Protezzjoni tad-data fl-UE

Il-Karta tad-Drittijiet Fundamentali tal-UE tistipula li ċ-ċittadini tal-UE għandhom id-dritt għall-protezzjoni tad-data personali tagħhom.

Protezzjoni tad-data personali

Il-pakkett dwar il-protezzjoni tad-data adottat f’Mejju 2016 għandu l-għan li jagħmel l-Ewropa adatta għall-era diġitali. Aktar minn 90% tal-Ewropej jgħidu li jridu l-istess drittijiet għall-protezzjoni tad-data fl-UE kollha u irrispettivament minn fejn tkun ġiet ipproċessata d-data tagħhom.

Ir-Regolament Ġenerali dwar il-Protezzjoni tad-Data (GDPR)

Ir-Regolament (UE) 2016/679 dwar il-protezzjoni ta’ individwi fir-rigward tal-ipproċessar ta’ data personali u dwar il-moviment liberu ta’ din id-data. Dan it-test jinkludi r-rettifika ppubblikata fil-ĠU tal-UE tat-23 ta’ Mejju 2018.

Ir-regolament hu pass essenzjali biex jissaħħu d-drittijiet fundamentali tal-individwi fl-era diġitali u jiġi ffaċilitat in-negozju billi jiġu kkjarifikati r-regoli għall-kumpaniji u l-korpi pubbliċi fis-suq uniku diġitali. Liġi waħda se tneħħi wkoll il-frammentazzjoni attwali fis-sistemi nazzjonali differenti u l-piżijiet amministrattivi mhux neċessarji.

Ir-regolament daħal fis-seħħ fl-24 ta’ Mejju 2016 u beda japplika mill-25 ta’ Mejju 2018. Aktar informazzjoni għall-kumpaniji u l-individwi.

Informazzjoni dwar l-inkorporazzjoni tar-Regolament Ġenerali dwar il-Protezzjoni tad-Data (GDPR) fil-Ftehim ŻEE.

Notifiki tal-Istati Membri tal-UE lill-Kummissjoni Ewropea skont il-GDPR

Id-Direttiva dwar l-Infurzar tal-Liġi tal-Protezzjoni tad-Data

Id-Direttiva (UE) 2016/680 dwar il-protezzjoni ta’ persuni fiżiċi fir-rigward tal-ipproċessar ta’ data personali marbuta ma’ reati kriminali jew l-eżekuzzjoni ta’ pieni kriminali, u dwar il-moviment liberu ta’ tali data.

Id-direttiva tipproteġi d-dritt fundamentali taċ-ċittadini għall-protezzjoni tad-data kull meta d-data personali tintuża mill-awtoritajiet tal-infurzar tal-liġi kriminali għal finijiet ta’ infurzar tal-liġi. B’mod partikolari se tiżgura li d-data personali tal-vittmi, ix-xhieda u l-persuni suspettati ta’ delitti huma protetti kif xieraq, u se tiffaċilita l-kooperazzjoni transfruntiera fil-ġlieda kontra l-kriminalità u t-terroriżmu.

Id-Direttiva daħlet fis-seħħ fil-5 ta’ Mejju 2016 u l-pajjiżi tal-UE kellhom jittrasponuha fil-liġi nazzjonali tagħhom sas-6 ta’ Mejju 2018.

Il-pajjiżi tal-UE waqqfu korpi nazzjonali responsabbli għall-protezzjoni tad-data personali skont l-Artikolu 8(3) tal-Karta tad-Drittijiet Fundamentali tal-UE.

Il-Bord Ewropew għall-Protezzjoni tad-Data (EDPB) huwa korp Ewropew indipendenti li għandu jiżgura l-applikazzjoni konsistenti tar-regoli dwar il-protezzjoni tad-data fl-Unjoni Ewropea kollha. L-EDPB ġie stabbilit mir-Regolament Ġenerali dwar il-Protezzjoni tad-Data (GDPR).

