Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 32013R1300

Regolament (UE) Nru 1300/2013 tal-Parlament Ewropew u tal-Kunsill tas- 17 ta’ Diċembru 2013 dwar il-Fond ta’ Koeżjoni u li jħassar ir-Regolament tal-Kunsill (KE) Nru 1084/2006

OJ L 347, 20.12.2013, p. 281–288 (BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)

Legal status of the document In force: This act has been changed. Current consolidated version: 20/12/2013

ELI: http://data.europa.eu/eli/reg/2013/1300/oj

20.12.2013   

MT

Il-Ġurnal Uffiċjali tal-Unjoni Ewropea

L 347/281

REGOLAMENT (UE) Nru 1300/2013 TAL-PARLAMENT EWROPEW U TAL-KUNSILL

tas-17 ta’ Diċembru 2013

dwar il-Fond ta’ Koeżjoni u li jħassar ir-Regolament tal-Kunsill (KE) Nru 1084/2006

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea, u b’mod partikolari t-tieni paragrafu tal-Artikolu 177 tiegħu,

Wara li kkunsidraw il-proposta mill-Kummissjoni Ewropea,

Wara li l-abbozz tal-att leġiżlattiv intbagħat lill-parlamenti nazzjonali,

Wara li kkunsidraw l-opinjoni tal-Kumitat Ekonomiku u Soċjali Ewropew (1),

Wara li kkunsidraw l-opinjoni tal-Kumitat tar-Reġjuni (2),

Filwaqt li jaġixxu skont il-proċedura leġiżlattiva ordinarja,

Billi:

(1)

L-ewwel paragrafu tal-Artikolu 174 tat-Trattat dwar il-Funzjonament tal-Unjoni Ewropea (TFUE) jistipula li l-Unjoni trid tiżviluppa u tkompli bl-azzjonijiet tagħha li jwasslu għat-tisħiħ tal-koeżjoni ekonomika, soċjali u territorjali tagħha. Il-Fond ta’ Koeżjoni li huwa stabbilit minn dan ir-Regolament għandu għaldaqstant jipprovdi kontribuzzjoni finanzjarja għall-proġetti fl-oqsma tal-ambjent u tan-netwerks trans-Ewropej fil-qasam tal-infrastruttura tat-trasport.

(2)

Ir-Regolament (UE) Nru 1303/2013 tal-Parlament Ewropew u tal-Kunsill (3) jistabbilixxid-dispożizzjonijiet komuni għall-Fond Ewropew għall-Iżvilupp Reġjonali (FEŻR), il-Fond Soċjali Ewropew,il-Fond ta' Koeżjoni, il-Fond Agrikolu Ewropew għall-Iżvilupp Rurali u l-Fond Ewropew Marittimu u għas-Sajd. Dak ir-Regolament jikkostitwixxi qafas ġdid għall-Fondi Strutturali u tal-Investiment Ewropej inkluż il-Fond ta' Koeżjoni. Huwa neċessarju, għalhekk, li jiġu speċifikati l-kompiti tal-Fond ta' Koeżjoni f'dak li għandu x'jaqsam dak il-qafas u f'dak li għandu x'jaqsam l-għan mogħti lill-Fond ta' Koeżjoni fit-TFUE.

(3)

Għandhom jiġu stabbiliti dispożizzjonijiet speċifiċi dwar it-tip ta' attivitajiet li jistgħu jiġu appoġġati mill-Fond ta' Koeżjoni, sabiex jikkontribwixxu għall-prijoritajiet ta' investiment fi ħdan l-objettivi tematiċi stabbiliti fir-Regolament (UE) Nru 1303/2013.

(4)

L-Unjoni għandha tkun tista' tikkontribwixxi, permezz tal-Fond ta' Koeżjoni, għal azzjonijiet li jwettqu l-objettivi ambjentali tagħha. skont l-Artikoli 11 u 191 TFUE, jiġifieri effiċjenza enerġetika u enerġija rinnovabbli, u fis-settur tat-trasport barra n-netwerks trans-Ewropej, it-trasport bil-ferrovija, fix-xmajjar u bil-baħar, is-sistemi ta' trasport intermodali u l-interoperabbiltà tagħhom, il-ġestjoni tat-traffiku fuq it-triq, bil-baħar u bl-ajru, trasport urban nadif u trasport pubbliku.

