an 4 Bealtaine déanfaidh institiúidí an Aontais sa Bhruiséil agus níos faide i gcéin a ndoirse a oscailt don phobal. Is cuid iad na Laethanta Oscailte de cheiliúradh an Aontais ar Lá na hEorpa an 9 Bealtaine, nuair a dhéanann an tAontas comóradh ar shíniú Dhearbhú Schuman in 1950. 

Agus na toghcháin Eorpacha le bheith ar siúl i gceann roinnt seachtainí, is deis iontach é an t-imeacht seo chun institiúidí an Aontais a fheiceáil le do shúile féin agus chun tuilleadh a fhoghlaim faoin méid a dhéanann an Eoraip ar do shon agus in éineacht leat. Is féidir leat breathnú ar fhoirgnimh an Aontais agus páirt a ghlacadh i ndíospóireachtaí, léirithe beo, cluichí agus gníomhaíochtaí eile.

Osclóidh an Coimisiún Eorpach doirse an Berlaymont, ceann de na foirgnimh is íocónaí atá againn, idir 10:00 agus 18:00. Féach leat na sráidbhailte téamacha a chuirfear ar bun don ócáid, cuir eolas ar stair an Aontais agus ar ár luachanna. Tabhair cuairt ar an seomra cruinnithe ar an 13^ú hurlár, áit a dtagann Coláiste na gCoimisinéirí le chéile gach seachtain. Téigh chuig ár stiúideonna teilifíse agus tabhair cuairt ar ár músaem beag closamhairc. Féach ar thaibhithe ealaíonta, faigh blaiseadh de chuid de na táirgí feirme Eorpacha is fearr atá againn agus cuir eolas ar an Aontas sa Bheilg. Tarraingeoidh gníomhaíochtaí speisialta aird ar chomóradh 20 bliain ar mhéadú 2004 an Aontais Eorpaigh, 25 bliana den euro agus 30 bliain den Mhargadh Aonair.  

Eagróidh institiúidí eile an Aontais go leor gníomhaíochtaí an lá céanna agus reáchtálfar imeachtaí ar fud na hEorpa agus ar fud an domhain. Féadfaidh tú cuairt a thabhairt ar an mBanc Ceannais Eorpach in Frankfurt, nó ar ionadaíocht an Choimisiúin i do thír féin, mar shampla. Nó tabhair cuairt ar fhoirgnimh na Seirbhíse Eorpaí Gníomhaíochta Seachtraí sa Bhruiséil agus ar fud an domhain, áit ar féidir leat páirt a ghlacadh i gcainteanna le hambasadóirí an Aontais, taitneamh a bhaint as ceol beo, taibhithe damhsa agus ceardlanna, agus blaiseadh a fháil ar bhia ó gach cearn den domhan.  

Tuilleadh eolais 

Clár iomlán na n-imeachtaí sa Choimisiún Eorpach 

Suíomh gréasáin Lá na hEorpa 2024 an Aontais (áit a bhfuil cláir agus eolas faoi imeachtaí in institiúidí uile an Aontais)

Preaseisiúint: Lá na hEorpa 2024: Cuireann institiúidí Eorpacha ar fud na hEorpa fáilte roimh shaoránaigh chuig a n-imeachtaí ‘Lá Oscailte’