Boroż ta’ studju
Is-sejħa għall-applikazzjonijiet għas-sena akkademika 2024-2025 issa hi miftuħa.
Il-kontribuzzjoni finanzjarja proposta għall-istudji ta’ Masters/postgradwatorji fl-Interpretazzjoni tal-Konferenzi tikkonsisti f’pagament wieħed u se tammonta għall-ekwivalenti tal-miżata tar-reġistrazzjoni (miżata għat-tagħlim u/jew miżata amministrattiva) imħallsa għas-sena akkademika 2024-2025, b’ammont massimu ta’ €3,000.
Jekk jogħġbok iċċekkja s-sejħa hawn taħt għal aktar informazzjoni dwar ir-rekwiżiti tal-eliġibbiltà u l-proċedura tal-applikazzjoni.
Skadenza għall-applikazzjonijiet
L-iskadenza għall-applikazzjonijiet hi l-Ħamis, 26 ta’ Settembru 2024, 17.00 (ħin ta’ Brussell).
Rekwiżiti tal-eliġibbiltà
Tista’ tkun eliġibbli għal borża ta’ studju jekk:
- inti rreġistrat f’kors tal-istudju ta’ masters/postgradwatorju fl-interpretazzjoni tal-konferenzi jew beħsiebek tirreġistra f’wieħed (għal korsijiet li jdumu aktar minn sena, trid tkun irreġistrat fl-aħħar sena tiegħek)
- inti ċittadin ta’ Stat Membru tal-UE jew ta’ wieħed mill-pajjiżi kandidati
- u trid tħallas / tkun ħallast miżata tar-reġistrazzjoni għall-kors tiegħek (miżata tat-tagħlim u/jew miżata amministrattiva)
U jekk tissodisfa wieħed mir-rekwiżiti li ġejjin:
a) inti rreġistrat fil-kors b’waħda mil-lingwi attivi li ġejjin (il-lingwa “A”): Il-Bulgaru, il-Kroat, iċ-Ċek, id-Daniż, l-Olandiż, l-Ingliż, l-Estonjan, il-Finlandiż, il-Franċiż, il-Ġermaniż, il-Grieg, l-Irlandiż, it-Taljan, il-Latvjan, il-Malti, il-Portugiż, is-Slovakk jew is-Sloven.
b) inti rreġistrat fil-kors b’retour għall-Ingliż, għall-Franċiż jew għall-Ġermaniż, minn waħda minn dawn il-lingwi attivi: l-Ungeriż, il-Litwan, il-Pollakk, ir-Rumen, l-Ispanjol jew l-Iżvediż.
F’kull każ, jeħtieġ li l-lingwi passivi u/jew il-lingwa retour tiegħek ikunu f’konformità mal-profili preferenzjali kif ippubblikati fis-sejħa għall-applikazzjonijiet.