(5)

Għandu jitfakkar li meta l-miżuri msejsa fuq l-Artikolu 192(1) TFUE jinvolvu spejjeż meqjusa bħala sproporzjonati għall-awtoritajiet pubbliċi ta’ Stat Membru u l-appoġġ finanzjarju mill-Fond ta’ Koeżjoni jiġi provdut skont l-Artikolu 192(5) TFUE, għandu japplika xorta waħda l-prinċipju li min iniġġes iħallas.

(6)

Il-proġetti tan-netwerk tat-trasport trans-Ewropew (TEN-T) appoġġati mill-Fond ta' Koeżjoni għandhom jikkonformaw mal-linji gwida għal retikolati tat-trasport trans-Ewropej stabbiliti bir-Regolament (UE) Nru 1315/2013 tal-Parlament Ewropew u tal-Kunsill (4). Sabiex jiġu kkonċentrati l-isforzi f'dak ir-rigward, għandha tingħata prijorità lill-proġetti ta' interess komuni kif definit f'dak ir-Regolament.

(7)

L-investiment biex jinkiseb it-tnaqqis ta’ emissjonijiet ta’ gassijiet b'effett serra minn attivitajiet elenkati fl-Anness 1 tad-Direttiva 2003/87/KE tal-Parlament Ewropew u tal-Kunsill (5) ma għandux ikun eliġibbli għall-appoġġ mill-Fond ta’ Koeżjoni peress li dan diġà jibbenefika finanzjarjament mill-applikazzjoni ta’ dik id-Direttiva. Dik l-esklużjoni ma għandhiex tillimita l-possibbiltà li l-Fond ta’ Koeżjoni jintuża biex jiġu appoġġati attivitajiet mhux elenkati fl-Anness I tad-Direttiva 2003/87/KE anke jekk dawk l-attivitajiet jiġu implimentati mill-istess operaturi ekonomiċi, u jinkludu attivitajiet bħal investimenti ta’ effiċjenza enerġetika fil-ġenerazzjoni konġunta tas-sħana u l-elettriku u f'netwerks tat-tisħin distrettwali, id-distribuzzjoni intelliġenti tal-enerġija elettrika, is-sistemi ta’ ħżin u trażmissjoni u miżuri mmirati lejn it-tnaqqis fit-tniġġis fl-arja, anke jekk wieħed mill-effetti indiretti ta' attivitajiet bħal dawn huwa t-tnaqqis tal-emissjonijiet ta’ gassijiet b'effett serra, jew jekk huma elenkati fil-pjan nazzjonali msemmi fid-Direttiva 2003/87/KE.

(8)

Mhuwiex possibbli li investiment fl-akkomodazzjoni, ħlief għal dak relatat mal-promozzjoni tal-effiċjenza enerġetika jew l-użu tal-enerġija rinnovabbli, ikun eliġibbli għall-appoġġ mill-Fond ta' Koeżjoni peress li jaqa' barra mill-ambitu ta' appoġġ mill-Fond ta' Koeżjoni kif definit fit-TFUE.

(9)

Biex jitħaffef l-iżvilupp tal-infrastruttura tat-trasport madwar l-Unjoni, il-Fond ta’ Koeżjoni għandu jappoġġa proġetti ta’ infrastruttura tat-trasport tal-valur miżjud Ewropew previsti fir-Regolament (UE) Nru 1316/2013 tal-Parlament Ewropew u tal-Kunsill (6) għal ammont totali ta' EUR 10 000 000 000. L-allokazzjoni tal-appoġġ mill-Fond ta’ Koeżjoni għal dawk il-proġetti għandu jikkonforma mar-regoli stabbiliti taħt l-Artikolu 92(6) tar-Regolament (UE) Nru 1303/2013. Skont ir-Regolamet, (UE) Nru 1316/2013, għandu jkun disponibbli appoġġ biss għall-Istati Membri eliġibbli għall-finanzjament mill-Fond ta’ Koeżjoni, bir-rati ta’ kofinanzjament applikabbli għal dak il-Fond.

(10)

Huwa importanti li jiġi żgurat li, fil-promozzjoni ta' investiment fil-ġestjoni tar-riskju, jiġu kkunsidrati riskji speċifiċi fil-livell reġjonali, transkonfinali u transnazzjonali.

(11)

Il-komplementarjetà u s-sinerġiji bejn l-interventi appoġġati mill-Fond ta' Koeżjoni, il-FEŻR, il-mira tal-kooperazzjoni territorjali Ewropea u l-Faċilità Nikkollegaw l-Ewropa għandhom ikunu żgurati, sabiex tiġi evitata d-duplikazzjoni tal-isforzi u jiġi garantit l-aħjar kollegament bejn it-tipi differenti ta' infrastruttura fil-livelli lokali, reġjonali u nazzjonali, u fl-Unjoni kollha.

