Tá OceanEye seolta ag an gCoimisiún. Is éard atá ann tionscnamh Eorpach um fhaire na n-aigéan, arb é is aidhm dó cur lenár dtuiscint ar ghníomhaíochtaí na n-aigéan agus na mara, agus feabhas a chur ar an gcaoi a mbainistímid iad. Mar chuid den tionscnamh sin, d’fhógair an tUachtarán von der Leyen go gcruthófaí an Chomhghuaillíocht Idirnáisiúnta maidir leis an gCóras Domhanda um Fhaire na nAigéan. Is Comhghuaillíocht í sin ina dtabharfar le chéile tíortha an Aontais agus comhpháirtithe idirnáisiúnta chun faire domhanda na n-aigéan a neartú, chun maoiniú a fháil agus chun dul i mbun tuilleadh comhair.
Murach na haigéin, bheadh an plainéad seo gan bheatha. Ina dhiaidh sin féin, tá níos mó brú orthu ná mar a bhí riamh cheana, mar gheall ar an athrú aeráide, an truailliú, agus rudaí nach iad. Más áil linn freagra éifeachtach a thabhairt ar ghéarchéimeanna atá ag bagairt ar an domhan mór, nó geilleagar iomaíoch a chinntiú san fhadtéarma, caithfear na haigéin a fhaire i gceart.
An Chomhghuaillíocht Idirnáisiúnta maidir leis an gCóras Domhanda um Fhaire na nAigéan
Céard é an Córas Domhanda um Fhaire na nAigéan?
Is é Coimisiún Idir-Rialtasach Aigéaneolaíochta UNESCO a dhéanann an Córas Domhanda um Fhaire na nAigéan Domhanda a chomhordú, agus is leis a chuirtear ar fáil an bonneagar domhanda le haghaidh fhaire na n-aigéan, bonneagar trína soláthraítear sonraí oscailte saor-rochtana maidir leis na haigéin. D’ainneoin an róil ríthábhachtaigh atá aige, tá an córas céanna chomh tearcmhaoinithe sin agus go bhfuil sé i mbaol. Dá bhrí sin, an Coimisiún Eorpach agus Coimisiún Idir-Rialtasach Aigéaneolaíochta UNESCO, sheol siad comhghuaillíocht idirnáisiúnta chun tuilleadh infheistíochta a shlógadh agus chun an comhordú a neartú.
An Córas Domhanda um Fhaire na nAigéan – léargas i bhfoirm figiúirí
Gealltanais don Chomhghuaillíocht Idirnáisiúnta maidir leis an gCóras Domhanda um Fhaire na nAigéan
Eagrófar imeacht gealltanais i mí Mheán Fómhair 2026 chun ranníocaíochtaí a shlógadh don chóras, agus beidh an tUachtarán von der Leyen agus Mark Carney, Príomh-Aire Cheanada, ina gcomhchathaoirligh air.
Tá sé iarrtha ag an gCoimisiún ar thíortha an Aontais, ar thíortha nach bhfuil san Aontas agus ar chomhpháirtithe ar nós eagraíochtaí neamhbhrabúsacha agus eagraíochtaí príobháideacha dul isteach sa Chomhghuaillíocht Idirnáisiúnta chun borradh a chur faoin tacaíocht d’fhaire na n-aigéan a bhuí le maoiniú cobhsaí fadtéarmach.
Ranníocfaidh an Coimisiún €62 mhilliún tríd an gClár Fís Eorpach.
Tacú le teicneolaíocht agus nuálaíocht aigéin
Neartaíonn OceanEye iarrachtaí ceannaireachta idirnáisiúnta an Aontais i dtaobh córas marthanach domhanda a bhunú um fhaire na n-aigéan. Tacaíonn an tionscnamh sin le hinfheistíocht, nuálaíocht agus comhar le haghaidh éifeachtacht agus athléimneacht fhaire domhanda na n-aigéan a neartú. Chomh maith leis sin, cuimsíonn an tionscnamh gníomhaíochtaí oideachais, cultúir agus for-rochtana chun na haigéin agus faire na n-aigéan a thabhairt níos gaire do na saoránaigh.
Cúlra
I mí an Mheithimh 2025 ghlac an Coimisiún Eorpach an Comhshocrú Eorpach um an Aigéan. Ar cheann de phríomhthosaíochtaí an Chomhshocraithe sin, tá cur chun cinn taighde, eolais, scileanna agus nuálaíochta maidir leis an aigéan. Cuid ríthábhachtach den iarracht sin is ea OceanEye. Cé go bhfuil infheistíochtaí nach beag i bhfaire na n-aigéan déanta ag an Aontas agus ag tíortha an Aontais cheana, is féidir na hiarrachtaí sin a neartú agus a leathnú a thuilleadh.
Nuashonraíodh an leathanach seo den uair dheireanach an 18 Meitheamh 2026