Komunikazzjoni u żieda fil-viżibbiltà tal-UE

10 modi kif dawk li jirċievu finanzjament mill-UE jistgħu jikkomunikaw u jiżguraw il-viżibbiltà tal-UE

• 

  Ir-riċevituri kollha tal-finanzjament tal-UE għandhom obbligu ġenerali li jirrikonoxxu l-oriġini u jiżguraw il-viżibbiltà ta’ kwalunkwe finanzjament riċevut tal-UE.
  
  Skont il-programm, normalment tintalab tiddeskrivi x’qed tippjana li tagħmel f’dan ir-rigward.

• 

  Kull programm tal-UE jimplimenta l-prijoritajiet politiċi tal-UE.
  
  Hu importanti li torbot dawn il-prijoritajiet fl-attivitajiet ta’ komunikazzjoni tiegħek, sabiex turi liċ-ċittadini l-istampa l-kbira u kif il-proġett tiegħek jikkontribwixxi għal dan.

• 

  Involvi ruħek f’attivitajiet speċifiċi ta’ komunikazzjoni. Dawn l-attivitajiet jistgħu jvarjaw minn programm għal ieħor u jistgħu jiddependu fuq il-valur tal-finanzjament riċevut jew il-kuntest speċifiku. Dawn jistgħu jinkludu pereżempju

  • il-preparazzjoni ta’ pjan iddettaljat ta’ komunikazzjoni u ta’ disseminazzjoni
  • ir-regoli għas-siti web, il-kontijiet tal-media soċjali u l-materjali ta’ komunikazzjoni
  • l-organizzazzjoni ta' avvenimenti
  • ir-relazzjonijiet mal-media
  • il-billboards, plakek jew esebizzjonijiet stampati jew elettroniċi oħrajn
• 

  Uża l-emblema tal-UE b’mod korrett u prominenti.
  
  L-emblema tal-UE hi l-aktar marka viżiva importanti użata biex tirrikonoxxi l-oriġini u tiżgura l-viżibbiltà tal-finanzjament tal-UE. Minbarra l-emblema tal-UE, ebda identità jew logo viżiv ieħor ma jista’ jintuża biex jenfasizza l-appoġġ tal-UE. L-emblema tal-UE ma għandhiex tiġi modifikata jew amalgamata ma’ kwalunkwe element jew test grafiku ieħor. Jekk jintwerew logos oħrajn apparti l-emblema tal-Unjoni, l-emblema tal-Unjoni għandha tkun mill-anqas tal-istess daqs bħall-akbar wieħed mill-logos l-oħrajn. Għal aktar informazzjoni, jekk jogħġbok ikkonsulta l-linji gwida ddettaljati tagħna dwar l-użu tal-emblema tal-UE (link għal-linji gwida).

• 

  Id-dikjarazzjoni ta’ finanzjament “Iffinanzjat mill-Unjoni Ewropea” jew “Kofinanzjat mill-Unjoni Ewropea” dejjem trid tinkiteb sħiħa u titpoġġa ħdejn l-emblema. Tista’ tiddawnlowdja l-verżjoni korretta tal-emblema tal-UE flimkien mad-dikjarazzjoni ta’ finanzjament miċ-ċentru tal-iddawnlowdjar multilingwi tagħna. 

• 

  Uża informazzjoni preċiża:
  
  fi żminijiet ta’ diżinformazzjoni u miżinformazzjoni, hu importanti li tuża sorsi uffiċjali u rilevanti u siti web tal-UE meta taqsam informazzjoni dwar l-UE. Barra minn hekk, l-informazzjoni dwar il-proġett tiegħek trid tkun fattwalment korretta u ma tiżgwidax.

• 

  Involvi l-UE meta tikkomunika:
  
  skont il-programm, tista’ tkun obbligat tinvolvi lill-UE meta tikkomunika, pereżempju meta

  • il-proġett tiegħek hu mistenni li jkollu impatt kbir tal-media
  • hu ta’ importanza strateġika
  • hu ogħla minn ċertu valur finanzjarju
• 

  Ftakar li l-komunikazzjoni u l-viżibbiltà jgħoddu fost l-ispejjeż eliġibbli.
  
  Kwalunkwe nefqa relatata mal-komunikazzjoni u l-viżibbiltà hi parti mill-azzjoni u tista’ tibbenefika mill-finanzjament tal-UE.

• 

  Agħti lill-UE d-dritt li tuża l-materjal ta’ komunikazzjoni tiegħek.
  
  L-Unjoni Ewropea għandha d-dritt li tuża materjal ta’ komunikazzjoni prodott u proprjetà tar-riċevituri tal-finanzjament tal-UE. Dan id-dritt jingħata fil-forma ta’ liċenzja ħielsa mid-drittijiet tal-awtur, mhux esklużiva u irrevokabbli. L-ispiża ta’ din il-liċenzja tista’ tiġi koperta mill-fondi tal-UE. Is-sjieda tal-materjal tibqa’ tal-benefiċjarji tal-finanzjament tal-UE.

• 

  Jista’ jkun hemm tnaqqis finanzjarju f’każ ta’ nuqqas ta’ rispett tar-rekwiżiti.
  
  Jekk ir-riċevituri tal-finanzjament tal-UE jiksru xi wieħed mill-obbligi kuntrattwali tagħhom, il-kontribuzzjoni finanzjarja tal-UE tista’ titnaqqas.

Dokumenti