(12)

Sabiex ikunu indirizzati l-ħtiġijiet speċifiċi tal-Fond ta' Koeżjoni, u f'konformità mal-istrateġija tal-Unjoni għal tkabbir intellliġenti, sostenibbli u inklużiv, hu neċessarju li jiġu stipulati, fi ħdan kull objettiv tematiku stabbilit fir-Regolament (UE) Nru 1303/2013, l-azzjonijiet speċifiċi tal-Fond ta' Koeżjoni bħala "prijoritajiet ta' investiment". Dawk il-prijoritajiet ta’ investiment għandhom jistabbilixxu objettivi dettaljati, li ma jeskludux lil xulxin, li l-Fond ta' Koeżjoni għandu jikkontribiwixxi għalihom. Dawn il-prijoritajiet ta' investiment għandhom jiffurmaw il-bażi għad-definizzjoni ta' objettivi speċifiċi fil-programmi li jqisu l-ħtiġijiet u l-karatteristiċi tal-qasam tal-programm. Biex tiżdied il-flessibilità u jitnaqqas il-piż amministrattiv billi permezz ta' implimentazzjoni konġunta, il-FEŻR u l-prijoritajiet ta’ investiment tal-Fond ta’ Koeżjoni taħt l-objettivi tematiċi korrispondenti għandhom ikunu allinjati.

(13)

Għandu jiġi stabbilit sett komuni ta’ indikaturi tal-produzzjoni sabiex jitkejjel il-progress aggregat fil-livell tal-Unjoni tal-implimentazzjoni tal-programmi oeprazzjonali f’Anness ta' dan ir-Regolament. Dawk l-indikaturi għandhom jikkorrispondu għall-prijorità ta’ investiment u t-tip ta’ azzjoni appoġġati skont dan ir-Regolament u d-dispożizzjonijiet rilevanti tar-Regolament (UE) Nru 1303/2013. L-indikaturi komuni tal-produzzjoni għandhom ikunu kkumplimentati b’indikaturi ta’ riżultat speċifiċi għall-programm u, meta rilevanti, minn indikaturi tal-produzzjoni speċifiku għall-programm.

(14)

Sabiex jiġi emendat dan ir-Regolament fir-rigward ta' ċerti elementi mhux essenzjali, is-setgħa li tadotta atti skont l-Artikolu 290 TFUE għandha tiġi delegata lill-Kummissjoni fir-rigward tal-emenda tal-lista ta' indikaturi komuni tal-produzzjoni stipulati fl-Anness I għal dan ir-Regolament. Hu ta' importanza partikolari li l-Kummissjoni twettaq konsultazzjonijiet xierqa matul il-ħidma preparatorja tagħha, inkluż fil-livell ta' esperti. Il-Kummissjoni, meta tħejji u tfassal atti delegati, għandha tiżgurea li jkun hemm trażmissjoni simultanja, f'waqtha u xierqa tad-dokumenti rilevanti lill-Parlament Ewropew u lill-Kunsill.

(15)

Minħabba li l-objettiv ta' dan ir-Regolament, jiġifieri li tissaħħaħ il-koeżjoni ekonomika, soċjali u territorjali tal-Unjoni fl-interessi tal-promozzjoni tal-iżvilupp sostenibbli, ma jistax jinkiseb suffiċjentement mill-Istati Membri, imma jista' pjuttost, minħabba l-livell ta' disparitajiet bejn il-livelli ta' żvilupp tad-diversi reġjuni u r-ritard ta' dawk ir-reġjuni li huma inqas favoriti u l-limitazzjoni fuq ir-riżorsi finanzjarji tal-Istati Membri u r-reġjuni, jinkiseb aħjar fil-livell tal-Unjoni, l-Unjoni tista’ tadotta miżuri, f'konformità mal-prinċipju ta’ sussidjarjetà kif stabbilit fl-Artikolu 5 tat-Trattat dwar l-Unjoni Ewropea. Skont il-prinċipju ta' proporzjonalità, kif stabbilit f'dak l-Artikolu, dan ir-Regolament ma jmurx lil hinn minn dak li huwa neċessarju biex jintlaħaq dak l-objettiv.