L-EDPB hu magħmul mir-rappreżentanti tal-awtoritajiet nazzjonali tal-protezzjoni tad-data tal-UE/taż-ŻEE u mill-Kontrollur Ewropew għall-Protezzjoni tad-Data. Il-Kummissjoni Ewropea tipparteċipa fl-attivitajiet u l-laqgħat tal-Bord mingħajr id-dritt tal-vot.  Is-segretarjat tal-EDPB huwa pprovdut mill-EDPS. Is-segretarjat iwettaq il-kompiti tiegħu esklużivament taħt l-istruzzjonijiet tal-President tal-Bord.

Il-kompiti tal-EDPB jikkonsistu primarjament fl-għoti ta’ gwida ġenerali dwar kunċetti ewlenin tal-GDPR u tad-Direttiva dwar l-Infurzar tal-Liġi, pariri lill-Kummissjoni Ewropea dwar kwistjonijiet relatati mal-protezzjoni tad-data personali u leġiżlazzjoni ġdida proposta fl-Unjoni Ewropea, u l-adozzjoni ta’ deċiżjonijiet vinkolanti f’tilwim bejn l-awtoritajiet superviżorji nazzjonali.

Leġiżlazzjoni

Ir-Regolament 2018/1725 jistabbilixxi r-regoli applikabbli għall-ipproċessar tad-data personali mill-istituzzjonijiet, il-korpi, l-uffiċċji u l-aġenziji tal-Unjoni Ewropea. Hu allineat mar-Regolament Ġenerali dwar il-Protezzjoni tad-Data u d-Direttiva dwar l-Infurzar tal-Liġi tal-Protezzjoni tad-Data. Daħal fis-seħħ fil-11 ta’ Diċembru 2018.

Kontrollur Ewropew għall-Protezzjoni tad-Data

Ir-Regolament 2018/1725 stabbilixxa kontrollur Ewropew għall-protezzjoni tad-data (EDPS). L-EDPS huwa korp indipendenti tal-UE responsabbli għall-monitoraġġ tal-applikazzjoni tar-regoli dwar il-protezzjoni tad-data fi ħdan l-istituzzjonijiet Ewropej u għall-investigazzjoni tal-ilmenti.

Uffiċjal tal-Protezzjoni tad-Data tal-Kummissjoni Ewropea

Il-Kummissjoni Ewropea ħatret Uffiċjal tal-Protezzjoni tad-Data li huwa responsabbli għall-monitoraġġ u l-applikazzjoni tar-regoli dwar il-protezzjoni tad-data fil-Kummissjoni Ewropea. L-uffiċjal tal-protezzjoni tad-data jiżgura b’mod indipendenti l-applikazzjoni interna tar-regoli ta’ protezzjoni tad-data f’kooperazzjoni mal-Kontrollur Ewropew għall-Protezzjoni tad-Data.

Wara l-adozzjoni f’Ġunju 2021 ta’ żewġ settijiet ta’ Klawżoli Kuntrattwali Standard (SCC) (wieħed għall-użu bejn il-kontrolluri u l-proċessuri fiż-Żona Ekonomika Ewropea (ŻEE) u wieħed għat-trasferiment ta’ data personali lil pajjiżi barra miż-ŻEE), fil-25 ta’ Mejju 2022 il-Kummissjoni Ewropea ppubblikat Mistoqsijiet u Tweġibiet biex tipprovdi gwida prattika dwar l-użu tal-SCCs u tassisti lill-partijiet ikkonċernati fl-isforzi ta’ konformità tagħhom skont ir-Regolament Ġenerali dwar il-Protezzjoni tad-Data (GDPR). Dawn il-Mistoqsijiet u Tweġibiet issejsu fuq il-feedback riċevut minn diversi partijiet ikkonċernati dwar l-esperjenza tagħhom fl-użu tal-SCCs il-ġodda fl-ewwel xhur wara l-adozzjoni tagħhom. Il-Mistoqsijiet u Tweġibiet huma maħsuba biex ikunu sors “dinamiku” ta’ informazzjoni u se jiġu aġġornati hekk kif iqumu mistoqsijiet ġodda. 

Opportunitajiet ta’ Finanzjament u Offert (SEDIA)

Programm tad-Drittijiet, l-Ugwaljanza u ċ-Ċittadinanza (2014-2020)