Tweġiba
Id-data personali hija kwalunkwe informazzjoni li tirrelata ma' individwu ħaj identifikat jew identifikabbli. Il-biċċiet differenti tal-informazzjoni, li meta jinġabru flimkien jistgħu jwasslu għall-identifikazzjoni ta' persuna partikolari, huma wkoll data personali.
Id-data personali li tkun ġiet deidentifikata, kriptata jew psewdonimizzata imma li tista' tintuża biex persuna tiġi identifikata mill-ġdid tibqa' data personali u taqa' fil-kamp ta' applikazzjoni tal-liġi.
Id-data personali li tkun saret anonima b'tali mod li l-individwu ma jkunx jew ma jibqax iżjed identifikabbli ma tibqax titqies bħala data personali. Biex id-data tkun verament anonimizzata, l-anonimizzazzjoni għandha tkun irriversibbli.
Il-liġi tipproteġi d-data personali irrispettivament mit-teknoloġija użata għall-ipproċessar tad-data – hija teknoloġikament newtrali u tapplika kemm għall-ipproċessar awtomatizzat kif ukoll għall-ipproċessar manwali, sakemm id-data tiġi organizzata skont kriterji predefiniti (pereżempju f'ordni alfabetika). Ukoll ma tagħmilx differenza kif id-data tiġi maħżuna – f'sistema tal-IT, permezz ta' sorveljanza bil-vidjo, jew fuq karta; f'kull każ, id-data personali hija soġġetta għar-rekwiżiti tal-protezzjoni stabbiliti fil-GDPR.
Eżempji ta' data personali jinkludu
- l-isem u l-kunjom;
- l-indirizz tad-dar;
- l-indirizz tal-posta elettronika bħal name [dot] surnamecompany [dot] com (name[dot]surname[at]company[dot]com);
- in-numru tal-karta tal-identifikazzjoni;
- id-data dwar il-lok (pereżempju l-funzjoni tad-data dwar il-lok fuq il-mowbajl)*;
- l-indirizz tal-Protokoll tal-Internet (IP);
- l-ID tal-cookie*;
- l-identifikatur tar-reklamar tat-telefon tiegħek;
- id-data miżmuma minn sptar jew tabib, li tista' tkun simbolu li jidentifika persuna b'mod uniku.
*Innota li f'xi każijiet, hemm leġiżlazzjoni settorjali speċifika li tirregola pereżempju l-użu tad-data dwar il-lok jew l-użu tal-cookies – id-Direttiva dwar il-Privatezza Elettronika (id-Direttiva 2002/58/KE tal-Parlament Ewropew u tal-Kunsill tat-12 ta' Lulju 2002 (ĠU L 201, 31.7.2002, p. 37) u r-Regolament (KE) Nru 2006/2004 tal-Parlament Ewropew u tal-Kunsill tas-27 ta' Ottubru 2004 (ĠU L 364, 9.12.2004, p. 1).