(16)

Peress li dan ir-Regolament jissostitwixxi r-Regolament tal-Kunsill Nru 1084/2006 (7), dak ir-Regolament għandu jiġi mħassar. Madankollu, dan ir-Regolament ma għandux jaffettwa t-tkomplija jew il-modifika tal-assistenza approvata mill-Kummissjoni abbażi tar-Regolament (KE) Nru 1084/2006 jew kwalunkwe leġiżlazzjoni oħra li tapplika għal dik l-assistenza fil-31 ta' Diċembru 2013. Dak ir-Regolament jew tali leġiżlazzjoni oħra applikabbli għandhom konsegwentement ikomplu japplikaw wara l-31 ta' Diċembru 2013 għal dik l-assistenza jew l-operazzjonijiet ikkonċernati sal-għeluq tagħhom. L-applikazzjonijiet għal assistenza magħmulin jewa approvati skont ir-Regolament (KE) Nru 1084/2006 għandhom jibqgħu validi.

(17)

Sabiex jista' jkun hemm applikazzjoni fil-pront tal-miżuri previsti f'dan ir-Regolament, dan ir-Regolament għandu jidħol fis-seħħ fil-jum ta' wara l-pubblikazzjoni tiegħu f'Il-Ġurnal Uffiċjali tal-Unjoni Ewropea,

ADOTTAW DAN IR-REGOLAMENT:

Artikolu 1

L-istabbiliment tal-Fond ta' Koeżjoni u s-suġġett

1.   Fond ta’ Koeżjoni huwa b'dan stabbilit għall-iskop ta’ tisħiħ tal-koeżjoni ekonomika, soċjali u territorjali tal-Unjoni fl-interessi tal-promozzjoni tal-iżvilupp sostenibbli.

2.   Dan ir-Regolament jistabbilixxi l-kompiti tal-Fond ta' Koeżjoni u l-kamp ta' applikazzjoni tal-appoġġ tiegħu fir-rigward tal-Investiment li għandu fil-mira t-tkabbir u l-impjiegi msemmi fl-Artikolu 89 tar-Regolament (UE) Nru 1303/2013.

Artikolu 2

L-ambitu tal-appoġġ mill-Fond ta' Koeżjoni

1.   Il-Fond ta’ Koeżjoni, filwaqt li jiżgura bilanċ xieraq u skont l-investiment u l-bżonnijiet infrastrutturali speċifiċi għal kull Stat Membru, għandu jappoġġa:

(a)

l-investiment fl-ambjent, inklużi l-oqsma relatati mal-iżvilupp sostenibbli u l-enerġija li jippreżentaw benefiċċji ambjentali;

(b)

it-TEN-T f'konformità mal-linji gwida adottati bir-Regolament (UE) Nru 1315/2013;

(c)

l-assistenza teknika.

2.   Il-Fond ta' Koeżjoni ma għandux jappoġġa:

(a)

id-diżattivazzjoni jew il-kostruzzjoni tal-impjanti tal-enerġija nukleari;

(b)

investiment biex jinkiseb it-tnaqqis tal-emissjonijiet ta' gass b'effett serra minn attivitajiet elenkati fl-Anness I għad-Direttiva 2003/87/KE;

(c)

investiment fl-akkomodazzjoni,għajr jekk marbut mal-promozzjoni tal-effiċjenza enerġetika jew l-użu tal-enerġija rinnovabbli;

(d)

il-manifattura, l-ipproċessar u l-kummerċjalizzazzjoni ta' tabakk u prodotti tat-tabakk;

(e)

impriżi f'diffikultà, kif definit taħt ir-regoli tal-Unjoni Ewropea dwar l-għajnuna mill-Istat;

(f)

investiment fl-infrastruttura tal-ajruporti sakemm ma jkunx relatat mal-ħarsien ambjentali jew akkumpanjat minn investiment meħtieġ sabiex jittaffa jew jitnaqqas l-impatt ambjentali negattiv tagħha.

Artikolu 3

L-appoġġ tal-Fond ta’ Koeżjoni għall-proġetti tal-infrastruttura tat-trasport taħt il-Faċilità Nikkollegaw l-Ewropa

Il-Fond ta’ Koeżjoni għandu jappoġġa l-proġetti ta’ infrastruttura tat-trasport ta’ valur miżjud Ewropew previsti fir-Regolament (UE) Nru 1316/2013 għal ammont ta’ EUR 10 000 000 000 f'konformità mal-Artikolu 92(6) tar-Regolament (UE) Nru 1303/2013.

Artikolu 4

Il-prijoritajiet ta' investiment

Il-Fond ta’ Koeżjoni għandu jappoġġa dawn il-prijoritajiet ta’ investiment taħt l-objettivi tematiċi stipulati fl-ewwel paragrafu tal-Artikolu 9 tar-Regolament (UE) Nru 1303/2013 skont il-ħtiġijiet ta' żvilupp u l-potenzjal għat-tkabbir imsemmija fil-punt (a)(i) tal-Artikolu 15(1) ta' dak ir-Regolament u stabbiliti fil-Ftehim ta’ Sħubija:

(a)

l-appoġġ lill-bidla lejn ekonomija b'livell baxx ta' emissjonijiet ta' karbonju fis-setturi kollha billi:

(i)

jiġu promossi l-produzzjoni u d-distribuzzjoni ta' enerġija li tiġi minn sorsi rinnovabbli;

(ii)

jiġu promossi l-effiċjenza enerġetika u l-użu ta' enerġija rinnovabbli fl-intrapriżi;

(iii)

jiġu appoġġati l-effiċjenza enerġetika, il-ġestjoni intelliġenti tal-enerġija u l-użu tal-enerġija rinnovabbli fl-infrastruttura pubblika, inkluż f'bini pubbliku u fis-settur tal-akkomodazzjoni;

(iv)

jiġu żviluppati u implimentati sistemi ta' distribuzzjoni intelliġenti li joperaw f'livelli ta' vultaġġ baxxi u medji;

(v)

jiġu promossi strateġiji ta' użu baxx ta' karbonju għat-tipi kollha ta' territorju, b'mod partikolari għaż-żoni urbani, inkluża l-promozzjoni tal-mobilità urbana multimodali sostenibbli u l-miżuri ta' adattament rilevanti għall-mitigazzjoni;

(vi)

jiġi promoss l-użu ta' ġenerazzjoni konġunta b'effiċjenza għolja ta' sħana u elettriku abbażi tad-domanda għal sħana siewja;

(b)

il-promozzjoni ta' adattament għat-tibdil fil-klima, il-prevenzjoni u l-ġestjoni tar-riskju billi:

(i)

jiġi appoġġat l-investiment għall-adattament għat-tibdil fil-klima, inklużi approċċi bbażati fuq ekosistemi;

(ii)

jiġi promoss l-investiment li jindirizza r-riskji speċifiċi, jiżgura r-reżiljenza għal diżastri u jiżviluppa sistemi ta’ ġestjoni tad-diżastri;

(c)

il-preservazzjoni u l-protezzjoni tal-ambjent u l-promozzjoni tal-effiċjenza tar-riżorsi billi;

(i)

isir investiment fis-settur tal-iskart biex jintlaħqu l-ħtiġijiet tal-acquis ambjentali tal-Unjoni u jiġu indirizzati l-bżonnijiet, identifikati mill-Istati Membri, għal investiment li jmur lil hinn minn dawk il-ħtiġijiet;

(ii)

isir investiment fis-settur tal-ilma biex jintlaħqu l-ħtiġijiet tal-acquis ambjentali tal-Unjoni u jiġu indirizzati l-bżonnijiet, identifikati mill-Istati Membri, għal investiment li jmur lil hinn minn dawk il-ħtiġijiet;

(iii)

jiġu protetti u restawrati l-bijodiversità u l-ħamrija u jiġu promossi servizzi għall-ekosistema anki permezz ta' Natura 2000, u infrastruttura ambjentali;

(iv)

tittieħed azzjoni biex jitjieb l-ambjent urban, jiġu rivitalizzati l-ibliet, jiġu riġenerati u dekontaminati s-siti industrijali abbandunati (brownfield sites) (inklużi żoni ta' konverżjoni), jitnaqqas it-tniġġis tal-arja u jiġu promossi miżuri ta' tnaqqis tal-istorbju;

(d)

il-promozzjoni tat-trasport sostenibbli u t-tneħħija ta' konġestjoni fl-infrastrutturi tan- netwerks prinċipali billi:

(i)

tiġi appoġġata Żona Unika Ewropea tat-Trasport multimodali permezz ta' investiment fit-TEN-T;

(ii)

jiġu żviluppati u mtejba sistemi tat-trasport b'kuxjenza ambjentali (inkluż b'livell ta' storbju baxx) u b'livell ta' karbonju baxx, inklużi passaġġi tal-ilma interni u trasport marittimu, portijiet, kollegamenti multimodali u infrastruttura tal-ajruporti, sabiex tiġi promossa l-mobilità reġjonali u lokali sostennibbli;

(iii)

jiġu żviluppati u riabilitati sistemi ferrovjarji komprensivi, ta’ kwalità għolja u interoperabbli, u jiġu promossi miżuri ta' tnaqqis tal-istorbju;

(e)

it-titjib tal-kapaċità istituzzjonali tal-awtoritajiet pubbliċi u l-partijiet interessati u amministrazzjoni pubblika effiċjenti permezz ta' azzjonijiet li jsaħħu l-kapaċità istituzzjonali u l-effiċenzja tal-amministrazzjoni pubblika u tas-servizzi pubbliċi relatati mal-implimentazzjoni tal-Fond ta' Koeżjoni.

Artikolu 5

L-indikaturi

1.   L-indikaturi komuni tal-produzzjoni, kif stipulati fl-Anness I għal dan ir-Regolament, indikaturi ta' riżultati speċifiċi għal programm u, fejn relevanti, indikaturi tal-produzzjoni speċifiċi għal programm għandhom jintużaw f'konformità mal-Artikolu 27(4) u l-punt (b)(ii) u (iv) u l-punt (c)(ii) u (iv) tal-Artikolu 96(2) tar-Regolament (UE) Nru 1303/2013.

2.   Għall-indikaturi tal-produzzjonikomuni u speċifiċi għal programm, il-linji bażi għandhom jiġu stabbiliti fil-livell ta’ żero. Il-valuri ta' mira kwantifikati kumulattivi għal dawk l-indikaturi għandhom jiġu stabbiliti għall-2023.

3.   Għall-indikaturi tal-eżitu speċifiċi għal programm, li huma marbuta ma’ prijoritajiet ta’ investiment, il-linji bażi għandhom jużaw id-dejta l-iżjed reċenti disponibbli u l-miri għandhom jiġu stabbiliti għall-2023. Il-miri jistgħu jiġu espressi f’termini kwantitattivi jew kwalitattivi.

4.   Il-Kummissjoni għandha tingħata s-setgħa li tadotta atti delegati skont l-Artikolu 7 biex temenda l-lista ta' indikaturi tal-produzzjoni komuni stabbiliti fl-Anness I, sabiex tagħmel aġġustamenti, meta jkun ġustifikat biex tiżgura l-valutazzjoni effettiva tal-progress fl-implimentazzjoni tal-programm operazzjonali.

Artikolu 6

Dispożizzjonijiet tranżitorji

1.   Dan ir-Regolament ma għandux jaffettwa t-tkomplija jew il-modifika, inkluża l-kanċellazzjoni totali jew parzjali, ta' assistenza approvata mill-Kummissjoni abbażi tar-Regolament (KE) Nru 1084/2006, jew kwalunkwe leġislazzjoni oħra li tapplika għal dik l-assistenza fil-31 ta' Diċembru 2013. Dak ir-Regolament jew tali leġislazzjoni applikabbli oħra għandhom konsegwentement ikomplu japplikaw wara l-31 ta' Diċembru 2013 għal dik l-assistenza jew l-operazzjonijiet ikkonċernati sakemm jagħlqu. Għall-finijiet ta' dan il-paragrafu, assistenza għandha tkopri programmi operazzjonali u proġetti maġġuri.

2.   L-applikazzjonijiet biex wieħed jirċievi assistenza magħmulin jew approvati taħt ir-Regolament (KE) Nru 1084/2006 għandhom jibqgħu validi.

Artikolu 7

Eżerċizzju tad-delega

1.   Is-setgħa ta’ adozzjoni ta’ atti ddelegati hija mogħtija lill-Kummissjoni soġġett għall-kundizzjonijiet stabbiliti f’dan l-Artikolu.

2.   Is-setgħa ta' adozzjoni ta' atti delegati msemmija fl-Artikolu 5(4) hija mogħtija lill-Kummissjoni minn 21 ta' Diċembru 2013 sal-31 ta' Diċembru 2020.

3.   Id-delega ta' setgħa msemmija fl-Artikolu 5(4) tista' tiġi revokata fi kwalunkwe mument mill-Parlament Ewropew jew mill-Kunsill. Deċiżjoni ta’ revoka għandha ttemm id-delega ta’ setgħa speċifikata f’dik id-deċiżjoni. Din għandha ssir effettiva fil-jum wara l-pubblikazzjoni tad-deċiżjoni f'Il-Ġurnal Uffiċjali tal-Unjoni Ewropea jew f’data aktar tard speċifikata fih. Ma għandhiex taffettwa l-validità ta’ kull att iddelegat li jkun diġà fis-seħħ.

4.   Hekk kif tadotta att delegat, il-Kummissjoni għandha tinnotifikah simultanjament lill-Parlament Ewropew u lill-Kunsill.

5.   Att delegat adottat skont l-Artikolu 5(4) għandu jidħol fis-seħħ biss jekk ma tiġix espressa oġġezzjoni mill-Parlament Ewropew jew mill-Kunsill fi żmien perjodu ta' xahrejn min-notifika ta' dak l-att lill-Parlament Ewropew u lill-Kunsill jew jekk, qabel ma jiskadi dak il-perjodu, il-Parlament Ewropew u l-Kunsill ikunu t-tnejn infurmaw lill-Kummissjoni li mhumiex sejrin joġġezzjonaw. Dak il-perjodu għandu jiġi estiż b’xahrejn bl-inizjattiva tal-Parlament Ewropew jew tal-Kunsill.

Artikolu 8

Revoka

Mingħajr preġudizzju għall-Artikolu 6 ta' dan ir-Regolament, ir-Regolament (KE) Nru 1084/2006 huwa b'dan imħassar b'effett mill-1 ta' Jannar 2014.

Ir-referenzi għar-Regolament irrevokat għandhom jitqiesu bħala referenzi għal dan ir-Regolament u għandhom jinqraw skont it-tabella ta' korrelazzjoni kif stabbilta fl-Anness II.

Artikolu 9

Reviżjoni

Il-Parlament Ewropew u l-Kunsill għandhom jirrivedu dan ir-Regolament sal-31 ta' Diċembru 2020, skont l-Artikolu 177 TFUE.

Artikolu 10

Dħul fis-seħħ

Dan ir-Regolament għandu jidħol fis-seħħ l-għada tal-jum tal-pubblikazzjoni tiegħu f'Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, is-17 ta’ Diċembru 2013.

Għall-Parlament Ewropew

Il-President

M. SCHULZ

Għall-Kunsill

Il-President

R. ŠADŽIUS

(1)  ĠU C 191, 29.6.2012, p. 38.

(2)  ĠU C 225, 27.7.2012, p. 143.

(3)  Ir-Regolament (UE) Nru 1303/2013 tal-Parlament Ewropew u tal-Kunsill ta’ 17 ta’ Diċembru 2013 li jistabbilixxi dispożizzjonijiet komuni dwar il-Fond Ewropew għall-Iżvilupp Reġjonali, il-Fond Soċjali Ewropew, il-Fond ta’ Koeżjoni, il-Fond Agrikolu Ewropew għall-Iżvilupp Rurali u l-Fond Marittimu u tas-Sajd Ewropew u li jistabbilixxi dispożizzjonijiet ġenerali dwar il-Fond Ewropew għall-Iżvilupp Reġjonali, il-Fond Soċjali Ewropew, il-Fond ta’ Koeżjoni u l-Fond Ewropew għall-Affarijiet Marittimi u s-Sajd u li jirrevoka r-Regolament tal-Kunsll (KE) Nru 1083/2006 (Ara paġna 320 ta' dan il-Ġurnal Uffiċjali).

(4)  Ir-Regolament (UE) Nru 1315/2013 tal-Parlament Ewropew u tal-Kunsill ta’ 11 ta’ Diċembru 2013 Deċiżjoni dwar linji gwida tal-Unjoni għall-iżvilupp tan-netwerk tat-trasport trans-Ewropew u li jirrevoka d-Deċiżjoni Nru 661/2010/UE (ĠU L 348, 20.12.2013, p. 1).

(5)  Direttiva 2003/87/KE tal-Parlament Ewropew u tal-Kunsill tat-13 ta' Ottubru 2003 li tistabbilixxi skema għall-iskambju ta' kwoti ta' emissjonijiet ta' gassijiet serra ġewwa l-Komunità u li temenda d-Direttiva 96/61/KE (ĠU L 275, 25.10.2003, p. 32).

(6)  Ir-Regolament (UE) Nru 1316/2013 tal-Parlament Ewropew u tal-Kunsill tal-11 ta' Diċembru 2013 li jistabbilixxi l-Faċilità Nikkollegaw l-Ewropa, li jemenda r-Regolament (UE) Nru 913/2010 u li jħassar ir-Regolamenti (KE) Nru 680/2007 u (KE) Nru 67/2010 (ĠU L 348, 20.12.2013, p. 129).

(7)  Ir-Regolament tal-Kunsill (KE) Nru 1084/2006 tal-11 ta' Lulju 2006 li jistabbilixxi Fond ta' Koeżjoni u li jħassar ir-Regolament (KE) Nru 1164/94 (ĠU L 210, 31.7.2006, p. 79).

ANNESS I

INDIKATURI KOMUNI TAL-PRODUZZJONI GĦALL-FOND TA' KOEŻJONI

 

UNITÀ

DENOMINAZZJONI

Ambjent

Skart solidu

tunnellati/sena

Il-kapaċità addizzjonali għar-riċiklaġġ tal-iskart

Provvista tal-ilma

persuni

Il-popolazzjoni addizzjonali servuta bi provvista ta' ilma aħjar

Trattament tad-dranaġġ

popolazzjoni ekwivalenti

Il-popolazzjoni addizzjonali servuta bi trattament ta' dranaġġ aħjar

Il-prevenzjoni u l-ġestjoni tar-riskju

persuni

Il-popolazzjoni li tibbenefika mill-miżuri li jipproteġu kontra l-għargħar

persuni

Il-popolazzjoni li tibbenefika minn miżuri ta' protezzjoni kontra n-nirien fil-foresti

Riabilitazzjoni tal-art

ettari

L-erja totali ta' wiċċ l-art riabilitata

Natura u bijodiversità

ettari

L-erja ta’ wiċċ l-art ta’ ħabitats appoġġati biex jinkiseb status aħjar ta’ konservazzjoni

Enerġija u tibdil fil-klima

Enerġiji rinnovabbli

MW

Il-kapaċità addizzjonali tal-produzzjoni tal-enerġija rinnovabbli

Effiċjenza enerġetika

unitajiet domestiċi

In-numru ta’ unitajiet domestiċi bi klassifikazzjoni mtejba tal-konsum tal-enerġija

kWh/sena

It-tnaqqis fil-konsum annwali tal-enerġija primarja fil-bini pubbliku

utenti

In-numru addizzjonali ta' utenti tal-enerġija konnessi ma’ netwerks intelliġenti (smart grids)

Tnaqqis fil-GHG

tunnellati ta' CO2eq

It-tnaqqis stmat annwali ta' GHG

Trasport

Ferrovija

kilometri

It-tul totali tal-linji ferrovjarji ġodda

 

kilometri

It-tul totali tal-linii ferrovjarji mibnija mill-ġdid jew mtejba

Toroq

kilometri

It-tul totali ta' toroq mibnija ġodda

kilometri

It-tul totali ta' toroq mibnija mill-ġdid jew mtejba

Trasport urban

kilometri

It-tul totali ta’ linji ġodda jew imtejba tat-tramm jew tal-metro

Passaġġi tal-ilma intern

kilometri

It-tul totali ta' passaġġi tal-ilma intern ġodda jew imtejba

ANNESS II

TABELLA TA' KORRELAZZJONI

Regolament (KE) Nru 1084/2006

Dan ir-Regolament

Artikolu 1

Artikolu 1

Artikolu 2

Artikolu 2

Artikolu 3

—

Artikolu 4

—

—

Artikolu 3

—

Artikolu 4

—

Artikolu 5

Artikolu 5

Artikolu 6

Artikolu 5a

—

—

Artikolu 7

Artikolu 6

Artikolu 8

Artikolu 7

Artikolu 9

Artikolu 8

Artikolu 10

Dikjarazzjoni konġunta tal-Parlament Ewropew u tal-Kunsill dwar l-applikazzjoni tal-Artikolu 6 tar-Regolament dwar il-FEŻR, l-Artikolu 15 tar-Regolament dwar il-Kooperazzjoni Territorjali Ewropea (KTE) u l-Artikolu 4 tar-Regolament dwar il-Fond ta’ Koeżjoni

Il-Parlament Ewropew u l-Kunsill jinnotaw l-assigurazzjoni mogħtija mill-Kummissjoni lil-leġiżlatura tal-UE li l-indikaturi komuni ta’ produzzjoni għar-Regolament dwar il-FEŻR, ir-Regolament dwar il-KTE u r-Regolament dwar il-Fond ta’ Koeżjoni li għandhom jiġu inklużi f’anness ma’ kull regolament, rispettivament, huma l-eżitu għa proċess preparatorju li ħa fit-tul li kien jinvolvi l-esperti ta’ valutazzjoni kemm tal-Kummissjoni u kemm tal-Istati Membri u, fil-prinċipju, huma mistennija jibqgħu stabbli.

Top